環遊世界(11) - 印度 - 孟買

一講起印度，我諗九成九人都會即係諗起呢個國家有幾污糟。第一樣野應該係諗起印度咖喱，第二樣野諗起佢地係用手食野，第三樣野應該係諗起食洗疴都喺恆河。而網上亦都流傳好多謠言，例如話去印度玩，不出十日一定肚疴云云。

喺咁o既認知下，當我知道我要去印度公幹兩星期，真係覺得自己係去送死。

由香港直飛印度o既航班唔多，好多都係夜機，而我坐CX，時間都一樣係咁差。預計到達孟買機場時間係23:55，冇人冇物，又冇當地sim card，仲要咁夜，當然會擔心人生安全。喺呢個危險國度入面，我都怕第一晚就已經比人劏死牛，錢事少，命事大，所以我喺香港就已經叫定酒店安排機場pickup。不過，過得關黎，拎得行李黎，都已經點幾鐘。當我一出機場門口，多人到呢。。。比香港機場更虛冚。整個畫面都係人，而大多數係舉住牌黎接人的。好比較好彩，好快就搵到酒店司機。但當時已經係深夜兩點。。。香港時間04:30。

由於盂買南部最近都有事發生，好似有槍戰，所以孟買街道上不時會見到軍人拎住衝鋒槍周圍巡邏，仲會有軍車，裝甲車等出現，尤其大街或大商場，就更常見。而不論大小商場，酒店，或商業大厦，全部都有守衞把守，仲有金屬探測器，同X光機，好多時仲會搜身。

想買sim card，喺呢度一Ｄ都唔容易，首先，你要係本地人。然後，要去電訊公司，例如vodafone，去申請一張新sim card，要比證件副本，然後要等三五七日。就係咁簡單。

印度係一個好貧窮o既國家，人口最多o既國家係中國，而印度係排第二，有十億人口，但國家唔大，所以其實人口密度好高。而大部份o既印度人都係好低收入，甚至冇收入。好多人霸路為家，行人路一早比人霸晒，人要行，就要行車路。而呢度比大陸更混亂，人車同行，車同車之間夾雜行人，見到都覺得牙煙。

就算孟買係大城巿都好啦，街上面都係遍地垃圾，氣味同垃圾房冇分別。所以本地人都好少出街行，假日都只會留喺屋企。由於基建太差，就算有metro都好，出入口唔多，地點亦唔方便，所以搵到錢o既就多數會揸車，而唔會撘metro。亦因為咁，孟買幾乎任何時間都係塞梗車，返工放工時間就更加唔洗講。

而收入低微o既本地人就會撘巴士，由於印度曾經被英國統治，所以呢度都有單層同雙層巴士。佢地o既巴士仲係用緊熱狗巴士，而且由於每次都載人太多，基本上唔會閂門，D人就會迫到出門口，但車照開。火車都一樣，車門唔會閂，就算高速行走時都一樣開住門。

呢度的士一D都唔貴，坐45分鐘至1小時，大概450盧比，即係50蚊港紙左右。所以我主要都係坐的士。不過呢度叫的士可以用app，又或者可以用uber叫車，如果自己出街截車，反而好大機會比人呃錢。其實係一個咁窮o既有D咁先進o既service真係好不可思議。

食方面，唔講都唔知，原來有大概50%印度人係因為信仰而食素的。九成九印度人係唔食牛的，因為佢地覺得牛係神聖的。部份人唔食豬。少部份人係乜都食。所以一大班人出去食飯係幾麻煩的，同埋買手信黎印度請食，最好係素的。而餐牌上一定會標明邊D係素，邊D唔係。

印度人都會食飯，但佢地飯其實係長身同乾身的，如果同珍珠比較，呢兩種米就係兩個極端。除左飯，印度薄餅都係主要食糧。不過飯又好，薄餅又好，印度人主要都係撈醬汁一齊食，仲要係汁多過飯咁食。醬汁主要係咖喱，原味係好辣好咸的，同埋加左好多不知名o既香草。而大部份o既印度食物都係濃味為主，而且好唔健康，香港人應該好唔習慣。

印度人用手食野係人都知，但有冇諗過佢地食野前後會唔會洗手？答案係NO。無論何時何地，之前掂過乜都好，佢地都可以即時用手食野。我相信佢地有超強抵抗力。。。而食完野之後，我無見過佢地洗手，然後又可以繼續揸車，或者做其他野。喺我眼中真係好amazing。

不過，其實印度食物雖然濃味，但並非唔好食。當然，佢地D咖喱我真係食唔慣，但我去左一個叫Pheonix Mall o既商場，有一間美式餐廳，我order左個ribs黎食，講真，唔差。印度人整醬汁的確有一手。

之後，我又喺酒店叫room service，i mean 叫野食，其實唔錯的。Fish and Chips太咸，不過炸得好食。Buffalo Wings真係正，不過太辣，但我第二日都encore左。Blasted Chicken唔太好，雞肉唔夠滑。呢度D cocktail唔錯的，佢地較酒都唔差。

唔係以為我真係食得好豪，其實呢度紙水低，乜都好平。我請左我team食burger，我自己叫左個cheese steak，total五個人，你估下幾錢？

結帳大概3500盧比，大概唔洗400蚊港紙。你話平唔平？

最後一日留喺孟買，我安排左冬甩比全office同事，大概要120個，你又估下幾錢？大概係6000盧比，即係600-700蚊港紙。平均一個冬甩大概係5蚊港紙，其實算貴，因為呢度叫一個外賣飯，大概都只係150盧比，即係十幾蚊港紙。

