管理(12) - 遲到

如果你係一間IT公司o既老闆，你有個好強o既員工每日都遲到，你會點做？想炒左佢？可能要幾個月時間先請得返適合o既新人去填補佢o既空缺架喎。咁咪得不償失？

呢個世界實在有太多老闆過份看重遲到問題，佢地連一分鐘都會同你計得清清楚楚。但其實有冇諗過，你要員工準時返工，咁佢就有權準時放工。事實上，如果你唔同佢地計得咁清楚，佢地會覺得唔準時放工都冇所謂，反而想做完手頭上o既野先走。

邊樣對公司著數D？自己計下條數啦。

今日o係Quora見到有人問同一個問題，所以呢個問題的確係困繞住好多人，包括老闆同員工。

不過，並非每個行業都可以容許員工遲到。例如金融行業，由於交易所有特定開巿時間，員工遲到的確有可能影響公司運作。所以作為老闆，唔應該人地點做就跟足，應該要自己思考一下點樣先對公司最好。

管理(11) - 同事遞信關我乜事?

曾經o係超過十間公司做過o既我，觀察到每間公司o既管治方法，文化，流程等，都係有各自一套的。不過，每間公司，無論大定細，其實都有共通點。說穿了，公司之所以存在，其實咪又係為左做生意搵錢。為左達到目的，老細們都搞盡腦汁去優化公司各個部門以賺取最高利潤。可是，雖然如此，佢地其實每一日都犯錯，例如過份主觀，太愛面子，一成不變，不懂用人等。

看了老占的文章，很感概：
公司新來了一個Reception叫Sarah

說真的，每一位新入職o既同事，開始時一定很願意為公司打拼，希望做出成績，從而得到重視。但每一位遞信o既同事，亦必然有某些原因而令佢對公司不再存有希望。一位同事由很願意打併，慢慢轉變為不再存有希望，如果話公司沒有責任，相信很難說服人。

可是，每位老細都會覺得同事要離開，唔代表公司做得唔好。係佢自己受到外面其他公司o既引誘，又或者係同事自己expectation同公司太大落差，所以佢先會走。一句講晒，公司冇問題，係佢自己o既問題。

曾幾何時，我o係一間公司入面做左兩年多。當年我只係一個Analyst Programmer，但負責公司其中一個最重要o既system。我見到無論係個system本身，定係deployment流程，甚至人事安排，team structure都有好多問題。反映左無數次而不果之後，我最後寫左份proposal。

結果點？三個字，石沉大海。

同老占文章中描述o既現像一樣，提出意見，就等於挑戰權威。為公司好，高層會覺得你多事，有不軌企圖。

o係香港工作，其實都幾悲哀。

管理(10) - 從佔中看管理

佔中這件香港大事，相信讀者們無論是否身處香港，都已經耳熟能詳(大陸除外)。但如果抽離一點，客觀一點去看整件事，我地從中可以學到咩呢？

1. 口說聽取民意，最終郤被歪曲
作為管理層，聽到員工意見，好多時第一個反應就係覺得煩。無論佢地嘅意見幾咁客觀，目的係幾咁為公司好，但講意見嘅唔係老闆，所以已經預設左佢講野冇point。就算老闆同員工講嘅野係一模一樣，都係老闆啱，員工錯。咁樣只會令員工反感，繼而失去動力，最後員工個心已經唔再係為公司好，所以只會經常犯錯。就好似佔中前，梁振英政府口口聲聲話聽取民意，郤將「要求真普選」扭曲為「要求一人一票」，何奇可笑。結果，有目共睹，遊行遊過了，發聲發過了，唯有佔領中環。

2. 官字兩個口，闆字三個口
做老闆最忌反口覆舌。唔少老闆好多時都唔記得自己講過D乜，就算有晒email，甚至有秘書日日提，都仲係唔記得。所以當下達命令時就會比人感覺反口覆舌，朝令夕改。今日就叫你唔好搞某個project，聽日就問你個project搞成點。咁你到底想點？乜都你講晒啦。就好似梁振英政府咁，一邊話會同學聯對話要佢地和平理性，一邊又暗中耍手段令示威者起衝突，以便名正言順去清場。神又係你，鬼又係你。

3. 政府清場失民意，公司炒人失士氣
公司員工士氣非常重要，如果士氣低落，生產力自然下降。而炒人係最打擊士氣嘅行為，所以未到最後一刻，公司寧願要員工放大假，都唔會直接就炒人。公司炒人，輕則令士氣低落，重則火燒連環船，即有大量員工短時間內辭職。就好似學生剛開始集會時，政府一下子就出催淚彈，結果反而引起全港市民質疑政府做法，令原本只佔領中環，最後郤擴散到旺角、銅鑼灣和尖沙咀。

4. 警方不執法，老闆有偏見
作為老闆，好多時要處理員工之間不同意見。如果一直不正視，就會令公司內部產生矛盾，工作混亂。如果處理時稍有偏頗，必然引起更大矛盾。所以處理不同意見時，必須公正客觀，唔好因為職位高低或親疏有別而有所保留，如果唔係，員工好難會再相信老闆。如果好似最近旺角街頭示威咁，警察放過打人者和非禮者，引起公眾懷疑警方執法有政治立場，咁以後就好難再得到公眾支持同信任。

佔中現場所見所聞

曾幾何時，我以為今次佔中行動會好似之前咁，玩一兩日就會完。通一晚頂，好多人都仲頂得順，但兩晚三晚就好難講，最後集會人數就會大幅減少，然後自動散去。但過左兩晚之後，人數的確有減少過，但總會有人補上，令人數回升。我相信原因在於警察施放催淚彈，激發家中市民一齊支持示威者。而最始料不及嘅係，呢頭放完催淚彈，嗰頭就比人佔領旺角同埋銅鑼灣。

我其實唔太支持佔領地點太多。今次佔領中環行動其實目的係想表達真普選嘅訴求，而並非以民為敵。所以當知道尖沙咀被佔領，上水同元朗亦有人想佔領，我反而覺得佔領目的有點變質。我唔知道係咪有人打算騎劫佔中行動，定係有人搧風點火，令集會者與巿民發生沖突，使政府出師有名。我只知道佔中發起人叫人守護主要佔領地點係正確做法，至少要搞清楚佔領上水元朗並非佢地行動一部份。

佔領行動過左咁多日，常然會有巿民反對，但最估唔到係梁振英會企得咁硬，連坐低傾嘅機會都唔比，拖得就拖。我相信佢其實係等冇出黎集會嘅巿民慢慢醞釀反對佔中聲音，到時聲音夠大，佔中行動就不攻自破。而為左加速呢個過程，好多打手已經做緊野。例如喺網絡上製造假消息，打上電台講假故事，甚至斷章取義咁將集會人仕描繪成暴民。

我同意十幾萬集會人仕中，唔會個個都係高質素，梗會有少數人係害群之馬。只有去過現場嘅人先會明白集會嘅人係咩人，佢地喺度做緊乜野。嗰種守望相助，和諧嘅氣氛，我真係唔知邊度先會見到。可以肯定嘅係，大家心裡面都有同一理念，同一種感動，先會創造到咁嘅氣氛。

今日，我黎到金鐘政府總部門外，我見到公民廣場已經唔再開放比公眾集會，對我黎講，就代表民主已經消失，而且被冷冰冰嘅鐵欄圍住，而鎖匙就喺強權政府手上。回想當日因推翻國民教育而於公民廣場靜坐，呢個情景，我諗好難再出現。

今日所見所聞，再一次感動我。唔係因為佢地做左D咩，而係因為佢地呢種和平氣氛，令人覺不自覺地主動去幫手，令人好想保護佢地。

試問誰還未發聲

2014年9月28日佔領中環行動正式啟動。隨之而來o既係一批又一批o既市民響應公民抗命，上街示威。本來佔中行動只集中o係政府總部門口進行，但政府出動催淚彈，激發其他市民參與佔中，而且擴散到旺角和銅鑼灣。

今日係9月30日，市民仍然留守於金鐘、旺角和銅鑼灣，雖然人數曾減少，但似乎未有散去迹像。

佔中由學生開始，而我地呢D上班族，其實對整件事又有咩睇法呢？講真，我身邊o既同事朋友都好關心成件事，有D仲有親身到場聲援。

有護士朋友甚至到集會場地救護站當值。

另外有一位老師朋友亦有到場聲援學生們。

雖然睇黎好似一面倒，排山倒海咁講示威者係手無寸鐵，和平理性，但其實亦有人覺得警察都係人，示威者都有傷害警察。

每一次睇到朋友們o係現場所見所聞，總覺得好心翕。香港人今日真係好團結，唔單止因為有好多人主動走出黎聲援，仲有好多人捐出物資，甚至無條件為集會人仕服務。

其實，政府我地為乜而咁做？今次集會聲勢咁浩大，就係因為中央落閘，香港只有假普選，以後香港人只能選爛燈爛蘋果。只要稍為有遠見o既香港人都會明白，今次決定如果我地唔推翻，香港就永遠冇機會再有民主，而只會好似大陸咁，乜都係中央控制。香港人將會失去自由。

睇到以上呢句說話，我只能說：小朋友，你大個左就會後悔架喇。

如果今日唔出聲的話，聽日就唔會只係催淚彈。

管理(9) - Z世代兩面睇

所謂Z世代即係90後，一講呢個話題，真係十日十夜都講唔晒，好多高管都牙痛咁聲添。其實呢班後生仔係咪真係咁差？

先睇一睇新聞點講：


返工求樂趣 新世代考起管理層
專家：宜放下身段 由欣賞聆聽做起


「返工有咩樂趣？」、「你會怎樣栽培我？」新世代工作不止講金，更追求趣味性及工作前景，期望僱主似師父般栽培。

不少管理層面對新世代的要求與提問，會感到招架無從，企業培訓專家拆解管理層被問至「口啞啞」三大問題，建議僱主宜放低身段，平日由欣賞、聆聽、分享個人經驗做起，增加員工歸屬感及工作熱誠。

Z世代相繼投入職場、與Y世代接棒，成為職場新力軍。聖雅各福群會企業培訓服務總監司徒翠兒（Rowena）表示，新世代的學習與成長環境，與上一輩大不相同，如何管理新世代成為管理層的必修課。

男友生日 新世代不想上班

Rowena指出，新世代學習時不單以背誦為主，亦重視批判式思考，較能舉一反三；加上情感教育，易於表達個人想法及情感，對既有做法，亦敢於反問「為甚麼要這樣做？」對成長環境較「中規中矩」的上一輩管理層而言，新世代被視為挑戰權威及不順服。

曾有新世代員工向僱主直言「男朋友生日不想上班」，Rowena表示他們只是表達其看法、而非挑戰權威，笑言愈來愈多管理層「看化」，會思考公司規則是否「不可攻破」，會否有微調空間。

她建議，管理層宜放下身段，與新世代員工設立溝通的緩衝區，並非強行要另一方妥協、又或將個人價值觀強加對方，而是聆聽、了解想法及困難；例如若不影響公司運作，同事間又可互相補位，可否容許員工放假。

面對敢言新世代，Rowena例出三大管理層常被問至「口啞啞」問題，指出管理層常犯錯誤，並提供拆招方法。

問題一：「點解又係我？」

管理層常見回應：「你醒，學多點東西幾好！」

錯誤：管理層回應會令同事認為，上司為求『氹』我做事，才聲稱可以學多點東西及稱讚我，為免太多工作，下次應『扮蠢』。

拆招：應從平日開始學習讚賞員工，避免口號式的讚賞，如「OK」、「幾好」，應具體指出同事做得好的地方；若遇上「讚唔落口」的情況，可學習肯定同事所付出的時間、心機，然後再指出可進步地方，讓員工在平時已感受到管理層有心栽培及培訓他們，而非要求做事時才讚賞。

問題二：「你會怎樣栽培我？」

管理層常見回應：「請你回來是為了做事，而不是栽培你！」

錯誤：上一輩管理層或帶着心魔，認為新世代「無大無細」、很功利，只會想到有甚麼可以學，希望從公司拎取多於貢獻。

拆招：新世代工作並非單求「三餐温飽」，多考慮個人發展、工作前景，若管理層能了解新世代所關注的事情，以自身經驗分享，指出他們可成長的地方，提升他們做事方法；部分公司或會為每位同事訂下基本發展的計劃，讓同事感到被重視，有助提升他們對工作的歸屬感。

