環遊世界(3) - 希臘 - Mykonos

希臘其實最出名係D小島。而小島中最出名係Santorini，其次係Mykonos。所以我地今次就揀左呢兩個小島，不過其實希臘仲有好多其他小島，我相信都唔會太差。

風車日落，小威尼斯
Mykonos最出名係有風車，唔係一個，而係一排五個，仲要係好巨型o個種。其實呢D所謂風車係磨坊，以風力去將小麥磨成粉，然後再用黎造面條面包。今時今日，呢D磨坊已經失去實際用途，變成佈景板。而咁啱，呢D磨坊喺島o既西面，所以日落時太陽正好o係五座磨坊o既後面，影出黎o既相同藍白小屋相真係各有各美，所以我都建議大家點都要去一去Mykonos。

小威尼斯亦係Mykonos出名o既地方。一排小屋伸出海面上，海浪不停拍打屋底，就好似意大利威尼斯出名o既建築一樣。
交通
去Mykonos其實有三個方法。第一係由雅典坐飛機去, 不過其實雅典同Mykonos唔太遠，坐飛機反而會浪費時間。第二係由雅典坐船去，如果玩完雅典先去Mykonos，呢個方法係最好o既。第三個方法係由Santorini坐船去，如果玩完Santorini先去Mykonos，咁你最好揀呢個方法。

希臘船票可以o係SeaJets官方網站買:
https://www.seajets.gr/

早一星期買其實都已經足夠，因為D船好大隻，好多位的，同埋買economy已經足夠，再貴其實個位都差唔多。上船時第一件事係攞行李，唔同目的地有唔同o既行李架，記住唔好擺錯。之後就入船艙，搵位坐低。記住，到時大家會爭先恐後去擺行李，再爭先恐後去搵位，手快有手慢冇，雖然唔會冇位，但要打散坐都唔係咁好啦。仲有就係，如果你係網上買飛，去到碼頭先攞飛，記住提早去碼頭，或早D去攞飛，因為有時佢地會取消班次而assign左你去另一班次，所以早D攞飛就早D知。當然，佢地都會有email提你，但我唔敢擔保個個都收到囉。如果有租車，最好早一兩日去攞飛啦。仲有就係，D船票其實有mark位，但上到船個個都亂坐的，但有時又會有人手持船飛問你地有冇坐錯位，所以自己執生喇。

Mykonos其實唔細，可以租車環島遊，但其實除左碼頭區多野睇多野買，其他區都唔係想像中咁靚，有D沙灘淨係得太陽傘，根本冇人去玩。不過，亦都係因為咁，話唔定你可以發掘到人地見唔到o既靚景。

食物
當你以為Santorini同Mykonos呢D小島一定有海鮮食o既時候，你就真係大錯特錯。呢度o既海鮮又貴又少又唔好食。食海鮮，都係返香港食好D。

Mykonos其實最正係D橫街小巷o既餐廳仔。細得黎又好靚，D野食仲唔錯添。仲有就係總有一間o係左近o既酒吧，喺三十幾度天氣之下入去涼下冷氣，飲杯啤酒，真係好爽。尤其當你行到攰，等睇日落時，小威尼斯入面D酒吧就更加係不二之選。

酒店
我地喺Mykonos只留兩晚，亦唔會租車，所以book左間比較近碼頭區o既酒店，貪佢步行就可以出去玩，所以我地揀左一間叫Madalena o既酒店。點知就出事喇。

首先，希臘人英文差我都可以理解，但呢間酒店o既肥婆receptionlist講英文講到鬧交咁，語氣非常差。最重要係，我黎Mykonos係坐船黎，一上船已經打去問有冇人接送，冇o既話點坐車去，我講晒我坐邊架船，邊個班次，佢問返我轉頭係邊個碼頭落船。Mykonos係有分old port同new port，我以為兩邊都好多船上落，事後我先知，其實根本所有船都集中喺new port。但佢當時就話叫我到左先再打比佢，佢到時先再安排車接我，但又唔講洗唔洗錢就收我線，再加上語氣差，我同佢傾完電話都已經一肚氣。等我落左船，搵左一大輪到底我喺old port定new port，最終我要用GPS再加offline map先可以定位到自己喺new port，然後再打去問酒店。最好笑係，由頭到尾佢都冇講接送洗唔洗錢，問佢點搭車去佢又唔講。咁你叫架車黎接我，我咪比你屈幾多錢都得?不過，最後發現new port去酒店其實只係5分鐘車程，而且到我check out都冇問我攞返車錢，我先知接送係免費。

酒店期間，都有一段小插曲。我地房冇露台，但洗完衫要晾衫，咁我地房對出係有個露天common area，諗住食完早餐，又有太陽，就拎D衫出去晾一陣，出去玩先拎返入房。點知肥婆大大聲話唔可以拎D衫出黎晾，叫我地拎返入房。OK，我就當你係酒店policy，唔比人晾衫出黎。點知我地出去玩完返黎，就見到一件二件衫晾晒喺同一個地方，仲要晾到第二朝食早餐都唔見有人黎拎返，而肥婆又唔出聲。咁算唔算歧視我地?