咁你又估下呢度買樓要幾錢？我問過同事，一般大概1000蚊一呎，即係香港樓價10分之1。但，又有邊個想喺呢度住呢？

最後我想講，喺呢個兩星期o既行程，乜都食過晒，但我冇肚疴。不過我都係唔建議大家去印度玩，因為真係冇咩好玩。

此文章在jobsDB刊登

I Am Legend (4) - 大學聯招JUPAS

好耐好耐之前，其實冇聯招呢回事。你想入港大，要考港大入學試，想入中文，就要考中文入學試。之後改為好似英國咁，一個A-Level考試就搞掂，唔洗咁辛苦。而到左而家，A-Level已經同CE合併為一個DSE考試。即係話，上左中學之後，學生只需要考一個公開考試就可以上大學。

過兩日就係放榜前最後一次改選o既deadline，我諗其實好多學生都仲係心大心細，唔知點揀好。父母又叫自己揀D搵到錢o既科目，自己知自己事，能力同興趣未必啱讀，想讀其他野，父母又堅決反對。問朋友意見，又個個都唔同，有人話讀Business好，出到黎做野，搵到錢當然好，就算搵唔到，至少都可以坐office，唔洗日晒雨淋。有D朋友就話讀IT好，而家乜都講IT，讀完出黎唔怕搵唔到野做。仲有D朋友，就話讀大學梗係揀自己想讀o既野黎讀，如果唔係第時實後悔。講真，香港咁多間大學，又咁多科可以揀，D學生有時連邊科讀D乜都唔太清楚，要喺咁多科入面排一個list出黎其實真係好難。我自己當年都一樣，唔識揀科，好彩最後都冇揀錯。

量力而為

揀科千萬唔好過份自信，一定要量力而為。例如，你明明估自己最多只有一個A(而家好似叫5星星)，咁你就千萬唔好揀醫生律師呢D科目。因為你明知自己唔會入到醫科，你又去揀佢做第一志願，咁即係話你已經放棄左個第一志願，而放榜結果係，全香港學生o既第一志願入就o既就比佢地入晒先，然後先會再處理第二志願。你諗下，就算你第二志願係揀一科你志在必得o既科，都好可能已經冇位。如果真係咁，又要派晒全香港學生o既第二志願，先會再處理你o既第三志願，咁你覺得呢個時候仲有幾多科係有位？

興趣行先

無論你父母老師朋友點講都好，最重要係揀興趣。點解？我問你，如果你對文學有興趣，我叫你讀Physics，你會點？一定讀得唔好。就算你文學係世界第一都好，去到Physics o既世界，你仲諗住可以世界第一咩？第二三四都唔會有你份。想上到大學之後仍然讀得好，唯有揀自己鐘意讀o既科目。你鐘意呢科，自然會想知多D識多D，就算上堂都會專心好多，成績必然唔差，出黎搵野做亦都相對冇咁難。

我仲記得當年我有好多同學都想揀社工，原因係社工長期都唔夠人，而相對係高人工的。不過，到三年大學過左之後，個世界已經唔同晒。個個都有相同諗法，導致社工太多，所以好多人搵唔到野做，結果迫住要轉行。

而我自己，好彩一早搵到自己興趣，入大學時我已經揀左Computer Science。雖然讀書讀得辛苦，出黎做野更加辛苦，但我一直冇後悔過。

條條大路通羅馬

講真，讀書同工作冇必然關係。你幾鐘意IT都好，喺大學讀IT讀到幾叻都好，出黎做野都可能會發現原來唔鐘意做呢個行業，然後會轉行。我有好多同學都係咁。又有D，讀又唔係讀IT，做又唔係做IT，但做左幾年又會轉行做IT喎。所以無論你揀左咩科，放榜又真係派左咩科，其實冇你想像中影響咁大。到你出黎做野先發掘到自己興趣，到時再轉其實都問題不大，但當然，你會浪費左幾年，但青春本來就係攞黎浪費的。

不過講到尾，條命係自己o既，無論揀乜都好，最緊要唔好後悔。

勝者為王

ViuTV開台時，其實我冇乜點留意佢有咩節目，因為我一心諗住睇HKTV，而佢又攞唔到牌，而ViuTV就好似一個亞視o既代替品咁。不過，《G-1格鬥會》係我第一個留意到o既ViuTV節目。講真，港女出名錫身，小小刮損扭親，都已經o係facebook post晒相，嗌晒救命。而G1又真係搵到一班港女出黎簽生死狀，互相打個你死我亡。

尋晚G1終於打完，講真，一直睇左咁多場比賽，我始終覺得Vangie會一直贏落去，可惜佢原來已經傷到打唔到，睇唔到佢攞金腰帶，真係覺得有D可惜。不過，玩得比賽，就有輸贏，無論咩原因，係因為喺台上打輸，定係受傷打唔到，我都覺得贏就係贏，輸就係輸。而Hazel當然係實至名歸，咁多個之中，我諗真係只有Hazel先有能力同Vangie分高下。不過，其實喺初期其實我睇好龍小菌，單單因為身型同體重。你諗下，龍小菌同Rika對打的話，唔講技術都知龍小菌贏九條街。不過，比賽o既野，唔係只講外型，而係要睇埋當時身體情況，心理質素等。