問題三：「返工有咩樂趣？」

管理層常見回應：「係咁喇」、「幾好呀，可以對着客人好開心。」

錯誤：上一輩管理層工作為了謀生，甚少把「興趣」及「工作」二字連在一起，認為「興趣」應於放工後尋找，間接傳遞出「工作就是無趣」的想法予下屬。

拆招：新世代重視工作的意義及趣味性，管理層可幫助員工明白公司的理念，讓員工了解其工作崗位的意義，增加其工作熱誠。
原文：2014年9月17日經濟日報

先唔講上司下屬問題，宏觀少少黎講，而家D後生仔，同以前o既後生仔唔同係非常正常。

以前D人係比人話政治冷感，成個社會對政治議題都冇乜興趣，投票率又低。但諗深一層，以常社會仲未係知識型社會，好多時都係靠勞力搵食，電腦仲未出現，最方便o既通訊方法都只係撥輪式電話。所以當時o既後生仔都係專注於點樣搵食，目的只係生存，只係為左滿足「生物邏輯層」(請自行參考殷海光o既<人生的意義>)，而唔係為發達。淨係要達到呢個目的，已經令當時o既後生仔吃唔少苦頭，打咩工都好，做錯野比老細鬧就一定，唔郁手郁腳已經好幸運。

到左今時今日，社會高度發展，後生仔學歷高，三餐溫飽已經唔成問題，所以佢地開始留意「生物文化層」，甚至「價值層」。Z世代出生成長o既環境明顯比上一代好，所以佢地追求滿足「生物文化層」，例如電子產品，衣著等方面都會有所要求，結果就產生潮流。另一個例子係，佢地會對冇文化o既人特別反感，就好似有人o既街邊大小便咁，佢地就會拍片影相，放上facebook不停鬧，原因係佢地對自身同環境都已經好有要求，見到有D違反要求o既事物就會排斥。但上一代人其實對呢方面冇咁高要求，亦相信佢地唔少都試過隨街小便，由此可以想像兩代人思想差異之大。近幾年，Z世代開始留意時事，留意政府政策對自身環境o既影響，可見佢地已經希望滿足「價值層」中o既真善美。例如國民教育事件，香港電視發牌事件等，都可以睇得出。

講返上一代人做上司，呢一代人做下屬o既問題。下屬返工求樂趣，其實正常不過，因為佢地有好多選擇，唔打東家可以打西家，既然有得揀，點解要打份悶工？又或者，好似上面報道提到，男友生日，唔想返工，真係會對公司咁大影響？作為上司，如果食古不化，只一直沿用以前o既做事方式，只會令下屬反感。我講緊o既，唔係單單一兩個下屬，而係成個世代。就算比你炒晒佢地，新請返黎o既人都一樣會有相類似要求。

當然，上司對下屬有要求係冇錯o既，請得你返黎，梗係要做野啦，下下話要樂趣，唔想返工，咁請你返黎做乜？所以作為下屬，有時亦要知道上司o既要求，唔好太過火。

不過講到尾，最重要都係溝通。兩代人o既認知相差咁遠，只會產生矛盾，呢個社會已經係咁，你都唔想你公司內部都係咁掛？

管理(8) - 90後

90後經常被標簽為難以管理，而且比多D人工都冇辦法令佢地聽話，到底點先可以有效管理呢一班年青員工呢？

今日報紙就有報道相關話題，先睇一睇王維基點講：

王維基揭秘 用「理想」得人心
激勵年輕下屬 基層應徵者加分


香港電視（01137）主席王維基直言自己是「大賤人」，開會時常說粗口，可是由以往香港寬頻到現在香港電視，都有員工忠心追隨。

王維基自揭得人心之秘，是給下屬空間發揮，用「理想」打動，尤其是30歲以下的一群；招聘時亦不看成績，若有兩個條件相若的應徵者，出身公屋的人會較中產子女多拿半分。

王維基早前應香港人力資源管理學會邀請，分享如何靠人心得天下，有人問他怎樣「manage（管理）people」，他立即糾正應是「motivate（激勵）people」，上司的責任是激勵下屬做事，而不是管理他們。「我覺得，要用盡一個人，那人必定要有理想，因為理想是一個人做事的最大推動。」他2006年曾聘心理輔導治療師為員工尋找理想，即使不少人因而離職追夢，他仍沒後悔。

指父母太愛惜小孩 種禍根

他指出，隨社會變得富裕，很多30歲以下的小朋友都有點錢，相比多付2,000、3,000元，談高層次點的理想，且帶頭付諸實行，對方會更受落。「我們為何要做（維基）商場、做香港電視？我們跟同事說，其實未來10年香港人會愈來愈不開心，你會愈來愈發覺被人控制。」

一位女士吐苦水說很多人「高分低能」，有許多EQ問題，她照顧的幾個Management Trainee優秀、有效率，但情緒態度令她頭痛，王維基回應是父母種下很多禍，因為太愛惜、太保護小朋友，完全不想他們經歷挫折。

他直言：「我現在好憎到中大及港大演講，學生的眼神顯得比王維基還自大，我更偏好去嶺南、浸會、樹仁和IVE。我在IVE講3小時，一個電話都沒響起，有同學更因（場地）爆滿企足3小時。」他不諱言，若有兩個條件相若的應徵者，出身公屋的人會多拿半分。「我預期他在經濟、家庭轉變上會有更多挑戰。當一出生就住在羅便臣道，一直到20歲，你想想他會是甚麼人？」

放權下屬 闖禍後10倍補救

港視有隊由25歲以下小伙子組成的數碼隊伍，去年曾拍下王維基孤獨吃飯的照片，令他看上去像個落寞老人家，並先斬後奏將相片放在Facebook，但王維基沒干涉，結果吸引逾6,000人讚好。他分享時承認，這批小伙子人工低，肯留下是因覺得受尊重，且有伴隨而來的權力，做事很「過癮」。

香港寬頻現任CEO楊主光2006年大手購入3,000部仍未竄紅的三星智能手機，深知iPhone才是「王道」的王維基力勸不果後，決定放手讓對方「撞板」。按每部成本3,000、4,000元計算，損失料以百萬元計，王卻沒再過問。

「我當然叻，我好叻，但夾硬（向下屬）塞下一條天世好蹺，亦不及你自己想出一條『屎蹺』，因為一個盡忠職守的同事，若知道自己闖了禍，將以10倍力去補救，把事情做好。」

天天寫專欄 增員工凝聚力

王維基說自己視員工為兒女，又認為朝夕相對，人心根本不能騙過來。「其實你的心是如何，周圍的人會感覺得到，人與人的相處不止靠把口。」香港寬頻2009年與威爾斯大學在港合辦課程，給俗稱「街霸」的員工及裝機師傅攻讀，結果38人取得學位，王指有效不止在這38人，「而是另外3,800人，有感受：自己是否停滯在人生這個階段？」

王稱，曾有員工說他創立的香港寬頻像「魔教」，他是「教主」，而現時無論多忙，都要每天給《經濟日報》及《晴報》寫專欄，就是為了把思想寫出來，好讓員工看到清晰「教義」，增加凝聚力。

知恥近乎勇 態度更勝技能

當現場聽眾問人事部能否協助培育人才時，王維基認為須找出誰有羞恥心，因為它能使人改善。他指，態度更勝一切，故招聘時不甚看重成績，認為知識、技能、思考速度等皆可在入職後訓練。由於人力資源管理部（HR）手握公司的首輪面試權，其篩選喜好能影響整家公司組成，故堪稱最重要一環。「好多年前我讀EMBA時已說，CHO（人力資源總監）比CFO（財務總監）更重要，我說完這句話後，我當年的CFO（Corinna Sio，蕭詠筠）立刻辭職去美國讀人力資源。」

王維基向現場的人力資源專才說，若老闆是50、60歲的華人，對方大概仍會手握大權，小至更換廁紙或膠紙的品牌都要過問，因他自問當年也是這樣。「當老闆說全公司的膠紙都要用3M的話，哪有人敢動或挑戰他？」

他坦言，老闆經常自以為比下屬出色，視對方的進言為聒噪的雜音，故建議打工仔改方法，可送些有意思的書籍或推介電影。「別說我們做老闆，就算我的兒女亦不會聽，我都是送書給他們。」

原文：2014年9月8日經濟日報

王維基o既觀點，我有大部份都認同。

新一代年青人其實比較有理想，小弟認為係源於香港社會轉變，由勞動社會變為知識型社會，腦袋比肌肉更重要。於此環境長大o既90後，就會受到各方面o既思想勳陶，令其言行皆理想化。而且，因為呢一代人教育水平比上一代高，長大過程中必然會發現自己識得多過父母或其他長輩，然後就會開始偏向相信自己多於相信其他人。所以當佢地出黎社會工作，好多時都會表現得非常自我，而且會重視表達空間同埋發揮o既機會多於金錢利益。

要管理佢地，最好o既方法就係等佢地自己撞板，佢地撞過板，就會長大，就會明白其他人o既論點。相反，過份死板、高壓o既管治，只會激發佢地o既反抗心態，員工流失率自然會居高不下。

但係，小弟唔太認同王維基偏愛基層子女o既做法。小弟認為一個成功o既團隊必須多元化。港大中大等比較出名o既大學，學生們o既眼神自大，其實一D都唔出奇。先唔討論佢地係咪真係自大，就算佢地係自大，我覺得都有佢地o既理由。精英中o既精英必然對自身能力有所認知，佢地知道自己比好多其他人優勝，所以佢地有理由去自大。但如果公司招聘時，剔除呢班自大狂妄o既精英，又係咪好事呢？王維基都認為自己係一個自大o既人，點解佢公司就容不下其他自大o既員工呢？多元化團隊可以創造無限可能，自大o既人亦可以激發其他人o既想像空間，就算brain storming時討論如何激烈，最終結果比起互相禮讓必然非常不同。

管理(7) - 團隊氣氛

作為團隊領袖，其中一樣必須要o既技能就係要對團隊氣氛非常敏感。好o既領袖，唔單止要聞得出氣氛，仲要有能力去控制團隊氣氛。尤其當領導者被空降到一個團隊裡面，唔知道當前氣氛的話，只會被團隊排斥。

團隊組合其實都有好多種，但可以以團隊氣氛總括為以下三種：

1. 嚴肅
好多傳統型公司都會嚴肅管理，你會feel到老板大晒o既氣氛，身邊週圍o既同事每日咀邊都會掛住老板話點點點，老板唔鐘意人地點點點。每日返到公司，都會因為呢種氣氛而精神緊張，誇張D黎講，你直頭會feel到呢種氣氛係由老板間房散發出黎，然後飄到每個部門。
o係呢種氣氛之下，每個同事必須嚴格尊守公司policy，如果違反policy，就會遭到處分，冇情講。所以員工唔會有機會偷懶，當然亦唔會有機會創新。
咁樣o既公司，好處係，當老板係強勢到足以獨力掌握業務方向，咁員工就成為直正o既手手腳腳。而公司o既業務成果亦可以證明老板o既能力，從而令員工敬佩老板能力。
但如果老板能力不足，或業務上做錯決定，就會令員工認為老板指揮無能，揸住雞毛當令箭，最後導至員工加速流失。


2. 輕鬆
Startup公司或小型公司多數會比較寬鬆，因為咁樣o既氣氛下先會容易產生創造力，而對細公司而言，創造力往往就係成敗關鍵。
輕鬆團隊氣氛需要某程度上o既制度支援，如果太流於表面，實際上一放鬆就會比人話，咁就會有反效果。
輕鬆當然有輕鬆好，但唔係個個領導者都可以見到員工做工作以外o既野而視而不見，所以領導者本身必須透切了解團隊氣氛意義。要發揮員工o既潛能，亦唔係一朝一夕可以做到，所以長期寬鬆亦需預計有巨大成本。

3. 中庸之道
中國人最鐘意中庸之道，對於極端方法好多時都避之則吉，所以有D公司會時而輕鬆，時而嚴肅。如果做得好o既話，的確可以互補不足，將嚴肅時o既緊張氣氛緩和一下，但又不至於令團隊過份放鬆。不過，其實團隊氣氛經常改變對成個團隊唔一定會好，更多時候反而會增加管理難度，因為員工會以為領導者經常反覆無常，連自己都唔知自己做緊乜。所以，領導者本身能力好重要，需要非常好o既表達能力，以免發出錯誤訊息，同時亦要有非常清晰o既頭腦，可以判斷員工對自己有否誤解。

IT如何入行(5) - Apply邊份工好?