到我地check out時，又有另一件事發生。有個鬼佬，聽口音應該係英國人，同個肥婆嘈。佢話一早打黎留定房，當時電話有個女人應承左比某間房佢，仲quote晒價錢，咁大家agree左，以為黎到就有房，點知比唔間房佢，咁都算，咁咪住D差少少o既房囉，但check out時，竟然charge返本來個價錢，咁點會合理?但個肥婆仲要用D好差語氣o既英文同人地拗，又唔認自己係電話入面個女人，又話酒店咁做冇錯，仲話大家唔係argue，係discuss。OMG，唔係肥就大晒的。我地聽到都覺得好火，何況當事人。

所以呢，呢間叫Madalena o既酒店，我係100%唔suggest。如果係都要住呢間，咁有咩問題就自己同酒店"discuss"喇。

環遊世界(2) - 希臘 - Santorini

希臘喺幻想中係一個好浪漫嘅地方，淨係「愛琴海」呢個三個字已經令人有無限嘅遐想。想像中嘅希臘係有無數藍白小屋，有最靚嘅日落，同埋有聖鬥士星矢入面嘅神殿。咁事實上又係點呢？

今次我就去左希臘兩個主要嘅小島(Santorini+Mykonos)同埋首都雅典(Athens)，有驚喜亦有驚訝。

首先，講講我地行程先。

Day 1-4: Santorini
Day 5-6: Mykonos
Day 7-8: Athens

我地係9月尾去，Total有8晚酒店喺希臘住，如果加埋頭尾同訓機場，其實有10日。

訓機場

我地今次由於日期同時間唔係好夾到其他航班，所以決定由香港飛往俄羅斯嘅莫斯科(Moscow)轉機去雅典(Athens)然後再轉機去Santorini。我地去到Athens其實已經晚上11點左右，而去Santorini班機係早上5點幾，所以我地直頭喺機場訓一晚，可以慳返一晚酒店錢。亦都係因為咁，地先決定搭飛機去Santorini而唔係坐船去。聽朋友講，由Athens坐船去Santorini係要6-7小時，而坐飛機只要45分鐘，不過預埋上機落機攞行李(唔洗出入境，因為同一個國家入面)，咁都要兩三個鐘，但點都快過搭船好多。

其實Athens機場唔大，但坐位唔少，多數都係三連位，但九成都係有扶手位，但淨返嗰一成係冇扶手的，即係話你可以成個人打平覇晒三個位黎訓覺。放心，如果係深夜，冇人會話你，一個人霸晒D位，亦都唔會有人趕你走。不過呢D位真係唔多，要早D霸。而我地就好唔好彩。。。覇唔到。咁點算？機場入面有個好細嘅museum，我見有好多人(我意思係鬼佬鬼妹)就席地而睡。不過，museum唔大，好快就會比人霸晒D位，咁霸唔到又點算？好彩Athens機場仲有M記。我地就決定訓M記，我見有人唔幫趁就訓左喺度，但我地就幫趁左個巨無霸餐，我覺得好抵食，個巨無霸好鬼大個。M記其實好訓過地下，因為有軟櫈，坐喺度訓又得，打橫訓都得～不過衰就衰在M記D音樂好鬼大聲囉，訓得著都叫好好。

租車
我地今次由於會喺Santorini留4晚，而且諗住環島遊，所以一早租定車。上網搵左一輪，有個網站幾好，佢係一個agent網站，可以search晒各大租車公司嘅車，當你揀好要租咩車之後，佢就會落order，等租車公司認投，有人認投就會send返email比你，咁你print返voucher到時拎去就可以攞車。

喺Santorini租車其實好普遍，周圍都可以見到有車出租，唔預先book定都可以租到車。不過希臘流行棍波車，自動波嘅車比較少，所以租自動波車亦都比較貴。但自問唔多揸車唔多，所以都係租自動波穩陣D。

Santorini大部份地區都係比水平高好多，就係好似一個喺海面凸出嘅高地咁，所以由城鎮落碼頭係比較困難，要Z字型行好耐先落到碼頭。

不過唔好以為外國地方D路就好闊好好揸，Santorini所有路都冇紅綠燈，而且地上面嘅白色線都好淺色，好多時根本冇線可遁，完全係靠大家互相禮讓，所以對遊客黎講都幾危險。而Oia呢D最多遊客嘅地方反而條路超窄，好多位啱啱好過到兩架車，但又會有人喺馬路兩邊行，又要避人，又要避車，真係幾難。