決賽前，Margie未打其實已經輸左。佢其實根本已經唔想打，一心只諗住搵個藉口退出。而佢個教練真係好野，佢真係motivate到佢上台打，打到兩個回合已經唔錯。Margie隻手比Hazel扭傷呢個係事實，但有幾傷只有佢自己知。我唔係話佢扮傷到打唔到，而係佢個氣勢同之前幾場比賽相比真係消失於無形。講真，佢第一次同Hazel同打雖然輸，但輸得型，輸個之後，仲有個氣勢喺度，仲講得出「邊度輸左，就要邊度企返起身」呢Ｄ說話。但到決賽，好明顯佢已經變返一個港女。

勝者為王。所以就算Margie係咩原因而輸都好，輸左就係輸左。幾多fans喺facebook同你講贏嗰個係你，都只係嘥氣。

勝者為王。呢個世界就係咁現實。

支持毛記! 支持王維基! Yeah! 啪啪啪!

寫左咁耐blog，原來只係寫左99篇。而呢一篇係第一百篇。

諗左好耐寫咩好，好多題材都喺腦裡面飛過：講CV？講搵工？講讀書？講IT？講management？講投資？定係再次寫小說？又或者開新topic講愛情？講男女關係？

最近我做左一件好耐冇做過o既事－－睇電視。我喺電視面前坐左三個幾鐘，而我唔係因為打機而坐咁耐，其實事後真係有Ｄ驚訝。

我對毛記電視同香港電視一樣，都係咁感興趣，無他o既，大台真係已經做到好悶，我已經好耐好耐冇睇大台喇。而當初香港電視出現，真係無論對我定對所有香港人都係有好大衝擊。亦都導致唔係太睇電視o既我又睇返電視。雖然毛記電視同香港電視一樣都係冇免費電視牌，但作為觀眾o既我又唔覺得分別真係咁大，可能對佢地o既收入影響會大Ｄ。

而ViuTV，我當初都唔太接受，因為始終佢係NowTV o既免費版，就好似一間報館，已經一直賣報紙賣左幾十年，出份免費報紙通街派，質素又會有幾高？其實就算到而家我都唔太鐘意佢Ｄ節目，始終太過守舊。不過有Ｄ節目係特別吸引我o既，例如G1格鬥會。講真，ViuTV黎講，我好似淨係會追呢個節目。而港台電視其實都有Ｄ幾informative o既節目，不過你叫我坐幾個鐘睇佢，應該好難。

不過，前兩日ViuTV直播毛記呃like賀台慶，我真係一直有坐定定睇到尾。講真，有驚喜，亦有失望。不過，我係支持的。就好似王維基咁講，佢地得咁少資源但做到咁多野，真係唔簡單。

講到王維基，佢喺毛記台慶當日宣佈「考慮」參選九月立法會選舉，呢樣真係估佢唔到。由HKTV開台前一直留意佢，甚至佢每日寫o既blog我都有睇晒，只係可能中間miss左幾日。我知道佢以前有涉足政治，但我一直都以為佢會做返個純情小商人，但真係估唔到佢有參選立法會議員直選o既諗法。

毛記訪問王維基:
http://www.tvmost.com.hk/201605061212_video_mostnews_wikipediawong

我覺得香港真係好需要有D人係真心為香港人發聲。而王維基，我覺得係一個比較真o既人，佢講得冇錯，香港人好多時都係得把口，好似我咁，只係一個鍵盤戰士，但我手上都有選票的。我把口唔夠力，咪投票比可以代表我o既人囉，如果可以的話，我都想投票比王維基，又或者可能我又比佢呃左掛。不過比佢呃，總好過比其他政棍呃。

轉工 X 12

上一次轉工到而家啱啱好一年，你問我點解又轉工的話，我會答你，我一年前已經預左會轉。講真，我一向唔太鐘意做大公司。好多人鐘意做或好想做Bank/iBank，冇錯，benefits係幾好o既，年假又多，我有廿幾日，喺IT黎講已經係羨慕死人，仲想點？不過，我入去之前已經預左係做粒齒輪，所以走係必然的。咁做乜仲要入去？因為我都好耐冇喺大公司做，我其實都想測試下自己能力入唔入得返大公司。講真，做得細公司多，入大公司係易過食生菜，因為佢地要求講到幾勁都好，其實都係要你做粒齒輪。做齒輪，即係人地轉你就跟住轉，只要你有最基本o既轉動功能就做到。

入大公司並非想像中咁困難，好多時佢地interview都係東拉西扯，乜都問，乜都要挑剔下。但實際入職後，原來全部都係吹水的。做得兩三個月，你就會更加明白當初in你o個D人都係冇乜料。講真，喺細公司打滾三五七年，能力點都有返咁上下，入大公司唔難。

不過，好多人想入都入唔到，係因為唔識吹水。你知啦，IT本身就幾自閉o既職業，日日對住D電腦，最叻都係打潮文啫，要面對面吹水，真係會考起的。而呢方面，我真係要多謝好多年前一份暑期工。所謂暑期工，其實只係比人呃左去做傳銷。做傳銷要做D乜？第一件事梗係要比人呃，要比錢，要開啲唔知咩會藉，最梗要係你要不停叫人入會。不過我都唔知叫唔叫醒目，我扮到好想入會，但我話我冇錢。講真，學生哥一個，冇錢好正常。結果，sell我入會嗰兩個人幫我出埋錢。我諗我講大話其實都幾叻。呢樣野，我諗係韋小寶教的。