無論係啱啱畢業出黎搵野做，定係做左好多年野想轉工，啱啱開始搵工時都會有個疑問：呢份工幾好，好唔好apply呢？嗰份工睇落都唔錯，好唔好試下呢？

最近IT百花齊放，好多IT公司都請人，好多非IT為主o既公司都開始重視IT，所以市場上o既IT工真係唔少。搵緊工o既朋友好多時就會一邊睇job ad，一邊心郁郁，唔知好唔好apply。到真係想apply咩，又會驚呢樣驚嗰樣，最終未必會apply，所以好多時都係得個睇字，遲遲唔敢出手。咁其實點樣決定邊份工應該apply，邊份工唔應該apply呢？

答案因人而異。

如果你係啱啱讀完書想搵工o既話，唔洗諗，只要稍為有興趣o既工都應該apply。原因係，一個職場新手，淨係靠job ad去了解一份工啱唔啱自己係絕對唔夠，好多時睇完個job ad都唔知實際上係做乜，點做，更加唔會知道份工係咪好工。所以，唯一方法就係親身去試，做過就會知好唔好。

好多人以為probation period係用黎比公司「試用」candidate，但其實所謂「試用」係雙方面o既。如果candidate覺得間公司唔啱自己，試用期完結前其實可以繼續搵工，就當冇做過一樣，將來寫CV亦唔需要寫呢份工。

Apply多幾份工，亦都可以磨揀寫cover letter同CV o既技巧，如果有interview機會，就算成功定失敗，你都會得到interview經驗。就算第一次唔得，第二次都唔得，只要你不停去試，每一次都吸收經驗，唔好怕失敗，到最後一定會成功。

對於已經工作多年o既你，我相信你只要睇下job ad，望下間公司o既website，就會大概知道係咪你想要o既野。由於你每一次interview都需要請假，請假請得太密會令上司對你印象變差，為左防止未搵到馬之前就冇左隻象，每次apply一份工都要諗清楚係咪自己想要o既野。當然，都係嗰句，一日未做過都唔知份工好唔好，所以要憑經驗去考慮。

不過，我都會建議你唔好只係apply一份工然後等消息，最好apply多幾份工。因為如果對某一份工期望太高，當等左一兩個月都冇消息時，就會開始失望，然後會以為自己o係市場上冇乜價值，下一次再apply時就會轉而搵低職位低薪金o既工作。如果再失望多幾次，就會好難重拾自信。到最後就算比你轉到工，份工一定比你希望得到o既工作更差，咁你好快又會再轉工，慢慢變成一個惡性循環。

其實，無論你係邊類人，有時間的話都應該apply下出面o既工作，一來可以keep住自己o既interviewing skills，二來可以update下自己對個market o既認識。有何不可？

IT如何入行(4) - 搵「筍工」

想入行做IT，搵工當然好少會拎住份報紙左搵右搵。其實而家呢個年代，就算唔係IT工，都好少人o係報紙搵工喇，而係o係網上面搵。只要o係google度search "job"，就會搵到各大搵工網站：JobsDB, CTgoodjobs, JobMarket, Recruit, etc.

但你又知唔知，原來你見到o既job ad，未必真有其工。

市場上有好多Recruitment Agent o係網站上post一D好吸引o既筍工，所佔job ad數量大概係50%，有時可以去到80%job ad都係agent工。根據經驗，當你send左CV比個agent，想apply某份筍工後，佢地就會打黎約你去｢見工｣。所謂見工，其實係上去agent公司見一見面，比佢睇下你係咩人，了解下你想搵咩工，然後就會話你apply o個份工唔啱你skillset，或者已經請左人，又或者話會幫你試下，但又問你會唔會試下其他公司o既工。到最後，你都係唔會做到你當初見到o個份筍工。到你試左幾次之後，你就會醒覺，其實佢post出黎o既job ad，只係用黎引你上釣。佢地o既目的只係拎你CV，去幫你apply其他工作。

不過，我唔敢話所有筍工都係假野，而事實上亦都聽講過有人經agent搵到唔錯o既工。但以我經驗，agent搵比我o既工，遠比我自己搵o既工差。所以試左幾次之後，我就決定唔再叫agent幫我搵工。



如果你唔想浪費時間o既話，就要識得分辨邊D係agent工，邊D係顧主直接post出黎o既工。

有幾樣野特點可以分辨到邊D係agent工：

1. 通常agent都會講明"our client"係乜乜公司，想請咩人，咁你見到呢兩隻字就知咩意思喇。

2. 有D agent公司會寫得更加模糊，只係寫「有間乜乜公司」想請咩人，咁即係唔係佢呢間公司直接請人。

3. 以上兩樣情況都已經叫做講左唔係自己請呢個位，但有D公司直接話個post係要做D咩，唔講係咪自己請定client請定有間公司請。呢D情況就要睇下間公司乜料。

其實要分係咪agent工唔難，只要搵到key word就可以。至於係咪經agent搵工，呢個決定就見人見志，我就已經唔想再理D agent。佢地隔幾個月就叫我上去佢公司in一次，間唔中又打黎叫我比份CV佢地update返，煩都煩死，但又唔見有好工介紹，即係其實佢地拎我份CV去賣，我唔想浪費自己時間去幫人地賺錢囉。

管理(6) - Think to Survive

大家都知道，Apple同Samsung一直鬥得難分難解，世界各地都不停打官師。有人覺得Apple好，有人覺得Samsung好，但不久之前，Samsung仲係比人話完全抄足Apple，無論係手機嘅外表定係UI嘅design都非常相似。

我記得我用Samsung Galaxy S （第一代）係要5千幾蚊，而無論手感，performance同user experience都極差，所以一開始係冇人睇好Samsung。而Apple為左打擊呢個競爭對手，一直不停打壓Samsung，除左透過廣告冷嘲熱諷之外，仲o係世界各地提出指控，話Samsung侵犯專利。說穿了，目的只有一個，就係要令Samsung貨品唔能夠推出市面，令龔斷局面持續。

Apple o既一連串動作，當然會令人質疑Samsung係抄襲，但同時亦都間接幫Samsung做宣傳。原本唔識Samsung o既人都會想知Samsung有乜咁巴閉，要Apple勞師動眾去打壓。

好幾個國家判Samsung抄襲，當然會令Samsung蒙上Copycat o既污名，但事情發展又估唔到會咁出人意表。

o係澳洲，Apple亦有指控Samsung抄襲，要求禁止Samsung出售旗下產品，但最後，指控竟然被推翻，令Samsung在當地合法銷售手機同Tablet。而最精彩o既係，Samsung o係當地刋登全版廣告，title係"The tablet Apple tried to stop."

到今日，Samsung同Apple之爭仲未有結果，而呢個故事帶出一個重點：有時被對手迫到入牆角，並不代表唔能夠翻身，只要動一動腦筋，要生存落去並非難事。

IT如何入行(3) - 心理準備

IT曾經有一段好長嘅時間被世人認為係水泡。讀唔成書？唔緊要，可以做IT。唔知由幾時開始，人人都覺得做IT好易，早幾年，仲好多人話：「我好鐘意打機架，寫game啱晒我。」而近幾年，仲越來越多人話：「我有個idea，我地可以寫個app，賺大錢。」

係咪「鐘意打機」或者「有個idea」就可以喺IT界發圍賺大錢呢？相信任何一個IT人都會話你知，「你發緊夢」。

入行做IT，第一個心理準備就係，唔好諗住賺大錢。如果想賺大錢，好多其他行業比IT有更好o既機會。就好似做地產經紀咁，入行要求唔高，主要靠運同埋靠把口，唔需要讀好多書，只要你搵到一兩個炒客，咁就隨時發過豬頭。雖然而家做地產經紀比以前難，競爭大好多，但係搵大錢o既機會仍然比做IT高好多。以我自己為例，當年入行IT，月薪不足一萬，有好幾年都要節衣縮食。扣埋每季還學費，每月比屋企人家用，其實真係儲唔到錢。買樓呢D只能係夢想。

近日睇到呢單新聞，真係現實寫照。唔少IT人做左好多年都冇能力買樓，更甚者，將所有青春投放入工作，令自己性格變得越來越內向，變成宅男毒男。到年紀有返咁上下先發覺又冇女又冇樓，人身好似冇乜意義咁。

不過，近呢幾年情況好好多，fresh grad入職都有13k到15k，好多公司都開始重視IT，雖然老一輩仍然唔知IT係咩黎，但IT界整體氣氛已經好好多。但如果諗住做多幾年就有30-40k，咁就真係諗多左喇。


第二個心理準備係，如果你入行做IT，唔好以為可以唔洗識英文，相反，你要用大量英文。基本上，IT界所有terms都係用英文，九成九都唔會有中文翻譯。如果你係programmer，就更需要有好英文，因為寫program原本就係打一大堆英文字，一個小小o既program就已經要上千行code。而且好多programming languages o既documentation都係要自己google搵，其中大部份都係英文，唔識英文就會失去自學能力，基本上冇可能自己解決問題，更加唔會有機會學到新野。

第三個心理準備係，唔好諗住做IT係好似打機咁好玩。打機同寫game係兩回事，打機係玩，寫game係工作。寫program最基本係要有logical mind，要扮電腦去諗野。做IT support亦都要去理解唔同o既network device o既運作，個network點拆都好講究，仲要manage好多機同permission。

其實做IT，最緊要有熱誠，你要有心理準備，如果熱誠不足，講真，好難做得長。做得三五七年，你就會發覺身邊D朋友個個升職加薪，自己仍然得嗰雞碎咁多，而且開口埋口都係IT野，女仔都唔鐘意你咁悶，仲有，D朋友搵親你，多數都係問你中左毒點算。到呢個時候，你就會開始懷疑自己有冇入錯行。當然，現實世界都有唔少exceptional case，不過你有冇信心成為其中一個呢。

IT如何入行(2) - 入行條件

想入行做IT o既朋友，第一個問題一定係：「要識D咩先可以入行呢？」講真，唔係嚇你，做IT其實同做超人差唔多，去jobsDB望一望IT工嘅job description就知，間間公司都想請超人。要識嘅野多到嚇死你。

舉個例，IT Support需要非常廣泛o既知識，又要經常update市場上新出o既軟件硬件o既知識，又要托得起server機，仲要經常同vendor吹水，所以做IT Support一D都唔容易。但係，唔知咩係IT o既人，經常以為IT Support請返黎就係service佢地，會呼呼喝喝，所以做IT Support亦都要好高EQ。

先講IT行業最多人有嘅野學歷。其實無論係唔係做IT都好，大學生己經通街都係。而IT行業，最近幾年己經係碩士滿天飛。好多都係喺大學讀埋個MPhil先出黎做野，而更多嘅係出黎做左幾年野，自知競爭激烈而進修碩士學位。所以，一般IT公司嘅學歷比例多數係一半碩士，一半學士。如果連學士都冇，咁要入行就難上加難。

不過，無論學歷幾高，都總有人係拎住張沙紙就以為可以呃飯食。事實上，就算你有學歷，要順利通過interview係一D都唔容易。CV要寫得靚，最好有埋Cover Letter，仲要識面試技巧。好多時仲有筆試，有時要即場比電腦你寫code，更多時淨係比幾張紙你就要寫code。test paper由十幾頁到幾十頁都有，interview由一小時到五六小時都有，小弟試過最短嘅interview係半個鐘，最長係五個鐘。想知更多關於interview嘅野，可以參考IT interview系列：