租車時，租車公司會問你加唔加保險，如果架車有咩損傷，就乜都唔洗你賠，保險公司會賠。我真係recommend大家要加呢一項，因為我就係冇加到呢一項，而我又真係整花左少少，結果就原本只係一千幾，變左要4千幾。。。都幾無耐。

仲有一樣野要留意，還車時，如果你唔係喺機場還車，例如我今次係喺碼頭還車，咁就有可能搵唔到間租車公司嘅門巿。點解？因為有D租車公司根本就冇門巿喺碼頭。我就咁啱撞正呢個case。我當時去到碼頭還車，搵左好耐都搵唔到間野，問附近D人又唔知，最後唯有打去問(好彩事前出左張歐洲電話卡)，結果，佢叫我將架車求其泊喺public area，然後將車匙放喺櫈底，然後閂埋門走人，佢地自然有人黎收返架車。我估唔到咁都得，咁我早知當初book車就mark早D還車時間，咁又可以平D。

世界最美日落
Oia嘅日落被譽為世界最美日落，我地就日日都去左睇日落，的確好靚。我地當然都影左好多相，但要留意係，上午同下午太陽方向唔同，好多時下午去到個景好靚嘅地方就會背光，要上午去先會影得靚。事實上，Oia大部份地方都係上午影會靚D，而且Oia其實好細，D路又窄，咁上午就會少人好多，又冇咁熱，所以我地都有兩日係一早就去影相。

Santorini除左喺Oia可以見到好靚嘅日落之後，聽講Fira(Thera)都可以見到，令外仲有島最南端嘅燈塔，同埋山頂最高點，仲有就係下面提到嘅酒莊Santo Winery。我地有去燈塔但其實上面好細，企唔到好多人，我都係影左幾張相就走。而山頂就有間修道院，對出就見到成個島嘅全貌，我地冇喺呢度睇日落，但我諗一定都會好靚。

沙灘
我地去左島東面嘅黑沙灘，呢度有一條好長嘅街，成條街都係酒吧，餐廳，同商店，我地來回行左一次，已經行左超過一個鐘。要留意係，呢度冇乜地方泊車，有個停車場泊左之後，有個人走黎話要幫趁佢間餐廳先可以喺度泊，咁其實我都冇乜所謂，反正都要食野。

除左黑沙灘，仲有個red beach同white beach，不過原來呢兩個beach揸車係去唔到的，一定要行山過去，我地遠望過去又覺得冇乜特別，所以最後都係放棄左。

食物
希臘嘅地道食物唔洗諗，對亞洲人黎講係好難食的，而且真係唔平的，所以唔好期望咁大。我地亦都帶左大量即食面，可以慳返伙食費。

不過其實希臘啤酒係ok的，比德國啤酒淡，幾解渴，Oia附近有大量酒吧，行到攰時可以坐低飲兩杯。

另外，如果識得搵，其實Oia都有好味嘅餐廳。不過就比較貴，例如呢間叫Katro嘅餐廳，我地walk-in入去叫左個beef fillet，真係好味到震。如果一早計劃黎呢間野度食，最好早幾日預早book位，因為間間餐廳都好少位，尤其係睇到日落嘅餐廳，更加係冇可能walk-in入去。

值得一提嘅係Santorini有個好出名嘅酒莊，叫Santo Winery。我地就order左一set 12杯紅白酒，又唔貴喎，都只係廿幾蚊Euro。呢度以品酒為主，如果諗住黎食steak就一定會失望喇。仲有就係，呢度個景真係超靚，不失為另一個睇日落嘅好選擇。

酒店
我地4晚住左兩間酒店，住左一間近Oia嘅，叫Villa Agnadi，己經唔係最貴嗰D，但都唔平，諗住佢貴D就會好D，但原來唔係喎。一入門口嘅感覺係好raw，乜都冇，連最基本嘅mini bar，即係茶或咖啡都冇，亦都冇水煲，就連牙刷牙膏都冇。我地自備左一個好細嘅水煲，但最估唔到係，呢個島D自來水係咸咸地嘅，我估係因為佢地用海水化淡技術黎制造食水。結果，我地被迫出去買水返黎飲。好彩嘅係，有車的話就好容易出去超巿或士多買水，如果冇車，咁就冇辦法。唔好諗住搭巴士好方便，等車等到你傻。

另外，D床其實都唔太舒服，D被仲要係超薄，好似床單咁薄，真係唔知有乜用，夜晚唔想冷親，最好用外套蓋多層喺面。不過幾唔舒服都好，日日出去玩到攰先返黎，都叫訓得著嘅。