我記得我入會之後，我每一日都去學點sell人。我諗同好多financial planner學o既野一樣，要知道一張枱邊個座邊度，邊個向出邊個向入，三個人時又點坐，對方帶多個人黎又點坐。然後幾日不停坐落人地枱度學下人地點sell，直至自己都背得出為止。

之後，因為成個plan我已經背熟晒，連對方會問乜我都心中有數。所以我開始sell人，然後就開始爆了。我下線爆得好勁，甚至有好多人都比我sell到要跟我一齊sell。成個場我最後生，所以好多時都比返後生o既客我sell。我好快就帶住一班全部不足二十歲o既人喺度sell野，而當時我只係入會一個月。

我想講，我做呢份「暑期工」前都係同大家一樣，日日對住電腦，用手多過用口，唔太識講野。但其實IT人唔係天生唔識講野的，只要經過訓練，一樣可以做sales屎。

講返轉頭，我轉左咁多次工，除左要靠自己能力之外，其實吹水同樣重要，尤其當你想入大公司，吹水係必須的。如果有機會的話，真係要好好磨練下。

I Am Legend (3) - 世紀賤男

我一向好少睇八掛新聞，亦好少留意娛樂圈o既野，好多時Ｄ人話邊個老婆係邊個富翁個女，邊個係邊屆港姐老公，我都一向唔知。不過最近viuTV開台，香港從此唔係一台獨大，咁我當然都要支持下。

話說睇左蘭子講賤男，而嘉賓係陳莉敏同周永恆。如果我唔睇，我都應該會一直以為周永恆自己都開左間公司，點都會識大體。點知，原來佢仲係一個小朋友。

成個節目，我只係睇到幾點：
1. 佢不停想用英文去表達，但佢反而搞到自己好似唔識英文咁。
2. 佢話佢只係讀到中四。
3. 佢認左佢有打老婆。
4. 節目錄影期間，佢不停講粗口，其中有一句已經嘟到我聽唔到佢講乜。
5. 佢做做下節目離座走人。

講真，可能你會覺得我太主觀去睇呢件事，但我覺得大家可以睇返呢個節目，我諗大家o既觀感應該唔會差太遠。

佢睇咪賤男，我諗大家心中有數。但我想講，如果佢當初讀多Ｄ書，個結果係咪會唔同？可能一樣掛，但至少唔洗連用幾粒英文字都比人笑。

讀書唔係最重要，但喺人生路上一定幫到唔少。讀書唔一定細細個讀，大個左，出黎做野，甚至五六十歲，都仲可以讀。但大個左都唔明讀書有幾重要的話，就真係好唔成熟。

大公司 vs 細公司 (5)

如前所說，喺大公司同細公司做，最大分別在於喺大公司做o既話好多時你會困喺一個位置好耐，而你只係千千萬萬個齒輪中o既其中一個齒輪，而喺細公司度做，好多時係乜都要做，乜都要識，乜都關你事，瀨野實同你有關，但成就歸老細。咁如果搵工或轉工的話，應該點揀？

我識得好多人都會揀大公司，會揀細公司o既真係少之又少。但我覺得我仲好後生，我團火仲未熄，所以我始終都會揀細公司。我轉工超過十次，幾乎每一次都有得揀大公司同細公司。就算我幾想揀細公司都好，人工同benefit一定係大公司好Ｄ。所以我好多時都會揀大公司，除非，對我黎講細公司係一個機會。舉個例子，我好多年前都仲係做緊technical role，同好多ＩＴ人一樣，主要寫code。我亦都同好多IT人一樣，好想轉做Manager Role，可以un un腳點人做野。但我覺得投資應該睇長遠回報，而工作係人生中其中一項最重要o既投資，所以更加要睇得長遠。所以，只要有一個機會對我黎講係大過benefit的話，無論份工幾辛苦都好，我會亳不猶豫揀機會。所以，好幾年前我為左由Technical Role轉Manager Role，我揀左細公司，因為大公司比唔到Manager Role我。之後幾年都一直喺唔同business area做management工作，甚至轉返入大公司做Manager。如果當初揀左大公司，我只會一直喺入面浮浮沈沈，唔知幾時先升我上Manager level。而我o個次揀左呢個機會，我到而家都覺得我冇揀錯。

其實鐘意喺大公司度做係冇錯o既，只不過我實在聽過太多又鐘意喺大公司度做，但又不停埋怨間公司點點點。最近聽過一個例子，有個新同事有Ｄ野唔太清楚，而佢上司一開口就笑佢，仲要串佢話點解你做Manager都唔知呢Ｄ咁重要o既野。呢位同事就解釋，因為公司從來冇人講呢Ｄ野佢知，training又只係不停講policy，甚本上冇講過工作相關o既野，所以佢當然expect係佢上司話佢知要點做，就算唔係上司講，都應該係其他同level o既同事講。但事實係， 佢上司同所有同事都諗住有人會話佢知，有人會教佢，亦有Ｄ同事以為佢原本就知，所以個個以為唔洗話佢知。不過，到左需要用到相關知識o既時候，佢地先知道原來佢係乜都唔知。呢個其實亦都係好多大公司o既通病，因為當你入左一間大公司工作，入面Ｄ人多數做左三五七年，甚至十幾二十年，佢地唔知出面個世界原來係非常唔一樣，所以佢地會expect你坐得呢個位，應該識晒所有要識o既野。你唔識，佢地只會覺得點解你咁都坐到呢個位，但又唔會諗下其實佢地係應該要brief下佢，甚至就算brief左，都只係程序上需要，policy上有呢個要求，而內容足唔足夠，係咪brief完就真係做到野，佢地根本唔會深究。