IT interview (9) - Cover Letter

IT interview (8) - CV

IT interview (7) - 你in我時我in你

IT interview (6) - Q&A

IT interview (5)

IT interview (4)

IT interview (3)

IT interview (2)

IT interview

不過講到尾，想入行做IT人，當然要腦筋好，轉數快，最重要係EQ高，如果唔係點樣解決排山倒海嘅adhoc request嘅同時仲保持到唔發老脾。另外仲要學野快，因為IT真係日新月異，基本上每一日都要update自己，隔左一排唔update就好難追返架喇。英文千萬唔好太差，一日send幾十封email係好普通嘅事，而且全部英文，唔好以為英文差做IT就ok，我擔保你一定好痛苦。近年普通話同殘體字都一樣咁重要，呢樣真係唔知你點學返黎，自己諗掂佢。

咁幾時先係入行好時機呢？喺2001年科網股爆破，再加上2003年沙士後，IT一直都係一工難求，導致大量畢業生對前景唔樂觀而轉行。但係到左十幾年之後嘅今日，就係因為當年冇人肯入行，結果令到IT界人才極度短缺，十年以上經驗嘅IT人就更加係買少見少。所以如果想入行嘅話，而家就係時候喇。

管理(5) - Micromanagement

老細都分好多種類，有D就成日唔見人，一見人就開會。有D就日日駐守o係公司，但好明顯係做自己野多過公司野。仲有一種係日日都好緊張公司o既業務，不停召喚部門主管入房傾野。將呢種緊張情緒發揮到極致o既時候，就會出現「微管理」- micromanagement。

咁到底微管理係咩黎？係好定唔好呢？

微管理，簡單黎講即係咩都管，連一D好細微o既野都要管。

舉個真實例子，有一位老細，佢請左一班developer去寫一套system出黎。佢提出一連串o既要求，要呢班developer去實現出黎，大家開頭都覺得冇乜問題。但慢慢傾落，佢地開始覺得奇怪。點解個老細連佢地寫幾多行code都要計過度過？仲話寫多個loop都要攞出黎傾？有一次，老話如果用if，個program會行慢左，要佢地諗下點樣唔用if都可以做到佢想做o既野。如果你係developer，應該會覺得老細唔單止要求得太多，仲要連D好細微o既野都要管。

另一個真實例子，某集團主席每星期要同Marketing同事開三次會，去傾廣告內容細節。Marketing team已經有最少兩位designer，每日設計不同廣告。主席每次開會都會挑剔文字內容，圖案，顏色，字體，大細等。如果你係designer，應該會覺得自己o既存在冇乜價值，叫主席自己去設計好過。

再一個真實例子，Steve Jobs曾經為左迫工程師團隊將ipod造得更細，將prototype放入魚缸入面，用升上水面o既氣泡去證實ipod仍然係太大。如果你係工程師，應該會覺得佢係吹毛求疵。

咁到底，佢地咁做係啱定唔啱，好定唔好呢？

如果你問佢地點解會咁做，佢地可能會答你：
1. 因為我唔相信任何人可以做得比我自己更好。
2. 因為我對我希望做o既野非常有熱誠，所以我渴望做得更好。
3. 因為我清楚知道整個業務應該點行，為左唔好行錯路，我要以行動黎支持業務方向。

同樣都係微管理，可以有非常唔同o既動機，亦有非常唔同o既效果。微管理其實只係一種管理方式，係一種工具，管理者可以選擇用或唔用，或用o係邊度。而任何一個管理課程都會鼓勵選擇性使用微管理。而key point係，你要插手某方面的話，你一定要係此方面o既專家。

雖然Steve Jobs會插手於所有產品設計，但佢甚少理會財務同營運o既野。而好明顯Steve Jobs選擇得啱，因為佢精於將好o既設計變得更好，並且商業化，將唔好o既野拎走。而結果顯示，無論Steve Jobs去到邊(Apple或Pixar)，都可以做出受歡迎產品。

而「主席」，佢當然唔係Marketing或Design方面o既expert，所以結果係Marketing Team差不多每個月都換9成血。一team10個人，可以有9人o係同一個月resign，而且差不多每個月都發生。而同樣事情(微管理同埋換9成血)亦發生o係Finance team同Accounting team。

雖然「老細」係IT o既專家，但只限於細project。做大project，佢真係有心無力，結果係點，應該唔難預測。

IT如何入行(1) - IT係乜東東?

近呢一兩年，IT熱潮又黎料，唔單止科網股被炒起，連報讀IT相關課程o既人都增加唔少。好多人對IT非常好奇，覺得D野好新奇刺激，亦對IT行業有無限o既幻想，以為做IT同打機一樣咁好玩。我相信，好多人連IT係乜都唔知就話對IT有興趣，仲口聲聲話想入行添。所以今次就寫返個IT如何入行系列講講呢個話題。

IT界o既範圍其實非常大，而且有好多灰色地帶。簡單分類的話，IT主要可以分為以下幾類人：

1. Programmer / Software Engineer / Software Developer

2. System Administrator / System Support / IT Support / System Engineer / Infrastructure Engineer

3. Business Analyst / Project Officer / Project Manager

4. Technical Account Manager / Technical Sales

5. Quality Assurance Engineer / Software Tester
6. Database Administrator

第一類人統稱為Programmer，主要工作係寫program，即係「揼code」。Programmer通常只會專於一兩種programming language，例如C++，Java，C#呢D都係比較大路。冷門/專門少少o既language有Python，Cobol，Tcl，Delphi。而Programmer通常都會再細分幾類，例如Web Programmer會專門寫Web Application，仲有UI/UX Designer，雖然叫Designer，但好多時都係Programmer黎，會專門寫User Interface，執靚個介面比人睇。仲有一類係專寫server side application，通常最覆雜o既business logic都會集中o係呢度。

第二類人統稱為IT Support，九成公司都會有一兩個IT Support，主要係setup成個network，common drive，printer，甚至電話系統，仲要負責買電腦，network equipment，software license。如果間公司係做D mission critical o既business，例如股票交易系統，咁好多時IT Support都要通頂去deploy system。如果要搬office，通常最多野做o既都係IT Support。

第三類人係Business Analyst，主要係負責將business requirement寫成一D IT人先睇得明o既文件，方便IT人同非IT人溝通。事實上，IT人有自己o既document format，仲有不同o既diagram去記低network structure，system architecture等。通常非IT人睇完都唔知D咁專業o既圖/doc講乜。

第四類人係Technical Sales，通常只會出現o係vendor公司。由於佢地要幫間公司賣IT product，所以佢地除左要把口了得之外，都要具備technical knowledge。

第五類係QA，主要係做測試，用盡所有方法去令D system出事，從而令quality提升，通常大公司先會有。細公司通常都會由programmer自己做埋testing，所以呢類人係比較少。

第六類係DBA，主要係睇住D database，manage user access rights，fine tune database performance等。通常只有用Oracle o既大公司先會有DBA因為只有Oracle先會難用到需要有專人照顧。

除左以上六類IT人之外，其實仲有好多唔知算唔算IT人o既工種，例如上門幫你裝寬頻o既師傅，佢地可能會claim自己係IT人，但佢所做o既野，可能只係IT Support 工作內容o既一小部份。OK，就當佢地係IT人，咁腦場賣電腦/幫人砌機o既人呢？佢地可能又會claim自己係IT人，但我覺得如果佢地都係，咁半個深水埗o既人都係IT人。。。

其實IT係一個非常專業o既area，因為IT知識並非睇下書，唔洗郁手就識。冇返三五七年，想學IT野，只能掂到皮毛。相反，一D聽落好專業o既area，例如會計，有時真係求其阿豬阿狗都可以叫自己係做會計囉。

管理(4) - Team Building

咩係Team Building?點解要Team Building?講真，返工放工，日日都係咁做架啦，D員工做到野咪得囉，無端端搞咩Team Building呢?浪費時間，浪費金錢。

冇做過管理o既人同埋大部份做過管理o既人都會有以上o既疑問。佢地睇到o既短期利益，認為o係呢一刻冇問題，將來都唔會無端端有問題。

事實上，隨著時間過去，一定有大大小小o既問題不停浮現，而有D問題其實可以一早避免o既。

Team Building其實一D都唔難，主要係成team人一齊參與某D活動，簡單D o既，可以一齊打下波，大型D o既，可以係參加烹飪班，玩密室逃脫遊戲，一齊去旅行，搞賣物會等，有D公司甚至會花時間去設計特別o既任務比員工去完成。Team Building可以好天馬行空，但無論係搞咩活動，其主旨都係令團隊成員有工作以外o既機會互相交流，互相了解teammate o既性格，特點，背景，甚至平時唔會展視出黎o既一面。

當團隊成員之間加深了解，返到公司工作，整個團隊會運作得更順暢，減少誤會，提高效率。而且，透過不同活動，可以增加員工對公司o既歸屬感，減少員工流失率。我見過流失率最高o既公司，每個月有幾十人辭職，淨係請新人，教新人，都已經花唔少時間同金錢，運作成本就會變得好高。所以Team Building睇落好似淨係玩，但實際上可以公司減低成本，同時增加效率。

管理(3) - Tone of Voice

好多老細，高層，同埋管理人員，都會以為自己高高在上，喺下屬面前鐘意用指令式語句，而且好多時語氣都係非常強硬，唔會留條生路比人行。喺以前嘅社會，個個員工為兩餐，不辭勞苦，上司語氣再重都要頂硬上。但喺今時今日通街大學生，一個招牌跌落黎都可以壓死十幾廿個。咁代表香港係一個知識型社會，事事講道理，下下講理論，唔再好似以前咁，老細講嘅就金科玉律，佢鬧你就一定係你錯。所以鬧慣人嘅老一輩對新一代年青人完全唔識管理，要佢下下就住唔鬧得，一鬧就唔撈，佢地真係唔知點算。最後只能唱衰班新血，話80後90後幾唔掂，幾難教。實際上，問題喺邊呢？

管理學上，說話語氣係非常重要嘅一環。上司同下屬講野，唔一定係命令式。

首先，每一個員工啱啱入職，一定好希望自己得到重視同信任，所以每一次assign工作比佢做，都可以用鄭重嘅語氣同佢講呢個task有幾重要，你相信佢嘅能力所以先交托比佢。事實上，你冇講大話，除非你明知佢一定做唔掂你都叫佢做，咁你就即係玩緊自己。仲有就係，你assign野比佢做，佢係幫你做野，所以記得要講聲「唔該」。

每個員工喺工作上都一定會遇到問題，你係佢上司，佢當然會問你。咁你就千祈唔好沾沾自喜，覺得自己識好多野，然後喺佢面前自吹自擂，講到自己有幾勁，因為佢下次遇到問題就可能寧願自己亂黎都唔會再問你。其實你唔應該擺任何架子，因為工作上應該只對事不對人，你只要清清楚楚講比佢知個問題點解決就ok，順手可以叫佢加油，有咩問題大家再攞出黎討論。久而久之，你會發覺佢對你自然地尊敬起來，因為佢明白到你做佢上司並非只靠運氣。

作為一個上司，好多時都會遇到一D大問題，靠自己一個人未必能夠處得好，呢個時候，你就需要集思廣益，同你嘅團隊商量問題。商量問題時，唔好命令每個人都要比到答案，因為你自己都做唔到，你點可能要求人地做到呢？最緊要係放低身段，將問題嘅來龍去脈講清楚，引導大家去思考。有人能夠提出建議，唔好忘記贊賞一下，你一句「well done」，佢會記住好多年。

管理(2) - Layoff or not

好多公司老闆都以為自己手握生殺大權，鐘意就留你，唔鐘意就裁你，一啲都唔理性。事實上，裁員與否從來都唔係一個容易嘅決定，因為影響之大超乎想像。

有人被裁，無論多與少，對留低嘅員工士氣打擊非常大。佢地唔知裁員計劃幾時會完，亦唔知下一個會唔會係自己。結果，由於員工對未來充滿不確定性，佢地寧願先下手為強，主動出去搵工作，免得自己被裁，劃花份CV。