另一間酒店我地就揀左喺Fira，諗住近碼頭，唔洗預早好多起身。間酒店叫De Sol，原來係Volcano View Hotel嘅分支。Volcano係一間好正嘅酒店，仲好貴添，間酒店面向大海，入面仲有三個泳池，設施黎講真係冇得彈。而De Sol就喺Volcano對面，但就乜都冇，同埋都簡陋得多，而且酒店好似仲起緊咁，房間面向地盤，沙廛滾滾，所以我地全程都冇出露台。不過亦因為咁，間酒店就好平，但又可以用晒Volcano入面所有設施，包括早餐。所以住De Sol，不失為一個著數嘅選擇。但因為De Sol太新，又冇路牌或招牌，所以我地都搵左大半個鐘，周圍問人，又打電話去酒店問，最後先搵到。

天氣
原本諗住係16至23度，諗住一定好涼，尤其小島比較大風，一定都會涼好多，但點知又好鬼死晒，好似香港三十幾度咁熱咁。不過呢度間中都會落雨，所以一定要帶遮。

Santorini總結
其實Santorini真係好細，由南去北，揸車一個鐘之內一定行得晒，不過要玩嘅野又的確幾多，所以我建議留3-4晚，視乎你有幾鐘意影相，同埋全程唔好轉酒店，一定要租車，最好自動波，亦因為個島好細，講真，唔需要住喺Oia入面D幾千蚊一晚嘅酒店，你只要租左車，住全島最平同最貴嘅酒店其實冇乜分別。

Oia日落真係好靚，有生之年應該會再黎。

IT interview (11) - 古怪ibank interview

最近有朋友得到一個ibank interview機會，都算幾奇特，所以攞出黎同大家分享下。

能夠得到ibank interview機會，本身其實唔算難，但難就難在係間ibank主動搵你，而你係從來冇send過CV去。其實近呢一兩年係多左咁o既機會，原因係佢地每日收到太多CV，而CV質量又太低，要filter呢堆CV，搵個有質素o既candidate出黎，成本都唔低。所以ibank通常唔太重視人地主動send黎o既CV。如果靠job agent搵CV返黎，真係請左個candidate，又係要比一大筆commission。由於近年LinkedIn呢D類professional area o既social network大行其道，喺上面好容易就search到高質素o既人材，所以ibank呢類公司o既HR開始改變策略，主動出黎搵人，主動叫人黎interview。事實上，咁樣搵人係非常有效率同埋低成本。

講返我個朋友，佢收到某大公司o既email，話佢係perfect match，問佢有冇時間傾傾。當佢聽到話佢係perfect match，其實都覺得怪怪地，一來佢冇做開ibank，二來佢未見過有人用D咁o既字眼，雖然佢有D飄飄然，但佢其實都唔太相信間ibank會請佢。不過點都好，咪當去見識下囉。經過兩輪phone interview，一輪面談之後，終於去到final interview。黎到呢個時候，其實間公司都幾神秘，唔講做咩project，又唔提job details。當個朋友同我傾呢段奇遇o既時候，我都覺得好奇怪，唔通真係好似Google或Apple咁，做D好前衞o既project，唔比得人知??

Final interview完左之後我朋友話佢非常失望。佢一邊同我傾，一邊喺度講原本諗住間野幾好乜乜乜。以為佢地話佢係perfect match，咁應該好肯比錢請佢，而且咁大間公司，bonus應該都唔少，幾個月應該走唔甩，又諗住佢地乜都唔講，個project應該好秘密，咁一定好challenging。

結果上到去佢地office，同條interviewer傾左兩句就已經覺得唔對路。佢首先發現，條友唔識IT！我朋友即刻心裡面OMG左一聲，唔知點in落去。最搞笑係，個interview不停問D typical interview questions，例如你o既強項係乜？你最弱係邊一方面？你打算五年之後變成點？由於我朋友已經熟讀我之前寫o既文章，呢D問題當然一早有準備，但佢仍然覺得呢條友唔係IT人，自己好似唔係in緊IT工咁。最重要係，呢D問題根本係問左等於冇問。成個interview，唯一有少少meaningful o既問題就係一條IQ題。題目係：我有一架珍寶客機，你可以用任何方法，幫我量度架飛機expect weight。

答案係乜自己諗，因為太過簡單。我朋友直頭話佢問D咁o既問題係侮辱緊佢o既智慧。

Interview後，當然唔會有下文。但我同我朋友都估佢地其實唔係有咩秘密project，而係佢地根本一個IT人都冇，所以根本寫唔出job details。我心諗，嘿，難怪job agent有咁多生意做。