所以我成日都話，每一間公司都係一口井。如果只係喺一間公司入面做，你只會係一隻井底之蛙。如果醒少少，肯轉去另一間公司睇下係點o既，你至少見過兩口井。想見得晒呢個世界所以井，其實係冇可能的，但只要轉工次數夠多，見左十幾二十口井，你就會開始明白何為一口井，一口井係點樣運作，井同井之間有咩共通之處，有咩唔同，邊口井好Ｄ，邊口井差Ｄ。最重要係，你開始知道自己想搵o既井係點，又或者自己想起一口點樣o既井。

I Am Legend (2) - 玩樂 vs 讀書

近年香港人討論好多關於怪獸家長o既問題，不過我覺得所謂怪獸家長，其實一開始已經出現。有邊個家長唔係望子成龍？不過近年網絡上討論得多，再加上傳媒渲染，令呢個話題返炒再返炒，先會令社會越來越重視。更甚o既係，原本唔諗住做怪獸o既家長或者收入根本唔足以做怪獸o既家長，亦都會喺影響之下諗一諗，小朋友要贏就只能喺起跑線上贏，過左起跑線就做乜都冇用。

事實上又係咪咁呢？自問細個時讀書唔叻，尤其小學時期，從來唔明白讀書有幾重要，當時對我黎講最重要就係去玩。最緊要開心。不過，成績唔好，當然亦都會好苦惱，唔係我唔想讀，而係根本就唔知讀黎做乜。但如果講到足球，我就好有興趣，仲每個星期同朋友出去踢波，就算落大雨，玩到成身污泥，都覺得唔緊要。而家諗返轉頭，如果我讀書有咁o既鬥志就好，結果應該會好唔同。

事實上，我唔係讀唔到書，只係我對讀書根本唔在乎。當時成日問，點解要讀書，點解唔可以去玩。答案永遠都係話讀唔成書第時點算。點算？乜唔讀書會死架咩。對我黎講，讀完書係一個好遙遠o既未來先會發生o既事，我而家讀書又點？會影響到咁遙遠o既將來咩？而且，要讀咁多年，一直讀到讀完為止，當時根本唔會要讀幾多年先會讀完，只係覺得要我一直讀書一直悶落去，而且仲要唔知悶到幾多年之後，一諗起就會覺得好恐怖，因為就算一個暑假對我黎講都已經好漫長，更何況係數以年計。當時，我只想逃避。

其實細個o既時候，好容易就可以得到快樂，好多時根本一分錢都唔洗花。我好鐘意踢波，但我自己根本連一個足球都冇，到好後期先有自己o既足球。但一大班朋友喺街場踢波，好多時有十幾個人一齊玩，只要其中一個人有波就有得玩。就算真係冇波，落場跟隊一樣有得玩。除左踢波，我仲好鐘意睇書。當年流行睇衞斯理科幻小說，不過我從來好少會買書，去圖書館一樣可以借黎睇。

世上每一個小朋友經歷o既野都唔同，當然唔可以一概而論。每個人都有唔同o既性格，家庭背景，而且遇到o既每一件事都會有長遠影響。亦都因為咁，每一個人都係一個獨特o既故事，每一個人都係一個傳奇。

I Am Legend (1) - 砍掉重練

好耐之前已經構思過寫一系列關於讀書問題o既文章，而今年學生自殺情況又特別嚴重，所以我諗都係時候要開始呢個系列，令學生明白讀書有問題係必然的，同埋點樣去處理呢Ｄ問題。我好歡迎各位朋友留言，大家互相分享下讀書心得。

呢個系列點解叫I Am Legend呢？因為我相信每一個人都有一個獨特o既故事，而故事o既主角某程度上都係一個傳奇，無論佢做過D咩，喺佢o既一生入面每做一件事都會對故事結局影響深遠，甚至造就唔少轟烈o既場面。我覺得讀書時期o既經歷，對人生影響最大。

講返最近o既學生自殺，其實每年都發生緊。小弟當年讀科大，亦曾經因為科大係香港o既大學之中自殺率最高而驕傲。唔好誤會，我都有惻忍之心，我都會因為有同學自殺而唔開心。但當時讀書讀到天昏地暗，我就會諗，我仲未自殺，所以我仲未輸。我驕傲，因為有人輸左，寧願選擇砍掉重練，而唔係勇敢地面對將來。而我重來唔鐘意輸，就算呢個世界真係有輪迴，砍掉之後真係可以重練，我都唔鐘意重頭黎過。