所以，有員工被裁，會導致其他員工生產力下降，離職員工增加。而公司成本亦因此大增，甚致冇能力完成project或準時出貨比客戶。

如果你以為裁員嘅影響只係去到呢度，咁你就大錯特錯。

由於生產力已經大不如前，公司必須注入新血。但係，請新人其實係一個好花時間嘅過程，可能要用幾個月先請到合適新人。呢啲成本，喺人手緊張嘅情況下，公司仲花唔花得起？

公司內部固然會發生一連串問題，但原來公司之外同時亦可能有大問題產生。

公司裁員消息一出，外界就會對公司盈利能力產生疑問，對公司品牌影響非常大，尤其上市公司。結果，銀行可能會收緊貸款金額或提高利息以對沖相關風險，公司有可能因此而周轉不靈。而客戶群亦因為對你公司貨物品質或服務質素減少信心，而將訂單或外判工作交比其他對手，此消彼長之下，公司競爭力會大大被削弱。

以上影響可能睇落好誇張，如果只裁一兩個員工應該唔會有咁大效果，不過我都會建議你，唔到最後一步都唔好裁員。不過，以HKTV為例，當去到走頭無路，亦冇方法去提高收入，而成本一直高企，最後都只能夠裁員，以保實力。留得青山在，哪怕沒柴燒？

管理(1) - Encouragement

二揀一，你會點揀？

(1) 每年有24,000蚊bonus，但每遲到一次就會o係bonus扣100蚊。
(2) 準時返工一日，就加100蚊bonus。

*假設每個月返20日工，一年剛好240日。

好多公司為左要令員工準時返工，會加入一D policy去令員工自動準時。通常管理層都會好直角地提出減bonus方法，去阻嚇遲到員工，即上面第一選擇。

呢個方法通常都會好快見效，員工為左唔想bonus減少，寧願早半個鐘返公司，食早餐又好，睇新聞又好，總之早到好過遲到。但係，員工同時亦會諗，既然公司要我準時返工，咁我準時放工都好應該啫。所以結果變成少左員工遲到，同時亦少左員工肯OT。長遠而言，公司士氣變差，更多員工離職，換血成本增加，得不償失。

第二個選擇其實同第一選擇所付出o既bonus一樣，如果所有人都唔遲到，同樣都係要每人比24,000蚊一年。但係，效果就好唔同。員工會覺得公司多左個奬勵計劃，對員工好左，員工會有感恩心態，會變得積極左。結果會少左員工遲到，同時亦唔會少左員工OT，反而員工會變得肯為公司付出。長遠而言，員工士氣增加，變得更有歸屬感，員工流失率減少。

一個間單o既決定，可以對公司有深遠o既影響，所以每次解決管理問題之前，請三思而後行。

IT interview (9) - Cover Letter

上次講左CV點寫，今次就講埋cover letter啦。

如果未睇上次o個篇，可以去返呢度睇：
IT interview (8) - CV

好多好多人問過我，到底apply一份工，洗唔洗寫cover letter呢?咁我又會問返轉頭，你知唔知cover letter係用黎做乜？

Cover letter，有D人亦會叫做Covering Letter，叫咩名冇乜所謂。Cover letter中文係求職信，顧名思意係一封信，用黎放o係CV前面。

Cover letter主要目的有兩個。第一，講明你想申請咩職位，通常會寫埋o係邊度見到個job ad，同埋個reference number。呢一部份應該寫喺第一段，因為HR一睇到可以即時分類比唔同部門。第二，用簡短文字自我介紹，同埋講下點講人地要請你，內容大概係相等於一個簡短o既interview。講下你o既經驗，你o既長處，點解你比其他人更適合呢個職位。一封cover letter唔洗寫得多字，大概係一頁A4紙就ok。寫得太多太少都唔係咁好。

從interviewer o既角度黎睇，叫你寫cover letter o既目的係想唔需要約你上去見面，都可以簡單了解到你，咁就可以filter到一D唔乎合預期o既candidate。作為candidate，你寫cover letter最重要有point，唔好以為寫夠字數就得。仲有就係，內容一定要係真o野，寫假o野的話，上到去interview先發覺你係乜都唔職，咁你都預左人地唔會請你，就算請左你，你乜都唔識，一定唔會過probation，咁就真係浪費大家時間。

一份cover letter點先算寫得好呢？最基本係你英文唔好錯晒grammar先。以IT工作黎講，錯少少英文係可以o既，但如果寫到辭不達意，咁就一定會扣分。所以寫完之後，記住再三proofread。另外，由於寫cover letter可以諗好耐，唔同interview咁要即時對答，所以最好先將一大堆想寫o既point列出黎，揀一兩個你覺得最重要或者最有說服力o既point黎寫。一個point寫一段，寫兩段左右其實已經會用左好多字數。

最後一段通常係寫客套說話，同埋留低電話號碼同email。

喺某D情況下，你可以會有一D特別要求，例如你o既工作經驗比佢需要o既多好多，想request一個唔同o既title，咁我都會寫埋o係最後一段。

Cover letter，如果寫得好，會加好多分。但講真，如果你自問做唔到以上呢D，間公司又冇要求你寫cover letter，咁就可免則免。

置業

身邊有人問起，而家D樓咁貴，點解都會買？

問呢個問題o既人，估計都係由投資角度去睇成件事。投資的話，最基本o既賺錢方法係平買貴賣。而家D樓相比以前，或者同其他國家比較，都係貴好多，睇黎唔應該買。

不過如果用住家角度去諗，就完全唔同晒。如果你肚餓，你想買個飯盒，20蚊飯盒當然平，但而家係100蚊，咁你買唔買？肚餓，當然要食飯，貴一貴都要食，所以100蚊都要買。如果我今日唔買，我點知之後一盒飯會唔會變成要110蚊先買到？如果我唔買，咁我就要一直餓住，會傷胃，咁又值唔值得？

我買樓，純粹係有需要，貴都要買。

租屋住，錢比左，永遠唔會攞得返，D錢有出冇入。但買樓自住，你供樓o既錢，其實係儲左o係層樓度，隨時可以按返出黎應急。

如果仲係唔明，可以睇下呢一篇blog，相信會清楚得多：
樓價高企仍適合買樓的人（上）

一翅都唔食

尋晚參加一位舊同學,老朋友o既婚宴。講真，我極少會出席婚宴，寧願齋比人情。但相識左十幾年o既朋友，我搵唔到理由唔出席。

每次出席呢類宴會，都會有人問我，甚至係challenge我點解唔食翅。

最簡單o既答案係：支持環保。

https://www.facebook.com/SharkSaversHK


然後，有D人會聽完就算，有D人會追問一句，條鯊魚已經死左喇喎，D翅都煮好左啦，你唔食都唔會令佢返生。

的確，鯊已死，翅已煮，我食唔食，似乎對環境冇乜幫助。不過，容許我再講多一句，我唔食翅，其實係為左宣揚呢個message。

講真，魚翅有邊個未食過？好好食咩？但食一碗翅o既背後對生態o既破壞，我相信已經唔需要我再多講。想知多Do既，可以重溫返香港電台節目-海底交易。

http://programme.rthk.hk/rthk/tv/programme.php?name=tv/oceanbusiness

我唔食翅，目的係希望引起身邊朋友o既注意，提醒佢地真係有人為左D鯊魚而去出一分力。然後，hopefully佢地會想知道原因，主動去了解嚴重性，然後達到一傳十，十傳百o既效果。當demand減少，D翅就會賣唔晒，咁下次就會殺少D鯊魚。

希望o係鯊魚絕種之前，可以停止人類再去殺鯊魚啦。

BTW，尋晚去飲，竟然有人問起我呢個blog，有點意想不到。

恩主心態，奴隸心態

最近，港陸磨擦越來越多，原本大家只係出文章，喺各大媒體隔空對罵，而家已經由「動口」演變為「動手」，出現「驅蝗」行動。

有人分析，大陸人其實一直抱住「恩主心態」，並非只對香港，而係對所有人都係咁樣。

詳細說明可參考下文：

随着经济强势，部分大陆人对很多国家和地区都有种“恩主心态”

随着经贸交流，部分大陆人有了“恩主心态”，对香港、澳门乃至台湾地区尤为显著

游客在接受采访时说：如果不是我们来消费，香港人吃什么呢

部分大陆人好以“恩主”自居并非新鲜事。面对香港这次所谓的“灭蝗”游行的辱骂与围攻，不少大陆游客在接受采访时就表达了“如果不是我们过来消费，香港不会这么好，香港人吃什么呢”的观点。虽然这些游客在被“围攻”后表达的观点不免偏激，但这样的论调却并不陌生，早在2008年，一位内地旅客滞留香港机场，向记者抱怨工作人员服务态度不好，在采访中就抛下一句：“要不是中央政府照顾你们, 香港就完蛋了”，震惊全港，令很多港人对内地人开始有意见。而随着赴澳门以及台湾旅游的大陆游客越来越多，相似的摩擦也同样出现在澳门和台湾。

而对于大陆人这种“恩主”心态，并认为香港的繁荣是大陆“恩赐”的观点。不少香港人反感至极。而这种反感的表现除了个别港人的游行，还可以通过一些民调瞥见端倪：今年一月初，香港大学《民意研究计划》电话抽样访问1016名市民的调查结果，受访者三成八自称“香港人”，一成七自称“中国人”，自认“中国人”的比率创历年新低。另外四成五自称是“中国的香港人”或“香港的中国人”。
在与美欧等国的贸易中，甚至对美债问题，大陆人的 “恩主心态”也挥之不去

而随着中国经济的发展，大陆变得有能力与越来越多的国家进行频繁的经贸和人员往来。而“恩主心态”也随着这些进一步蔓延，不仅仅局限在对港澳台地区。特别是经过上一轮经济危机，使得不少国人相信中国对于全球经济“救世主”的角色，认为“欧美是依赖中国才能摆脱金融危机，而如今欧美国家的繁荣也十分依赖中国。”

而对于这种“恩主”心态，另一个十分典型的表现就是美债问题。据美国财政部的数据，去年11月中国持有美国国债总额就达1.3167万亿美元，创历史新高。面对巨额的美国国债，就不断有大陆民众隔空喊话要美国"还钱”。甚至还有人认为如果不是中国购买美债，伸出援手，美国政府早就会破产了。而中国购买美债的这种投资行为，在这些人的眼中也成了一种“政治恩赐”。
不仅如此，在大陆的一些城市中，甚至本地人与外地人之间也会有类似的“恩主心态”

更为夸张的是，这种“恩主心态”并非仅仅针对港澳台地区亦或是欧美这些国家。即便在大陆人群体内部，不同地域之间，甚至相同地域的人之间，这种“恩主心态”也广泛的存在。

比较常见的是北京上海这样大城市的本地人对外地人的“恩主心态”，这种“恩主心态”往往与排外并存。一方面，大城市的某些本地人对外地人的态度就是认为其抢占了自己应有的资源，赚走了自己手里的钱。而另一方面，他们还会因此而产生一种优越感，认为是自己“赏了他们口饭吃”，自己是外地人的“恩人”。
错把互惠的交易当做“买方的恩赐”造就了“恩主心态”
面对大陆经济的快速增长，作为买方的大陆人，在心理上变得强势有人之常情

大陆经济的高速增长，让不少大陆人的钱包变的殷实，底气也变得更足了。特别是在买卖双方的博弈中，持有资金的买家相对主动，这种主动的选择权和支配感很容易使得买家的心理上变得比较强势，这也算人之常情。
人之常情之外，把互惠的交易当做买方给卖方的恩赐造就了“恩主心态”

不过对于不少大陆人来说，却把这种心理上的优势当作了“恩主心态”，把自己给卖家的资金和利益当作了“恩赐”。而说到底，这种错误的心理就是因为有些人搞不清做生意和恩情的区别，把买卖双方比较平等的“互惠互利”，变成了由买方“支配”的居高临下。