投資出路 (2) - 外地樓巿 - 日本

日本經濟差左好耐，已經係眾左周知o既事實。近年瘋狂印銀紙，令日元貶值，帶動出口及旅遊等各行業，從而令經值復活。香港人咁識精打細算，兌日元6算之下，基本上買乜都打左個折，當然不停去日本shopping啦。但除左吃喝玩樂，仲有冇諗過其實日本都可以做投資？


近來無論網上同電視，都不停討論買日本樓投資o既話題，到底係咪真係咁好？回報又有幾高？同埋有咩風險呢？

投資日本樓最大原因，當然係因為平靚正啦。最近睇一個電視節目，提到香港樓價未來趨勢。節目中，某地產大亨估計，2016年8月，300萬樓會消失。即係點平o既樓都好，冇400萬都買唔到。就算做盡樓按，以而家要4成按揭黎計，都要有160萬。計埋經紀佣金，印花稅，傢俬裝修等，點都要真金白銀拎200萬出黎先買到。但係，如果我有200萬現金的話，其實喺日本可以買到四五層樓收租啦。

以今時今日滙價計算，1000萬日元大概等於62萬港元。 而一般東京200呎左右單位其實大概只需800萬日元，即50萬港元左右就買到。視乎唔同地點，仲可以再平D。不過，200呎咁細，買黎有乜用？其實日本人好多都係郊區長大，讀完書再搬出巿區工作，所以好多時都係單身一個人，入巿區租屋住。睇得日劇多的話，都會明白日本人都係鐘意租D細細地夠住就得o既單位。所以反而200呎左右先容易出租，如果太大，反而日本人反而覺得冇需要，同埋會嫌貴。

講咁多，買日本樓咁平，咁回報又有幾多呢？日本樓出租一般5-7厘真係走唔甩，但好多網站都寫有8-10厘，其實係因為未扣減開支。日本買樓其實有好多乜費物費，例如固都稅，修繕金，仲有代管費等。其實一般黎講，上網見到見多厘，減返2厘左右就同實質回報相近。不過，我通常會減3-4厘黎睇，因為有時買左層樓未必會有住客，等放租都預左要兩三個月，而且有時間屋有野壞左要維修，都要出返少少錢，所以我都係會比較保守，不過幾保守都仲有5-7厘，其實都算幾高回報。

回報高，風險高唔高？日本出名有地震，尤其311之後，大家對日本地震驚左好多。唔想有呢D風險，唯一方法就係唔好投資喺日本。如果要投資就預左有可能有天災人禍o既風險。不過，亦都係因為日本地震得多，日本樓好多都有防震設計。日本樓防震都有分級數。日本法律有明文規定，1981年後落成o既新樓要有6級耐震，而2000年後落成o既新樓就有7級耐震，所以又唔洗話咁驚o既，最緊要睇清楚係邊年落成啫。

關於日本樓，其實仲有好多細節要留意，下次再講。

投資出路 (1) - 外地樓巿

小弟喺finance呢個行業打滾左一段唔短嘅時間，其間所見所聞，我相信對一D對投資有興趣嘅朋友可能會有所啓發。雖然小弟只係做IT，但工作時亦都接觸到唔少經紀，RO，甚至財經演員。一般人可能以為佢地係一班好有料嘅人，佢地講乜就信乜，但如果佢地講嘅野100%中晒，呢個世界仲邊有窮人呢？當然，有料嘅人唔係冇，但係堅料通常留比自己，佢其實真係冇理由要同你分享。

小弟雖然因為興趣而考左一七八，即係已經合乎證券經紀牌要求，但識嘅野只係皮毛，高深嘅野只係知少少，識得唔多，所以我自己投資都同一般人一樣。講真，香港股巿，小弟玩左咁多年，而家真係唔識玩。內地股巿就更加係政策巿，阿爺要升就升，要跌就跌。我地呢D小股民真係好無奈。

其實，投資一定有風險，想賺得越多，風險就越大。咁如果我只係想有隱定收入，咁又可以點呢？巿場上投資工具好多，如果想有隱定收入，又唔想有風險，最大路應該都係做定期。但而家D定期，息口仲低過通脹，點會有錢賺？就算人民幣定期，2015年頭4厘幾都已經係近期最高點，之後一直回落，基本上真係冇乜肉食。咁ibond呢？ibond聽落好似好正，至少叫做可以同通脹打成平手，而且最低都有1%，所以唔怕由通脹變通縮。但諗深一層，同通脹打和，其實即係賺唔到錢，購買力根本就冇增加到，所以即係得個吉。

咁買樓收租又如何？雖然收租有十幾厘回報真係唔出奇，但而家樓價高企，加上政府政策令香港人買樓門檻不停升高，有能力上車嘅人真係比以前少好多，仲點可能有一層自住樓之外再買一層樓用黎收租？呢D機會似乎唔係一般普通人的。