就好似玩一隻RPG遊戲咁，我唔鐘意玩黎玩去都淨係玩個開頭囉，冇錯，有時喺最開始o個陣係會錯過左一Ｄ野，或者揀錯選項，搞到好難玩落去，但你唔玩落去，你又點知結局係點？就好似《金庸群俠傳》咁，你以為九陽神功好勁？你以為一陽指，降龍十八掌好勁？點知原來有人發現最癈o既野球拳先最勁。

如果每次遇到難關都要自殺，咁我相信我已經死左過千次。 但亦都係因為我每次都冇砍掉重練，所以先可以一直都喺度升level，level高左，就自然會多左選擇，絕招亦都越來越多，人生就會變得越來越好玩。

講講下，又好想重溫返 《金庸群俠傳》添。

大公司 vs 細公司 (4)

亞視熄機在即，已經係不爭ｏ既事實。其實亞視一直只係吊鹽水，佢執笠只係遲早ｏ既事。最估唔到ｏ既係，亞視班員工真係對公司咁有感情，出唔到糧都照為佢打工。作為一個打工仔，其實佢地係咪真係知道自己做緊乜？

打工仔都分好多種，好似某部份亞視員工咁，做工打到唔知自己為乜打工。打工當然係為左搵錢啦，唔通真係講感情？一間公司，係冇感情的，佢唔係人，只有一班為錢而投資ｏ既股東，仲有一班都係為錢ｏ既管理層。你對間公司有感情，唔代表間公司都會對你有感情。其實諗深一層都幾好笑，對一個人有感情，你會想同佢結婚生仔，咁你對間公司有感情，你又希望同間公司結婚生仔？我就當間公司都對你有感情，但以亞視黎講，換老細換得咁頻密，上一手對員工有感情，係咪下一手都仲有？到左最後，咪一樣要炒晒成班員工。呢個結果，一兩年前都預左架啦，到左今日，佢地又要話「好失望」，你只能怪自己太有感情囉。

講真，如果真係要講感情，點會喺大公司發生？大公司就係因為大，所以要有好多規修去限制員工ｏ既行為，如果唔係就會好亂。當每個人都限制住點做野，做Ｄ乜，咁你就會慢慢變成一個齒輪。而齒輪係唔需要有感情的。

就好似凍薪銀行咁，出左名鐘意炒人，而且每次炒人都有ＩＴ人。作為一個ＩＴ人，當然會激氣，但諗深一層，入得去就預左，因為凍薪銀行不嬲都唔會對員工有感情，佢只會計數，計唔掂就會炒人。今年條數又計唔掂，咪又話要凍薪囉，百物騰貴，唔加薪同減薪其實有乜分別？就算最後又話唔凍薪，但喺下年bonus扣返，咁又有乜分別？唔凍薪，都唔加得多過5%，咁點解唔轉工？轉一轉，正常都加10%。不如計一計條數，假設入職1萬蚊一個月，每年加5%，喺凍薪銀行做十年，現時薪金應該係 10000 X (1.05)^10 = 16289。假設同樣入職1萬蚊一個月，每年轉工一次，每次加10%，咁現時薪金應該係 10000 X (1.1)^10 = 25937。

我知道，你想問ｏ既第一個問題係：「轉工邊有10%呀」「我要減薪先轉到工添呀」。首先，喺ＩＴ界入面，轉工加10%真係唔難，尤其每年ＩＴ公司高薪請App Developer同FinTech人材。就算過去十年，加人工o既幅度都唔細。以小弟為例，上一次轉工加20%，再上一次加14%，再上一次加40%。我一直都冇試過減薪轉工，最多只會平薪，而且只會當冇得揀或對方真係有其他方面吸引到我，我先會咁做。

所以，喺大公司工作只能講錢，唔能夠講感情，一講感情你就輸。

環遊世界(10) - 日本 - 大阪(3)

去日本，好多人都會租wifi蛋，我一開始都唔明點解，日本都叫先進國家啦，當地都應都好多地方有wifi先啱。今次一去，真係嚇一跳，然後得啖笑。

由機場入巿區，大部份人都係坐JR，我心諗，JR上一定有wifi啦，一上JR，放好行李，坐低第一件事就係駁wifi。好野，真係有，不過。。。

 

 

搞左好耐，先知原來要事先攞左個Guest Code先可以免費用wifi。做法係，send個email去jrw@jorguest.wi2.ne.jp，然後就會收到reply，入面就有個Guest Code。

問題黎喇，作為一個遊客，我鬼知用wifi之前要send email？咁即係我上得網之前要上網send到email先？呢個idea真係brilliant。

好彩，我事先喺香港買左張無限上網sim card。

 呢張sim card幾好，一開始用起計，可以連續用7日。頭2GB係LTE，用晒之後仲可以上網，但就變3G。我喺深水埗買，只係$80蚊，相比租wifi蛋，真係平好多。聽講某大陸網都有得賣，而且平好多。我就貪方便喺深水埗買。佢仲包埋說明書，而且係有中文的。開卡之後記住set返APN，說明書入面教埋你點set，咁就唔會set錯。

張card一買返黎係nano sim，不過買嗰陣可以試下叫老細送埋card套，可以變返micro sim或其他size。

張卡上面有埋電話號碼，in case有需要，都可以留電話比酒店等等。

用左成個trip，我覺得速度唔錯，就算用完頭2GB，變左3G，個速度都比我想像中快好多。但喺某D郊區就收得麻麻地，有時得返1格，甚至完全收唔到。不過我想話，酒店/餐廳/商場wifi好多時都唔可靠，就算駁到都上唔到網，所以我好多時都唔用wifi，用晒呢張卡上網，再share返比其他人用，既方便又快捷。