游客在接受采访时说：如果我们不来消费，香港不会这么好

而以双方平等的角度去看待各个经济体之间的经贸往来，这种“恩主心态”或者认为“香港、台湾等是靠内地的恩赐才能繁荣”的观点也就变得十分可笑了。因为说到底，内地虽然确实为香港提供了不少政策上的优惠，但更多的时候所谓的恩赐其实都是实实在在的生意，一方购置所需，一方赚得盆满钵满，以此认为中国大陆对生意伙伴“恩情浩荡”并不合适。

以香港为例，事实上，香港从内地获得的从吃穿用到水电能源，并没有少花一分钱，有时甚至更贵。以香港的供水而言，有六至七成取自东江水，年最高供水量可达11亿吨，现时年供水约7亿多吨。2011年之前的合同中，每年向港供水为8亿吨，实际使用则不足8亿吨（上一年度用水7.17亿吨，支付近32亿港币），节省的部分依然要付款，有香港媒体形容这是把两亿港币倒入海里。而根据信报的数据，为香港的供水业务广东可以赚取高达5成的利润。再说供电。从1979年开始，香港中华电力公司即已经与广东电力并网，售电给广东。如今，香港本地的两间电力公司：中华电力与港灯公司，在离岛设立的发电厂，足以供应港九新界地区。只有一部分工业用电，是购买自深圳大亚湾核电站。
对美债等一些问题的不了解也促成了大陆人恩主心态的形成

把生意当作恩情是一种错误认识，而认为“购买美债”这样的行为也是恩情则源自对复杂金融问题的不了解。

实际上，中国购买美债也是一个双赢的生意：美国国债至今并没有不良记录。无论多大的困难，就是在二次大战中，也总是到期还本付息，从来没有违约过。美债因其优良的信誉，被世界各国认为是“最可靠的资产”。如今，美国国债的日交易额为5000多亿美元，全部可交易公债的年换手率为33次，美债依旧是全世界容量最大且流动性最好的资产市场。

总结来看，中国超过3万亿的外汇储备，购买美债是最稳妥的选择之一。而把中国购买美国国债这种自愿的投资行为，延展为中国成为了美国的恩主则显得十分荒谬。
某些社会因素以及宣传，使得有些人认为“恩主心态”理所当然

除了对交易的错误认识以及对某些金融知识的不了解，大陆人在生意中的“恩主心态”也受到了不少中国特色社会文化因素以及宣传的影响：
随“大国崛起”而滋生的“强国心态”，令部分大陆人有居高临下的心态

在快车道高速增长的中国经济，使得短短二十年间，香港的地位就从亚洲的金融中心逐渐被变为一个普通的中国大城市。香港如此，其它地方的情况也类似。在这种地位的快速升降间，中国大陆人的心态也有一些变化。随着大国的崛起，一些大陆人在外面的“强国心态”就显露出来。毕竟大陆人背后是全球第二大经济体，这就使得部分人会秉持一套高高在上的大中华居高临下的心态，用一套狭窄、闭塞甚至敌意的思维方式去看待一些事情，强化了“恩主”的感觉。

对此，英国《金融时报》就曾评论到：中国面对诸如非洲国家这样的穷国小国时，对和这些国家经贸之中的摩擦要认真对待。不应该在互动中一面强调“友谊”的口号，一面又以一种恩主的姿态出现。
在政府对资源的高度的管控下，国家政策对经济的巨大影响力也会带来误读

此外，中国大陆相较于其它国家与地区拥有一个十分强势的政府。常常是政府决定政策如何，资本就如何运转，而享受到政策“照顾”的地方就能快速获得繁荣。这就给不少人造成了一种错觉，认为“某地经济发展得好，一定是政策好，获得了国家的支持”。而这种误读同样也会强化“恩主的心态”，让一些大陆人觉得某地变得繁荣是“沾了政策的光”。
延续多年的宣传的语态也进一步加剧了这种“恩主心态”的蔓延

其次，在媒体人胡子莫看来，长期错误概念的灌输，让一些人有了想当然的“恩主心态”的错觉。还以香港为例，比如当初CEPA（两地更紧密经贸关系协定）的签订，北京媒体将之称为“送大礼”，但其实这其中完全依据世贸组织的原则及标准。香港跟其他国家和地区早就实现了这种经贸协议，签CEPA不过是把内地与香港之前不正常的贸易关系规范化、正常化。如果说这也是送大礼的话，美国、欧洲、日本，几十年前就送给香港了。

不少大陆人觉得香港的繁荣就是沾了政策的光

再比如，当年内地供应香港生鲜食品的“三趟快车”，在1997年香港回归之时的宣传造势就达到了顶峰，时任外经贸部部长的吴仪特意以全程随车押运的方式，向世界秀出供港“三趟快车”。而时任外经贸部“供应港澳三趟快车领导小组办公室”主任金旭更是曾应邀请参加当年春节联欢晚会，在《三趟快车奔香江》节目中，金旭亲自介绍“35年风雨无阻的三趟快车”。宣传通过“三趟快车”，将内地塑造成了支持香港的大后方。但实际上，长期在香港经营和销售供港食品的华润集团，对此却自称“三趟快车”是出口创汇的‘蓄水池’”。

现如今，这种宣传语态也并未消失，诸如“中美、中英签署贸易大单，中国送出数十亿美元大礼”的描述仍然不时见诸报端。
最后，中国人把生意和人情混淆的历史文化因素也不容忽视

除了前面所提到的政策宣传因素外，中国传统文化里，做生意也不是一件纯粹的事，而这种文化上的耳濡目染对这种“恩主心态”的作用也不容忽视。

历史上，这种把生意当恩赐的感觉更为明显。比如在鸦片战争以前，由于中国是不需要外贸的，一切货品自给自足，域外新奇物品也只需要“藩国进贡”。当时只是为了对崇尚中国货品的洋商体现一点恩赐，朝廷才在广州开设了一个港口，接待来做生意的洋商。

而如今，在中国，生意和人情之间仍旧有巨大的交集，有些卖家做成生意后仍然会以“赏口饭吃”来表达对买家的谢意。而在这种情况下，部分大陆人以己度人，在本比较平等的贸易中掺杂着诸如“恩主心态”这样的其它因素也不足为奇。

结语
在经贸关系中，付钱的买方确实相对主动，这种主动容易使得买家有一种“优越感”。但部分大陆人将这种“优越感”升至“恩主心态”，并以“恩人自居”，对很多问题指指点点甚至招致反感。而这种“恩主心态”的养成其实和大陆长期来的历史政治条件以及宣传有着千丝万缕的联系。
出處：http://view.news.qq.com/original/intouchtoday/n2709.html


其實，我想話，呢種恩主心態並非只有大陸人有，喺香港職場上其實到處可見。最明顯例子就係你嘅老細或者上司，總會覺得你出左錢就乜都要做，OT到幾點都要死掂佢。咁樣都未係最慘。最慘係，你身邊有大樣抱住「奴隸心態」嘅同事搵命搏，爭功勞，爭話事權。

金融界，會計界， IT界，一早已由呢一班「奴隸」霸佔，所以整個行業都有不成文規定：你做得呢份工，就預左要OT，你唔OT，你份bonus唔會多，升職加人工亦都唔會有你份。

不過，最悲哀嘅係，大陸人唔單止以「恩主心態」霸佔香港大街小巷，佢地亦都正在以「奴隸心態」攻佔各行各業。

香港人，你地醒未。

連載小說：呼吸(5)

我送走了Tom之後，回到小房子裡，觸動了一下機關，地下室的門無聲地打開，然後我走進去。我慣常地坐到地下室裡的工作枱前，面對着枱上幾個顯示屏，正中的一個正顯示着一段聲音的波紋。

我在鍵盤上按了一下，呼吸聲又響了起來。

「嗄...嗄...嗄...嗄...」一段急速的呼吸聲，聽上去，就像這個人很緊張，而且很有可能正在做很花力氣的事，有點像在跑步。重覆了四次呼吸，維持了2點54秒，然後一下稍長的吸氣聲。任何人聽到這種吸氣聲，都知道這人下一秒鐘必然會大聲說出甚麼話來。

可是，錄音就在這裡完了。長度剛好3秒。

沒有期待的說話，也沒有任何其他聲音。只有呼吸聲。

這是第幾次聽這段錄音了？應該已經好幾百次了吧。每次聽完，心裡總會問，到底他下一秒想說甚麼呢？

半年前，Charles跟我說要到外地工作，我本來是反對的，但他很堅持，說這只是一個很簡單的工作，去當一個富二代的健身教練，為期一年，之後就可以回來。他還說，回報很豐厚，一回來，我們就有足夠金錢結婚和買房子。

我心裡明白，他是為了我而去的。他做的一切，其實都是為了我。他的工作是健身教練，每天在健身房裡教一些上班族如何改善身型，而且有時還担當銷售員的角色，向人推銷健身會籍。我和他都很清楚，這種工作很難在短時間內儲到足夠資金結婚和買房子。我其實不介意沒有華麗的婚禮，也不介意租住小房子，但他堅持要給我幸福的生活，要給我快樂。

這些我全都明白，所以，我最後都沒有阻止他。

可是，我後悔了。我收到一封信，信裡說，因為一次意外，房子失火，Charles因為來不及逃出來，所以被火燒死。我接受不了，我哭了一整夜，哭到昏了過去。當我醒來，我還趟在家裡地上，手上還拿着信，才發覺信紙後面還夾了一張支票。是一百萬美金的支票。

我很生氣，Charles的性命就只值一百萬美金？!但再想一想，我又能怎樣？Charles已經死了，我做甚麼都好，他都已經不會回來。這些錢，是用他的命換來的，我理應好好利用它，他才不會死得沒有價值。

我的生活從此變得沒有意義，沒有了生存的目的。有好幾次，我想自殺。只要在手上劃出了血痕，浸在溫水裡，血很快就會流到水中。但是我每一次都會提醒自己，Charles不會希望我這樣的，他做的一切，都是為了讓我快樂地活下去。但我實在太累了，是哭得太累，還是想他想得太累，還是活得太累，我都已經分不清了。

終於，到了那一次，我下定決定要完結這沒有意義的生命，就在我行動之前，我看了一下手機，有一個未接來電。

是誰呢？一打開iPhone，看了看來電紀錄。

是Charles！

我差點昏了過去。Charles不是死了嗎？怎麼還會打來？

我有想過根本不是他打來的，說不定是那個富二代不知怎樣保留了Charles的電話然後打來的。我想按下去，打過去看看。

這時，一條短訊發過來。「你有一個留言。」

留言！Charles！我知道是你，一定是你有話要對我說吧！

我撥號到留言信箱。

「你有一個新口訊。第一個口訊。嗄...嗄...」

呼吸聲？

「嗄...嗄...刪除及收聽下一個口訊，按7字。要儲存...」

只有呼吸聲？這是甚麼意思？我很不明白。

我不想那麼多，說不定打過去就有答案。我撥了電話，可是，電話不通。

我打了很多遍，也聽了很多篇這段錄音，我肯定這一定是Charles的聲音，但為甚麼只有呼吸聲呢？既然我聽到Charles的聲音，是不是代表他還未死呢？要是他未死的話，他不會一直都不聯絡我的。要解釋的話，他不聯絡我，有可能是由於他沒有能力聯絡我，例如受了傷，也有可能是他不被容許聯絡任何人，也就是說，他可能被人關起來了。

想到這裡，我決定了，要是他真的還沒死，我一定要把他救出來。雖然到最後可能會發現所有事情都只是一個玩笑，但也總好過甚麼都不做。反正，我的生命沒有了他，也就和死了沒有分別。

我曾經做了一段長時間的軟件工程師，我相信我有方法可以把Charles找出來。

我把聲音檔傳到電腦裡，然後經過聲音分析軟件的處理，把聲音以波形顯示出來。

就像我現在看到的畫面一樣。

我看一看手錶，9點04分。是時候了。我用電腦打開一個程式，一連串時高時低的「嗚嗚」聲立即傳了出來。

是警笛聲。

IT Security

是咁的，聽日就係一年一度o既渣打馬拉松，近呢一個星期係各位參賽選手攞選手包o既重要日子，因為如果唔去攞，就冇號碼布，亦即等同放棄參賽資格。

我年年都冇參加，所以一直都冇試過攞選手包，不過今年要幫個朋友攞，所以就有機會去見識下。整個流程其實問題不大，為左處理大理比賽資料，電腦化係必然o既事，作為一個IT人，當然會對呢部份特別敏感。

我相信，渣打馬拉松主辦單位對IT Security o既重視程度真係唔夠高，因為佢地竟然容許工作人員將login name同password貼喺部機面頭。我知，我知，好多人都咁做，咁唔代表你都可以咁做，因為呢部機係有好大機會比外面o既人接觸到，從而比人盜取參賽者資料，對所有參賽者o既私隱都有好大威脅。

其實如果只係將login name同password貼喺機面頭只係其中一個錯處，另一錯處係，大會容許參賽者行到咁近，近到我可以直接影到機面頭o既字，而且佢地係連我影左張相都唔知。

如果我係一個hacker，我相信所有參賽者o既資料已喺我手上。

所以話，IT帶來好多方便，但如果唔重視IT Security的話，可以會帶來重大危機同威脅。

[突發] 香港電視(01137)好野!