咁如果我比唔起4成首期買樓，但又唔想投資回報只係同通脹打和，甚至想賺少少，令筆錢可以越滾越大，到底有咩方法呢？依小弟之見，買樓收租就係最好嘅方法，但唔係香港樓，而係外國樓。

其實香港樓巿己經升到好高，到底有幾高？咪就係世界最高囉。全世界最貴嘅樓就喺香港，咁又點會買得起呢。如果想買樓投資，又點會喺最貴嘅地方度做？就算你做乜野生意，第一件事就係諗成本架啦。喺香港買樓收租，就等於喺旺角西洋菜街賣魚蛋一樣，成本咁貴，賣幾多粒魚蛋先平手？淨係諗點樣可以唔蝕，都已經係一大難題。唔係冇人做到，但一定唔係個個做到，我唔會假設自己係超人黎做投資，我只會假設自己係一般小巿民。如果發現成本貴，香港咁大，點解唔去第二度賣魚蛋呢？咁香港樓咁貴，點解唔去買外國樓呢？

我相信對投資有興趣嘅朋友一定有聽過買日本樓收租。事實上，日元跌得咁勁，對香港人黎講，真係買乜都打左個折頭。而且，日本經濟已經差左二十年，樓價更加係跌到低無可低。一間二百呎嘅日本樓，其實一般都只係要40萬港幣左右，視乎地區同其他因素，如果好運遇到筍盤，低10萬8萬唔出奇。喺香港，一層普普通通嘅樣都要400萬。而喺日本，用400萬你可以買到10層樓囉。而出租回報率就一般都有6至7厘，有D地理位置好嘅，可以高到9厘10厘都有。

不過，香港人偏向保守，投資外國樓比較難接受，而且一般人對法律同手續都唔熟釋，有幾多收費又唔知，點知會唔會比人呃呢？小弟睇法係，學多樣野冇死，而家日本樓投資講座已經越來越普遍，唔洗比錢就有野學，何樂而不為？

不過，外地樓唔一定指日本樓，其實投資喺台灣，澳州，德國，英國，紐西蘭樓巿嘅都大有人在，因為香港呢個地方已經越來越難搵錢，投資出路就自然指向外地。如果一成不變，只獨守香港，到回歸50週年先來醒覺就真係太遲喇。

轉工 X 11

寫blog寫左一段時間，有好幾篇文章長期受歡迎，而topic主而都係講CV、interview等等。不過估都估唔到，原來爆得最勁o既係轉工 X 10。

今日，我又轉工了。我知道大家第一個反應係問：咁快又轉？

係，就係咁快。唔係我唔想做得長，而係有時真係身不由己。之前都講過，我同大家一樣，每次我都想做得長，每一次我都好努力去為公司付出。我唔想講間公司係咪好差，亦唔想講老細係咪好癈，因為每個人o既觀感好唔同，我覺得差，可能你會覺得好。

第11次轉工，我以為好難搵工，原來唔係。我諗，大家會對呢個問題好有興趣：唔同公司對一個轉工11次o既candidate有咩反應，會問咩問題。

講真，轉兩三次工o係IT界黎講係好正常，好普遍。所以大部份人都經歷過轉兩三次工o既情況。但轉11次工，應該好少人試過。究竟轉左11次工之後，D人會點睇你？咁jumpy，係咪真係仲有人肯請？

我而家就親身示範左一次。係有人請的。

一直以來，我轉工都係先辭職後搵工。因為返住工實在好難去interview，去in一次，請一日病假，仲算ok。但一個星期in兩三日，一個月in五六次，你點請咁多病假？就算你真係可以請咁多日，我諗你未搵到工，公司已經估到你有去意，你估佢仲會唔會加你人工，派bonus比你？

我都係人，我同大家一樣，都希望搵左先走人。但同時我又唔想做得太明顯，始終我呢個老細炒人係亳不手軟同埋可以不顧後果的。所以，我其實一直以來都會keep住send CV出去，keep住interview，一來可以update下自己，知道個market點變化，二來，如果咁啱遇到一個比而家份工更好嘅機會，我就會多左一個選擇。做人，永遠都要有Plan B。

我in人，從來都未試過in一個轉左11次工o既人。所以對我黎講，我出去interview，人地問我嘅問題都幾有參考價值。最多人問嘅問題係，呢份工點解唔做落去？嗰份工點解唔做落去？事實上，自從第四五次轉工之後，每次interview都會問呢D問題。辭職，當然有原因。但真實原因好多時都唔可以喺interview時講出黎。例如，個老細係死蠢，唔識management，又唔識IT野，又鐘意自把自為。呢D野，你喺interview時講出黎就真係死梗，因為interviewer唔知你當時情況，而只會覺得你同人夾唔到，同埋會好唔聽話，再加上，interviewer本身都係人地老細，你咁講，佢就會對號入坐，咁你對指住interviewer個鼻黎鬧係冇乜分別。所以，去interview之前就要諗好每一份工離職嘅理由。例如工作環境問題，交通唔方便，或者想轉換下工作性質，等等，呢D雖然擺明係耍佢，但佢實在冇理由減分，亦好難再追問落去。