大公司 vs 細公司 (3)

最近感受良多。大公司從來都唔係我杯茶，我鐘意做細公司多Ｄ，但唔做過大公司，你又點同人講細公司有幾好？冇做過大公司，亦好難說服自己一直喺細公司做。So far 做左10份工以上，其中都有唔少係大公司，但我最近發現一個好有趣o既現像：公司越大，入面o既人越唔成熟。

試想想，如果有個人，佢冇做過大公司，咁佢會對大公司有D咩印象呢？好多時，佢會覺得入去工作就好似加入左一個大家庭咁，入面o既人成日會有親切o既笑容，而且每一個人都好努力工作，大家一齊為公司o既未來，努力咁去付出，而每個人都會得到豐厚o既回報。而時實又係點？

每一間大公司有自己一套管治方法，好多時呢D方法都已經沿用多年， 所以通常都已經有詳盡規條，每一件大小事都講明要點做。係咪似曾相識？冇錯，其實大公司就好似學校咁，所有野都有人話你知點做，你只要跟住做，唔好做錯，咁就可以一直做落去，直到退休。

所以，喺大公司入面o既思維係，用一切方法同手段，令自己唔好做錯。例如，隔離team有野搵你幫手，你就要睇下關唔關你事，唔關事的話，直接拒絕。因為做多只會錯多，從來冇一條規條或指引係叫你幫埋隔離team，所以唔幫手係理所當然。所以，大公司通常都冇乜親切感，因為大家都只係對住D規條去做事。

大公司入面，所有員工喺每年年頭都需要set objective，年中又要整個review，年尾又要睇下係咪真係做到。喺咁o既框架之下，員工只會對住個objective去做，objective以外o既野一於少理。久而久之，你話佢地冇責任感咩？又唔係喎，不過佢地只會負責自己相關o既野，除此之外，佢冇任何責任。而事實上，好多野都係灰色地帶，例如一D共用資源，十年前已經安排左比幾team人一齊用，但到而家，呢D共用出左問題，呢幾team人都會話唔係佢地負責。

咁到底大公司o既員工眼中重視D乜？佢地已經被train up到只會做眼前o既野，人地o既野唔好理，咁樣做，到年尾先可以數盡自己做左幾多應該做o既野。最終目的，其實咪就係為左加薪同bonus囉。最可笑o既係，好多呢D大公司每年只會加薪幾個%，加5%已經叫好多，大部份都只係加1-3%。真係好悲哀。如果唔好彩，喺正年年凍薪o既公司做，變相等於減薪，真係喊都無謂。

除左錢之外，大公司員工好少睇到其他對個人修養o既好處，新technology對佢地黎講係多餘。好多大公司到而家都仲用緊IE8，仲用緊17吋mon。佢地唔會去睇下個世界有幾大，佢地唔會想知道轉去第二份工會點。佢地會進修，但完全係因為想升職，不過升職原因唔係想負責做多D野，而係純粹為左加人工。

久而久之，慢慢Ｄ人就會變得好冇深度。佢地會以為呢間公司o既做事方法就係金科玉律，呢個世界o既其他公司都一定係一樣做法。我仲記得我啱啱進入一間大公司度做，同佢地講出面o既世界係點，佢地係完全唔明白，簡真係雞同鴨講，大家都係做ＩＴ，嗰邊鴻溝闊到呢。。。

曾幾何時有位同事Ａ問同事Ｂ點解要將個windows上面行o既application轉做喺VM上面行,同事B話係某某department要求，一定要做，同事Ａ就問，個application喺linux上面行到架咩？OMG。。。呢個係我第一個反應。而同事Ａ係一個都幾senior員工，由低做起，做左七年。其實佢知唔知咩係VM。。。呢個係我第二個反應。。。

又係同事Ａ，當時佢同我傾緊閒計，話呢度Java係用W牌子application server，佢問我以前係點，我就話，以前好少用application server，多數都係自己由零開始寫個server出黎，同事Ａ諗左一諗，佢話，由零開始都要用W牌子application server架喎。我連解釋都費事。。。

喺細公司做緊或做過細公司o既朋友，應該知我講乜。

大公司 vs 細公司 (2)

今日睇返一篇舊聞,題為「【職場手冊】在細公司打工的好處」（原文：https://hk.finance.yahoo.com/news/%E3%80%90%E8%81%B7%E5%A0%B4%E6%89%8B%E5%86%8A%E3%80%91%E5%9C%A8%E7%B4%B0%E5%85%AC%E5%8F%B8%E6%89%93%E5%B7%A5%E7%9A%84%E5%A5%BD%E8%99%95-063257258.html）o既舊聞。呢個話題其實講左好幾年，我都曾經寫過一篇類似o既文章( 大公司 vs 細公司)，簡單咁比較左大公司同細公司有咩唔同，但到今日，呢個topic依然係咁hot，原因好簡單，因為唔係個個都做過唔同size o既公司，冇做過就唔會知道有咩好有咩唔好。