雖然唔知發生咩事，但我相信香港電視長升長有。

利申:本人持有1137。

送花

今日情人節兼元宵佳節(一講中國節日就要加個"佳"字...)，facebook上充滿收花相。女士收花，當然係開心，但其實你有冇諗過，送花嗰個係用咩心情去買呢紮花架呢？可能你會以為對方係歡天喜地，笑住咁走入花店，諗過度過，再同店員討論下花語(即係咩花代表咩意思)，然後先揀到一紮最能夠代表佢對你o既愛o既花。如果你係咁唸，咁就真係太天真。

根據非正式統計(即係我自己收集到o既數據)，大部份男士都係上網訂花，而且佢地只會揀價錢，而唔係揀咩花語。對男士黎講，買花同買電子產品o既邏輯基本上一樣，唯一唔同o既係，買花只能擺一個星期，頂多兩個星期，而買電子產品，佢可以用最少幾個月至一年。所以男士買花時，多數都係對住個mon，皺晒眉頭，因為花呢樣野，性價比實在太低。

咁點解男士咁唔想買花都要去買？咪又係因為女士要面子囉。女士們成日話男士們要面子，喺fd面前要威，女士們其實咪又一樣，佢地收花，一定要送去佢地公司，仲要送D大大紮o既，咁先可以喺全公司女同事面前攞彩，如果唔合佢地意，後果真係可怕過第三次世界大戰。

所以女士們要留意喇，如果你想做個好情人，話比對方知你唔係嗰D淨係要面o既港女，咁你就應該要理解男士唔送花o既原因，話唔定你一兩次唔收花，下次收到o既就係鑽石戒指。

香港人速食文化

最近開始寫小說，名叫"呼吸"。寫呢篇小說係有一個好奇特o既原因，有一位朋友喺group入面話，不如大家用"呼吸"為題寫一篇blog。我相信其實佢只係講下笑，但我諗諗下，又覺得幾好玩，加上已經有十幾年冇寫小說，又手痕好想玩下，所以就寫左四集，共三千幾字。當然，篇小說只係開左個頭，個教事仲有排寫，我相信寫四十集都唔係問題。

寫四集係我第一個目標，因為"那夜凌晨，我坐上了旺角開往大埔的紅van"o既作者Mr. Pizza，喺電台訪問中提到，當初佢為左挑戰自己，所以都係寫左四集，然後post喺高登。如果反應不如理想，就會不了了之，但如果反應好，就會繼續寫。結果，如果大家係高登巴打絲打，應該都知道，最後呢篇小說係爆到七彩，最後仲出埋書，而家仲拍埋電影，今年年中就會上映。而我，當然唔似得Mr. Pizza咁，寫得出咁意想不到o既情節，亦唔似佢咁寫左好多年長短故事，不過我寫呢四集，其實都係想試下反應。

就如Mr. Pizza所講，香港人始終係有速食文化，即係好似食杯麵咁，三分鐘食得，用多三分鐘就食完。睇文章都一樣，唔好要我用一個鐘頭去睇，我只會用三分鐘去睇。所以小說基本上要將個頭寫得好有趣先可以吸引到讀者，如果三分鐘之內唔能夠吸引到讀者，基本上呢篇故事就已經唔會有人理。所以喺高登係有大量o既甜故，通常會有一個比較長o既title，一句已經點出成篇野o既賣點，而且內文多用口語，夾雜大量粗口，而故事多數發生喺香港。要有齊呢D元素，先勉強可以令人睇三分鐘，但如果頭五百字唔夠吸引，讀者亦都唔會繼續睇落去。

"呼吸"呢個故事，冇甜味，冇一點即明o既title，只有極少量粗口，故事亦唔係發生喺香港，而且頭五百字仲未帶出整個故事o既賣點，所以明顯地唔會喺高登或網絡上生存得到。呢個情況其實我都預左。

不過，如果我有時間的話，一定會完成呢個故事，因為有好多非常有趣o既元素係高登文裡面搵唔到，例如飛車情節，高科技軍事武器"GUNDAM"，而最重要係，所有寫出黎o既事物，都可以喺現實世界搵得到，而唔係幻想出黎，就好似男主角所揸o既銀色跑車Mercedes-Benz SLR McLaren，你絕對可以Google得到。

連載小說：呼吸(4)

要遲到了！

我把車匙插進鑰匙孔裡，一扭，汽車輕微震動，「隆」的一聲，引擎被點着了。

都怪我自己昨晚喝那麼多，竟然連昨晚這種事都做得出來。怎對得起阿恩呢！我看一看握着軚盤的左手，無名指上本來有一隻白金戒指，現在空空如也，只有一圈戒指印。我眉頭一皺，嘆了一聲，輕輕說了聲：「對不起。」

我有太多事情對不起阿恩了，昨晚和Anna的事，弄丟了婚戒，還有。。。她的死。

我右腳一踏，銀色跑車狂吼一聲，後輪急轉，和地面發生強烈磨擦，發出「吱吱」聲，然後跑車受力向前推進，瞬間離開了車位。我大力一扭軚盤，左手拉起手制，把前輪鎖死，車尾順勢一甩，整架跑車已經轉了個九十度角。我看好時機，把手制放下，同時右腳再踏油門，跑車直颷而出，從打開了的閘門奔上大路。

我看一看倒後鏡，鏡中有一棟三層高的舊式村屋，白色外牆己經因為風吹雨打而變得灰暗，旁邊一座只有一層的矮小建築物，外牆雪白，深木色大門和牆身形成強烈對比，應該是新建不久。此刻，穿着白色長褸的Anna正站在大門外，向我揮手道別。

Anna，她擁有簡單的名字，高挑豐滿的身材，經歷過風霜的臉孔，有威嚴的聲線。而我對她的了解就只有這麼多，但不知道為甚麼，總覺得對她很有好感。所以我把我的手機號碼留給她，我不求甚麼，我只希望和她做朋友。我知道阿恩也希望我向前看，不要活在悲傷之中。

跑車在郊區馬路上奔馳，旁邊的汽車都不及它快，統統給它拋離。平治和麥拿侖的完美結晶，Mercedes-Benz SLR McLaren。前置的引擎加上後輪推動，使車身重點剛好定在前輪後一點，令跑車不用太大力量就可以加速，從而減少加速時間。在急彎處，駕駛者不用使出飄移的技巧，它的碳陶瓷剎車盤能使跑車在非常短時間之內減速，然後轉彎後再加速，在短時間內就可以完成入彎出彎的動作。

我坐在銀色座駕內，很快就得到安全感，整個人安定了下來。

我看一看手錶，9點03分。Shit，遲到了。軚盤一轉一扭，又過了幾輛車。

這時，跑車駛進了市區邊沿，馬路兩旁商鋪林立，一大片只有兩三層高的紅磚建築物座落在這個區域，有無數十字路口把建築物分隔着，從高處俯瞰，就像見到一個一個橙色方格。

我把車停在一個十字路口處，等待交通燈從紅燈轉為綠燈。我有點心急。

「不行了！」

我把軚盤前面的一個特殊按鈕按下。尖銳的鳴笛聲隨之響起，紅藍交錯的警號燈從跑車的進風口和後車窗射出，表示現正在執行緊急任務狀態。

雖然破壞了規距，但總好過遲到了今天這個重要會議：最新國防科技研討會。這個會議只有少數高層官員參加，由各軍事科技供應商展示他們最新的研發成果，簡單來說，其實就是一大班軍火商人向軍方推銷軍火的會議。

這個會議是一年一度的，由早上9點開始，為時一整天。內容由手槍到火箭，甚至戰機，戰艦都有。聽說這次有一家軍火商會展示我們意想不到的研究成果。我作為科技總監，一切和現代科技有關的會議我都需要參與。而這種和國防有關的會議，我當然不能不出現，而且，我其實也對今年的內容相當好奇，因為在議程上數百個項目之中，有一項代號是「GUNDAM」，而類別一欄則寫着「其他」。單單是這個代號已經引起無數幻想，難道這個軍火商已經研究出日本漫畫中的Gundam？要是真的這樣，那我一定不能錯過這個會議。

我雙手捉緊軚盤，右腳深深一踩。銀色光芒中，帶着閃爍的紅藍亮光，尖叫着鳴笛聲，像銀鷹般呼嘯而去。

連載小說：呼吸(3)

「對了，還沒問你，你叫甚麼名字？」我故意問他。

「我叫Tom，你呢？」他一邊說一邊開始穿回衣服。

「我叫Anna。」我當然不會說真名字。事實上，現代人都用自己起的洋名作名字，真正的名字已經很少會說出口了。所以，我隨便編一個洋名，他根本不會知道是真是假。

「你知道嗎，我平常不會這樣的。」

「怎樣？」

「就是。。。one night stand？」

「是嗎？完全看不出來呢。」我側著臉笑他。

「是真的。昨晚其實我只想把自己喝醉，one night stand這種情節，對我來說只會是電影或小說才會有，沒想到。。。會發生在我身上。」

「放心吧，這些事情每天都在發生。」我以大姐姐的語氣跟他說。

「那麼。。。我們是否就這樣結束？」Tom邊說邊站起身來，把恤衫穿好。

「當然了，不然你還想怎樣？」我假裝一點都不在乎，因為我知道Tom比我在乎得太多了。把貞操和感情劃上等號的男人，很少見。

「我。。。不如這樣吧，我們做個朋友？」Tom雙手在打領帶，不過好像不太純熟，弄了個很大的三角形出來。很醜。

我看見Tom不太會打領帶，就走了過去，站在他的面前，輕輕拍了拍他還在勉強打領帶的雙手，說道：「讓我來吧。」

我站得離Tom很近，胸部也差點碰到他。半裸的身體，加上女性天生的體香，以我和他這個距離來說，除非他是同性戀，不然他一定會心跳加速。

「你為甚麼會不懂打領帶？你上班不用每天都打領帶嗎？」我問道。

「要的，不過平常都是。。。我太太替我打的。」

「原來你已經結婚了？為甚麼看不到你手上有帶戒指？」

「她剛過身了。」他望向前，望向深深遠處，像在回想過去。他的眼圈有點紅，似乎他太太的死對他打擊很大。「我平常都不會到酒吧喝酒，但昨晚實在太想念她，所以才去喝酒的。想不到會遇到你，更想不到昨晚會發生這樣的事。」

站這麼近，才發覺Tom很高大，比我高半個頭，有一米九左右吧，很健碩，每塊肌肉都輕微鼓起，雙肩很闊。要擁有這種身型，應該需要很強的自我約束力才能做到。之前看到過關於他的資料，我很清楚煙酒那些傷害身體的東西，他是連碰都不會碰。但作為軍方的科技總監，他似乎並非單靠運氣。

「噢，對不起。」我一邊純熟地替他打領帶，一邊追問。「不過，你還沒回答我問題。」

「我的戒指？」他看著自己的左手無名指，嘆道。「唉，我弄丟了。」

「哦。」我沒留意他說甚麼，因為我在這一刻有更重要的任務要完成。「弄好了，你自己看看。」

他走到浴室，面對著洗手盆上的鏡子，看了看，然後轉過頭來，說道：「Anna，謝謝你。」然後輕輕一個微笑。

說真的，要是我沒有特殊目的，純粹因為巧合而認識這個男人，我相信我會對他很有興趣。從所有角度來看，他都是一個完美的男人。可惜，我必須達到我的目的，那段只有呼吸聲的錄音，我必須把迷底解開。不惜一切代價。