精明嘅interviewer會仔細問我每一份工做D咩，而且幾乎每一份都問得好詳細，由工作範圍，公司架構，到管理模式，潛在問題，無一不問。某程度上，interviewer其實都學緊野，因為佢做過幾多份工都好，都唔會識得晒所有野。所以有時佢問嘅問題，其實同個interview冇關，答得幾詳細都唔會加分，不過，如果你吹水，佢又聽得出你係求其敷衍佢，咁就算個impression幾好，都會比你破壞左。好多candidate就係死在吹水吹太多。

其實做左咁多份工，見識多當然係好處，但進步得最多o既其實係語文能力。而家去interview真係好多時要用盡兩文三語。睇或寫中英文，我相信做多幾年野嘅人己經有返咁上下，冇乜難度，但要廣東話，普通話，英語三種語言轉換對答，一D都唔容易。尤其香港人，睇英文算多，寫英文都唔少，聽英文都叫有D啦，但就真係好少講英文。而轉左10份工之後，如果仲未能夠掌握兩文三語，我相信呢個人真係好打有限，之前一定呃飯食多。

今次分享住咁多先，下次再講多D！

對Apple已沒有期望

十幾年前，作為IT人，當然有玩砌機。砌黎砌去，最終都只會用返Windows，最多整部Linux當Server用。直到Apple喺香港越來越多人識，而D product又的確幾elegant，跟住就不停買Apple野，包括iPhone, iPad, MacBook Air, Mac mini, Airport Express 等。

圖片來源：Apple網站

今日，Apple產品已經好難再吸引我。喺三月九日發佈會之前，聽到傳聞會有12吋iPad，我已經不感興趣，因為12吋對我黎講實在太大，而且Apple必定用返鋁做外殼，唔會輕得去邊。而且，iPad咪又係用返iOS，新瓶舊酒，無甚變化(雖然最後都冇12吋iPad)。而一直話會出o既Apple Watch，我更加係諗都唔會諗。淨係嗰粒「Digital Crown」，即係轉得o既button，呢個設計我已經覺得好白痴。試諗下，普通手錶要較返啱個日期時間，都要除隻錶出黎先較到，咁即係話，唔除出黎咁用嗰粒制係極度唔方便。如果要經常用，咁就更加係玩自己。

圖片來源：Apple網站

三月九日發佈會，最令人失望係Apple TV竟然冇update。唔通Apple真係要放棄呢個戰場？另外，The New MacBook竟然得一個USB-C。由於MBA續航力強勁，我當年買MBA，第一個原因係唔洗帶火牛出街，而家新MacBook竟然迫我帶分插出街？而且，部機叉緊電咪用唔到external hdd囉？咁如果我想由一個external hdd過file去另一個external hdd，咪又係一定要有個分插？今日o既MacBook同以前咁user friendly o既MBA相比真係差好遠，真失望。

圖片來源：moto360網站

講真，一直以來我都係覺得android比iOS好，因為靈活性高，而且android根本就係一個linux，基本上喺裡面做乜都得。不過好可惜，一開始android機就唔夠Apple機好用，又慢又多bug，所以試過第一代Samsung Galaxy S之後，就轉用iPhone。不過到左今日，好多好正o既android device不停湧現，以smart watch為例，唔少人覺得moto 360比Apple Watch靚好多。而Tablet方面，小弟都覺得Sony最近發佈o既Xperia Z4，可以喺水底用，又輕又薄，設計到單手都用到，比iPad強太多喇。

圖片來源：sony mobile網站

IT interview (10) - ibank

IT界好多人都會以ibank為目標，諗住入到去做就冇死，人工高之餘仲有十幾廿個月糧咁多o既bonus。但你又知唔知想入ibank要經過點樣o既interview？

身邊有唔少朋友都做過ibank，有D仲做緊，有D已經辭埋職出返黎細公司做。明查暗訪之下，得到唔少ibank interview o既資料，今次就同大家分享下。

首先，我諗大家會以為ibank高高在上，interview一定好嚴謹，要過五關斬六將，其實未必o既。據了解，ibank反而未必會有paper test，好多只會口頭問technical野，而且多數係情境問題，例如喺某某情況之下，你會點做，或者有乜乜乜要求之下，你會點design成套system。反而好多vendor都好嚴謹，要你做paper，唔單止係MC，仲會有數學題，IQ題，即場寫code等。點解會咁呢？