今時今日，睇文章當然要睇埋comment啦。

首先，我最想講o既係，大公司唔一定有好好o既福利，好多大公司都得個名，佢地會覺得Ｄ人係理所當然想入黎做，所以福利會越壓越低，反而而家創業氣氛開始變好，Ｄ細公司容易左搵到水喉，尤其IT公司同中資公司，佢地好肯出錢去請人材。

至於人工，冇錯，大公司o既中層好多時都高人工過細公司o既高層，但如果咁樣比較其實好唔公平，因為要喺大公司做到中層，冇廿年都要十年，能力強弱未必能夠反映喺職級上面，相反，喺細公司要做到高層，有時十年就好足夠，只要有能力，佢地絕對肯比野你做。

如果要比較人工，我覺得最快可以達到月薪30k o既path就係好D o既path。有三五七年經驗o既IT人都應該明白,30k係一個分水—30k前要加一兩千都好難,但上左30k後，每次轉工都可以加3千至5千。如果有一份工喺你廿七八歲已經比到30k你，我覺得已經算唔錯，但好多大公司都到你三張幾野都比唔到30k你，呢個先係大問題。正常黎講，30歲應該要有30k。咁你話，大公司喺你30歲嗰陣比你幾多人工你？係呀，大公司中層係高人工過人地高層呀，但你一世都上唔到中層有乜用？

我諗只有呢種人係鐘意做細公司，因為佢明白做人唔能夠咁短視。冇錯，入大公司，個名係好好聽，但你會變左一粒好細o既齒輪，每日跟住人地一齊轉，假以時日，你就唔識自己轉，要無數其他齒輪幫你，你先轉得郁。

而喺細公司做就好唔同，唔需要驚做錯野，因為你必然會做錯，而錯左就學到新野。亦都唔需要怕辛苦，因為喺細公司做必然辛苦，乜都要你做，關唔關事都要你幫手。係辛苦，但好快你就會周身刀。

所以話，呢個世界總有人係貪一時安穩而忽略長遠增長，係呀，做又三萬六唔做又三萬六，咁你幾時先有四五萬人工？你咪繼續日日上網囉，好快連齒輪都冇得比你做。

環遊世界(9) - 日本 - 大阪(2)

九成九嘅香港人黎到大阪，相信都會shopping，而且一定會做東亞病夫，不停買藥，因為道聽途說，阿豬阿狗都話日本D藥好，而家又平左咁多，去日本一定要掃貨。不過我地行左幾轉，京都同大阪各有野比較平，間間唔同，所以如果好care一個幾毫的話，真係要格晒價，然後逐間買。而我地，就花左大量時間去格價。

黎日本之前，我老婆已經一早做晒資料搜集，邊D抵買，邊D有用。下面呢度就係一部份佢cap嘅圖。

其實只要上網search下就搵到好多呢類資料，所以我都唔再講太多。其實唔同藥局或化妝品店，價錢真係可以差好遠，我見過有隻洗面Gel，價錢相差接近一倍，而且最好笑係，貴一倍都仲有大把人掃貨，好明顯真係唔係個個都識格價。唔想比人搵笨，可以點？好似我咁囉，去每一間藥局都影晒所有貨架，要搵返邊隻貨喺邊度賣幾錢，即刻就搵到。下面就係其中一部份影低左嘅貨架。有興趣的話，可以睇下當地而家(2016年2月中)咩價。

呢間係大阪心齋橋嘅藥局，好多野都係呢度最平：

呢間都係心齋橋嘅藥局，有部份喺呢度係比較平：

點都估唔到，原來黑門巿場入面都有藥局，而且仲好平添，我地有一大部份戰利品都係喺呢度掃貨，不過呢間唔係tax-free，但就算加埋稅，好多都仲係平過出面：

呢間係奈良嘅藥區，一D都唔平囉：

呢間都係喺心齋橋，超多強國人喺度掃貨，但咁多間之中呢間係最貴：

要留意嘅係，有D藥局係tax-free，有D唔係，如果唔係tax-free，記得睇清楚價錢，係包左稅(8%)定未包稅。如果係tax-free，要買夠5000日元先有得免稅，佢收錢時就會收少你8%稅，唔似其他國家咁，要去機場退稅。

不過，如果喺百貨公司買野，例如大丸，就要買完野(含稅)之後再去大丸百貨入面嘅退稅點搞退稅，如果多人的話，其實都要等好耐。

要記住嘅係，喺免稅店買野，貨品係會用特製膠袋包住，然後先會比你攞走，喺日本境內係唔可以開封，唔可以拎出黎用。不過，其實D貨妝品都有水份，所以必須寄倉先可以帶返香港，即係話，當你過境時，D貨己經寄晒倉，有冇拆過出黎用，有冇開封，佢地真係冇辦法check到。但係聽講真係會抽查，至於點查就真係唔知佢地，如果真係擔心比人查，咁我就建議你將所有戰利品用手提袋hand carry(液體除外)。亦都因為咁，其實冇tax-free嘅藥局都有佢嘅好處，就係佢地貨品可以即買即用，唔洗驚比人查。

其實除左藥品，心齋橋同黑門巿場都有100円店，例如DAISO，D野都幾抵買。我地淨係掃100円店都用左半日。

花左咁多心機掃貨，我地到底掃左幾多野？下面張相就show到一部份，張床太細，show唔晒咁多^^"

香港人一向出名精明，格價嘅野，喺香港一向做開。唔知你又見唔見喺D相入面邊隻貨品係貴左接近一倍呢？