連載小說：呼吸(2)

冰冷的水潑到臉上，令我頓時清醒不少。我一向不喜歡用溫水洗臉，因為溫水會令臉上油脂減少，會令臉上皮膚又乾又緊。就算像最近這般冷的天氣，我仍然堅持用冷水洗臉。

「早安！」一把低沉的聲音說道。

我一邊用毛巾擦臉，一邊轉頭望向聲音來源。「早安！」我回應道。

房子很細小，面積只有大概二百平方呎，除了附在一角的浴室外，沒有其他房間。事實上，這個房子本身就是一個套房，不過多了一個開放式厨房。開放式厨房的好處是不會被厚牆佔去空間，而且視覺上，整個房子好像大了很多。可是明顯地房子的主人並不經常煮食，因為電磁爐頭和煮食工具都很乾淨整齊，好像一開始放在那裡就沒有人動過它們一樣。房子裡最顯眼的就是放在正中央的一張大床，比一般雙人床還大，就像這個房子是為了這張大床而設的。

床上趟著一個男人，一頭短髮，深色皮膚，上身有結實的肌肉，下身還在被子裡。他那張帶著迷人笑容的臉，配著一對會說話的眼睛，是典型的美男子。他正看著我，正確的說，是打量著我的身體。雖然我很了解自己已不是妙齡少女，但我郤對自己身體的線條有無比自信，而且，我只用一件單薄的晨褸把它包裝好，反而比全裸更有吸引力。

他此刻的反應，確定了我是對的。男人，都有相同的弱點。

我把毛巾丟進洗臉盆，笑道：「怎麼了？還沒看夠嗎？」

他不情願地把目光移開，看著我的臉。 「昨晚一切都發生得太快了，我根本來不及反應嘛。不過說真的，我現在才發現你簡直是活生生的藝術品！我真的太幸福了！」他一臉認真地道。

我咀角微笑著，看著他那張臉。看來他還不知道我為甚麼會選中他。

連載小說：呼吸(1)

一覺睡醒，刺眼的陽光像雨點般灑落在我的臉上，看着一點一點的陽光從窗外柏樹的影子裡穿透過來，就好像上帝伸手拯救無助的凡人一樣。白色的紗簾，將陽光散射到整個房間，形成一種和暖的感覺。可是，氣溫郤硬頸地對抗，世事總是如此，從來都是充滿互相對抗的聲音。

寒冷的氣溫已經持續了好幾個星期，今天仍然如此，陽光也好像幫不了多少。我打開iPhone，看一看天氣，現在室外氣溫是攝氏-11度。現在時間是8點34分。很想繼續睡，但不得不起床了。

和平常一樣，我披着晨褸，走到洗手間梳洗。看着鏡子中的我，我己經差點認不出自己了。曾經迷倒不少男生的秀髮，現在己經滲着一條條白髮，在黑髮中尤其顯眼，似乎在嘲笑我年紀不少了。雖然他曾經不止一次讚美過我的雙眼，但現在己經被魚尾紋和眼袋包圍。其實我也真的懶得去化妝，沒有他的世界，變得再美也沒有人懂得欣賞。我回頭看看還在床上呼呼大睡的那個陌生人，我深深了解到，這個人只對我的身體有興趣，我的長相如何，他不會在乎，更不要說我的內心世界了。

說真的，我還很想他。可是我也明白，一切也不能回到當初那樣。他留給我的，就只有一段只有呼吸聲的錄音，就在他離開不久之後收到的。到底這代表甚麼意思呢？我很想知道。

派利是 vs 逗利是

農曆新年過後第一日返工，例行公事當然係派利是同逗利是。其實大家又有冇諗過，原來喺派利是同逗利是o既過程之中亦都可以看到人生百態。

先講逗利是，小弟未結婚，當然唔需要派利是，所以每年呢一日都係收利是嗰個，不過小弟性格一向半中半西，所以對逗利是o既習俗並不太投入。所以每當見到一位同事向三唔識七o既同事逗利是，我就會覺得此人非常市懀。如果有群眾壓力的話又另計，因為當成班人一齊去逗利是時，其實有種歡天喜地o既氣氛，講真，無論收到o既利是入面裝住o既係青蟹定花蟹，又或者只係硬野，我諗大家都會同樣開心。但如果你得自己一條友，膽粗粗走去同個唔係太識你o既同事恭喜發財，人地禮貌上當然要比利是你，但心裡面真係小到你飛起。

其實逗利是真係要有禮貌，明知人地唔想派比你，你就唔好走埋去遞上一大隻手板。如果你真係咁恨錢，咁不如做返個知情識趣o既人，只逗自己部門o既利是，其他部門同事，佢地想派就派，唔洗迫人地記住你，咁可能對你前途更有幫助。

派利是o既，有時都好好笑，又要派，又要偷偷地派。如果唔想派，不如請假去旅行避年，我諗咁樣冇人會怪你。但你又要過年後第一日就拎利是去派比熟人，但又要驚死人地知，叫人唔好同其他人講，我講得真係好小家。不過，最令人不快o既都係D自以為是，架子幾丈高o既所謂高層，佢地的確係有錢，所以派利是派得有霸氣，唔洗你地黎逗利是，佢直頭一個一個位去派，但又要派到好似派啤牌咁，人地講咩吉利說話都聽唔到，將封利是丟去你張枱就算。冇錯，係好有霸氣，但我唔想要囉。我轉頭真係用佢D利是錢捐去馬會算，當冇收過。

所以呢，派利是又好，逗利是又好，唔該大家似返個人啦。

IT interview (8) - CV

農曆新年就黎到，我相信好多公司都會喺呢個時候派Bonus。無論大公司定細公司，工作性質如何，呢個時候都好多人諗住收左Bonus就轉工，而head hunter亦都開始進入旺季，要部署一連串嘅獵頭行動，而市場 (尤其JobsDB)上嘅工亦會明顯比前一兩個月多好多。

講到轉工，我諗最多人煩惱嘅係唔知點寫CV。小弟大大話話都in過好幾十人(可能過百)，而比人in嘅次數我諗都有好幾十次，所以今次就分享下點寫CV先可以有效吸引眼球。不過大家要留意，我講嘅係IT工嘅CV，如果你唔係IT人，你可以參考下，但唔好完全套用，因為每個行業着重嘅野都唔同。

首先要講嘅係CV最基本元素。基本個人資料，聯絡方法當然要有，呢D係基本中嘅基本，我諗唔洗我多講，不過要留意嘅係，基本資料中最好包括婚姻狀況(單身，己婚，離婚)，因為有D interviewer係特別唔鐘意已婚嘅女士，佢地覺得已婚女士懷孕機會大，一大肚就請長假，公司會得不償失。所以，你寫明自己係女性同埋已婚，如果對方係唔鐘意你，就無謂浪費大家時間，因為in一次最少都要用你半日。不過，我亦見過大公司特別鐘意已婚男性，因為佢地有頭家要照顧，所以就算做得幾辛苦，幾唔愉快，都唔會話走就走，同埋已婚男性經歷過婚姻，理應處理過結婚呢個大project，心智同處事通常都比較成熟，所以呢個都不失為一個賣點。

基本個人資料中，近年有公司會要求你提供LinkedIn嘅URL。作為一個IT人，如果你能夠喺CV上提供此訊息，表示你有留意現今網絡發展，而且追得上潮流，而唔係old school派。當然，如果你比埋LinkedIn URL比人，就梗係要記得執靚個LinkedIn profile，最好叫埋同事朋友去確定你寫嘅skillset，咁個profile就更加可信。

除左基本資料，CV當然要有學歷同工作經驗，但我會先寫current salary同expected salary，然後係availability。點解？首先，而家有9成嘅IT工作都要你寫，所以你CV一定要有，你唔寫的話，到你interview時都一定會問你，咁你希望浪費大半日，聽到人地話你貴，定係寧願人地一早覺得你貴，唔洗你去interview？冇錯，你可能因此而少左interview機會，但如果人地叫得你去in，就證明人地係接受到你嘅expected salary同埋你嘅加幅，即係你嘅成功機會己經提升左。即係你原本可能一個月有10個interview，而家可能得返3個，但你原本可能要in 20次先搵到工，而家就in 5次就搵到。道理就係咁簡單。咁點解要比其他野寫先？因為CV其實係要將最重要嘅野寫先，最唔重要嘅野寫最後。所以就算你寫工作經驗，都係先寫最近嘅工作，一直寫到最早嘅工作。學歷都一樣。而current salary同expected salary係比其他野更重要的。而availability我會貼住expected salary之後寫，因為係相關的。仲有一個item係一般人冇留意到，而且100份CV入面可能得一份會寫，就係current location。如果你係send比local公司，你唔寫唔緊要，但如果你係target國際公司或者大陸公司，current location就代表你而家身處邊度，如果你申請嘅職位係要飛去第二度開會，甚至要relocation，咁間公司就可以憑住呢個item去估計要幾成本。Current location其實仲包含左好多意義，包括你嘅語言／語文能力，expected working environment，呢D野並非最重要，但當interviewer要二揀一時，呢D就係要黎決勝負。

跟住落黎就係寫工作經驗，你要記住，工作經驗比學歷重要得多，所以工作經驗一定要行先。就好似上文提到，要先由最近嘅工作開始寫。每一份工都要列明公司名，當時職位，由幾時做到幾時，工作內容。咁你可能會問，如果我曾經升職，咁我應該點寫職位？咁我會問返轉頭，點樣寫先對你有最大好處？當然係寫最後職位啦，因為你份工可能做左10年，由junior升做senior，你做senior可能只係做左5年，但你寫個senior嘅職位，人地就會覺得你做左10年，咁咪著數左囉。仲有一樣野要留意，工作內容一定要用point form，因為冇乜interviewer會用大半個鐘去睇你寫一大篇爛英文。要記住，成份CV一定要簡潔，唔好有多餘嘅野。

寫完工作內容，記得要加多一個point，寫你呢份工用過咩skill，e.g. C++, J2SE, J2EE, GIT, Oracle DB, SQL Server, etc.咁樣寫有個好處，就係interview一睇就知你呢份工大概係做D乜，清楚易明，好過你用一個表去寫你每個skill用左幾多年。另外仲有一樣野要記住，如果你有D工作係未過probation己經冇做落去，咁就唔好寫，因為interviewer會覺得你好jumpy，而且你做得一兩個月，佢會當你冇做過，所以只有壞影響，咁不如唔好寫，話嗰段時間去左旅行好過。

好喇，寫學歷喇，呢個部份其實都好多人寫得唔好。你做左三五七年野，做乜仲要寫中學讀邊間？仲要寫埋A-Level考成點，HKCEE考成點？大佬呀，你當時讀左D乜，你而家都唔記得啦，仲話我知有幾多個A係冇用的。不過，中學學歷都有一個情況係要寫，就係當你搵第一份工。因為你冇工作經驗，你嘅學歷就係你嘅一切，所以你需要寫落去。拜托，只要你做過一份工，就唔好再寫中學學歷落CV，比我見到，你幾叻我都唔請。另外，寫大學學歷，唔需要寫邊科咩成績，你只需要寫你係1st Honor，Second-up等等，最多只可以寫GPA幾多。

最後就係寫Other Qualifications。你讀過D咩cert，有D咩特別技能，就喺呢度寫。我諗唔需要多講。

以上咁多野，就係寫CV最基本要知嘅野，但好多時有D工作係有特別要求，例如要你加張相落去，咁你咪按要求加落去囉，但如果人地冇要求，你又唔係靚仔／靚女，咁就無謂獻醜喇。寫CV，最重要係寫D加分嘅野落去，減分嘅野冇必要就唔好寫。

其實搵工，CV當然重要，但cover letter都好重要，九成IT人都唔會寫，下次就講cover letter啦～如果覺得小弟講得有道理嘅，麻煩share出去啦～