其實ibank請一個developer，會明白到呢份工需要o既technology佢未必全部都識，就算識，亦唔會expect佢係專家，所以好多時請左一個人之後，都會比時間佢重新去了解清楚要做D咩，然後會比時間佢去學返需要o既野，慢慢train up佢，久而久之就會有一個好專業o既團隊。不過，technology可以學，但唔係個個有心去學，而且解決問題o既能力就更加唔係睇書睇文章就學到，而係靠經驗。所以佢地請人，就會變得著重於呢一類能力。而vendor公司，請個developer返黎，九成時間都只係揼code，解決問題呢D重任唔會輪到你，而且一般vendor公司turnover都唔細，做一兩年就走係好正常，所以唔會比時間你去學野，亦唔會教你好多野。所以interview時就通常會問technical問題，比大量test你做，務求請返黎o既人都係一返工就可以落手揼code。

ibank o既interview仲有一樣野比較特別，就係會比較著重語言。外資o既ibank，一定會試你英語得唔得，好多時會全程用英文。中資o既就會試你普通話，甚至要你寫中文。唔係怕你唔識寫中文字，而係要你用返大陸中文用語，好多時最難反而係寫中文。

至於點樣先可以得到一個ibank o既interview機會呢？首先，你當然要有料到，然後，你o既CV要寫得好(可以參考小弟其他文章)，最後係，你要搵個agent幫你apply。其實你自己都可以去apply的，不過成功率非常低，因為每日都有非常多人apply，而你只係成個pool裡面其中一個。但如果經agent，你份CV有可能skip左個pool，直接去到IT部門主管手上，成功率大大增加。而呢樣亦係job agent唯一好處。

新一年,新Project

好幾個月冇寫blog,上一篇文章已經係上年o既事。

新一年,想寫新topic,諗左好耐,寫咩好呢? 睇返之前七十幾篇文章,主要寫IT職場o既事,有D係關於管理經驗,有D就同搵工有關,仲有少少係technical D o既,仲有幾篇係測試性則o既小說。而其中最受歡迎o既文章係關於寫CV同interview,我諗係因為真係好少人好似我咁轉工轉咁多次,又in人in左咁多次,所以我o既經驗比較有參考價值同埋比較實用。而且，IT一向都唔係D一做就做十年o既工,所以不停轉工好正常,而轉工就要搵工,要準備CV,所以學寫CVo既需求就比其他行業大。

呢幾個月,雖然冇寫文章,但都收到email問候我近況,其實我覺得幾感動,因為呢個blog其實唔算多人睇,但仍然有人記得我,我覺得已經賺左。

黎緊呢一年,我希望有個新嘗試。我本身係Development Background，一直以來都係寫code多，就算做到管理層都好，仍然keep住寫code(其實係冇得唔寫T_T)。如果有寫開code o既,都會明白咩係open source project。我用得比較多o既language係Java,而Java正正就有非常多open source project的。

先岔開話題一下,最近同一位朋友傾計，提到一個老問題:C++同Java比較，邊隻language快？如果你知咩係C++同Java,繼續睇落去之前,先用十秒諗一諗。

事實上,呢個老掉牙o既問題一直有人問,從來未停過。只要花少少時間,search下,你就會發現無論幾詳細o既比較,總會有缺失遺漏。同一個algorithm,你話C++快?但Java行順左仲快喎。咁你係比較緊頭一分鐘,定係第二分鐘?覆雜程度高o既application,C++快?可能係o既,但你要用一年去寫,Java就只需一個月,咁不如買勁D hardware好過啦。

其實呢個比較一開始就唔應該出現,因為同你問緊IT人工高D定accounting人工高D一樣,唔同情況下,結果好唔同。你話IT人工高D咩?你講緊Bill Gates呀?咁accounting人工都可以好高喎,你唔見big 4 o個D高到人人羨慕咩?比較C++同Java,就好似比較緊AMD同Intel CPU一樣,唔同用法唔同結果.亦好似比較Linux同OS X一樣,好睇你比較邊一方面。

無論如何,我一直都寫開Java,深明Java o既缺失。由於Java o既standard library係for general purpose,所以唔可能任何情況下都又好用又快。所以好多比較大o既公司都會自己develop一套代替standard library o既工具,我寫左咁多年Java,又點會冇呢。

所以,我頭先所講,新一年新嘗試,就係想將呢套library open source左佢,令同業受惠。由於呢套library係針到金融系統去優化,所以用o係其他地方未必會方便好用,但亦可以作為一個參考。

不過成個project啱啱先構思好,所以仍然需要時間去準備,有消息時會再o係我個blog公佈。希望到時會有人支持下~黎打下氣都好~