Bitcoin(10) - 掘礦

一人般其實對bitcoin嘅認識唔會好深，好多時都係睇下新聞，睇下人地講bitcoin而懂得一點點皮毛。


唔緊要嘅，識少少總好過唔識。但有個好得意嘅現像，呢班人唔知點解會留意掘礦多過真係做買賣，可能掘礦係一個比較新嘅槪念掛，股票可以買賣，但冇得掘，所以呢班人咪成日想試下掘礦囉。


都唔緊要嘅，同樣都係一種投資啫，總好過淨係做觀眾。


不過我想講下揀礦場，淨係講mining pool先。即係唔洗自己買機裝軟件，淨係比錢買張contract就掘到嗰種。


其實我睇/聽左好多人講，話要揀大礦場。其實係咩邏輯呢？


首先，大礦場唔一定唔係呃人。你見到個hashrate高，唔等於你張contract係真係用左黎掘礦的。人地要呃你，隨時都可以收檔唔玩，你就血本無歸。間礦場大同細，個風險都一樣的。


既然玩得掘礦，就預左要承受以上風險。咁係咪大礦場就回報高？我又係唔明呢個係咩邏輯。


先試簡化成個問題，假設呢個世界只有兩個礦場，A礦場每秒試掘2次，B礦場每秒試掘1次。咁邊一個係大礦場，邊一個係細礦場？答案係，A係大礦場。好易係咪？


咁如果你而家有一舊錢，足以買起A礦場或B礦場嘅每秒掘1次嘅能力。咁你會買A礦場定B礦場？


答案冇分對錯，有人買A，有人買B。


現時巿場上好多人都話一定要揀A。佢地嘅邏輯係"A場每秒試掘次數多啲，所以回報高啲"。如果以A礦場老細嘅角度睇係冇錯嘅，A礦場每秒試掘2次，B礦場每秒試掘1次，即係長期黎講，A礦場會得到2/3嘅bitcoin，B礦場會得到1/3嘅bitcoin。


但你唔係A礦場老細，你只係投資者。


假設你買左A礦場每秒1次試掘嘅能力，咁你就會分到A礦場一半嘅成果，即係2/3 X 1/2 = 1/3嘅bitcoin。


咁如果你買左B礦場每秒1次試掘嘅能力呢？會有咩分別?你會分到B礦場全部嘅成果，即係1/3嘅bitcoin。


咦，點解投資喺邊度，個結果都係1/3？冇錯呀，因為理論上你買嗰啲hashrate放喺邊度都一樣架咋。就算你自己喺屋企開機掘礦都一樣架咋。


不過。。。講多少少。


自己開機掘的話，每次掘到就全部屬於你，掘唔到就白掘。而礦場(理論上)會以%計返收益比你。所以投資落礦場會得到較穩定收益，而自己掘礦就好似買六合彩咁，中左就一注獨得。但長期嚟講其實都係一樣的。


講完。

下一份IT工是天堂，還是地獄?

其實好多人對IT有好大誤解。佢哋成日以為做IT好似打機咁好玩，然後就話好想做IT；又見到Google、Facebook嘅office咁靚，仲周圍都係娛樂設施同零食，以為只要入行做IT就爽過升仙。事實又係點？

外國的IT工

講真，好多好成功嘅IT公司都明白員工係佢哋最重要嘅資產，因為做IT靠嘅並唔係金融投資或買賣貨品，而係靠員工們嘅腦袋。所以好似Google、Facebook呢啲公司，最高管理層本身就係做IT，所以必然會好好善待班員工。

好到點？免費零食、無限手調咖啡、無限假期、office入面已經有無數娛樂。而且通常個office都會裝修到好colorful，去刺激員工創意。如果係美國等地，工作地點有室外地方的話，間公司亦會將呢啲室外空間佈置得好舒服，眼見之處全部都係草地，寬闊嘅行人路，仲有好多鮮豔嘅擺設。

喺Policy上，好多時公司都會俾員工反映意見，例如邊度做得唔好，可以點樣做得好啲，而且唔係齋講，係真係會有人跟進。總之，員工嘅舒適感絕對係排首位。就算只係佢哋喺香港嘅辦公室，你都會感覺到佢哋對員工有幾重視。

入到呢啲公司，睇嚟好似上天堂一樣，間直係夢寐以求嘅工作。咁你又知唔知如果唔係Google、Facebook呢類公司，工作環境又會係點？

香港的IT工

零食，冇。咖啡，自己沖。假期，跟勞工法例，即係一年有7日大假，就算perm位，比到15日你已經要謝主隆恩。Office裝修目標係放到多啲枱，所以人人都要坐「豬肉枱」，department head都一樣。想坐房？入meeting room開會嗰陣咪有房坐囉。娛樂設施？諗都唔好諗，你係嚟返工架。

仲有，你唔知你份糧係包咗「受氣」呢個item㗎咩？唔好以為你想點就點。你想反映意見咩？我諗到你遞信嗰日先有人願意聽，不過聽完都係馬照跑，舞照跳。日日OT不特止，返到屋企諗住可以休息？記住check WhatsApp，老細隨時都會搵你；有啲老細癲起上嚟仲會公器私用，叫你上佢屋企整電腦、裝router。

唔係天堂都算，好多IT人都只想留喺人間界，但好多時都跌左落地獄。而且，轉工係改變唔到命運，好多時都係由一個地獄跳去另一個地獄，不停輪迴。你問我點解做咗咁多年，仲要喺呢個行業打滾？其實好多時都係為咗每次完成一個project嘅滿足感，呢種滿足感亦都係大部份IT人一直堅持喺地獄打滾落去嘅原動力。

此文章在jobsDB刊登

Bitcoin (9) - 講多次,乜嘢係Bitcoin硬分叉(hard fork)?

最近一講bitcoin就必然提到「分叉」「分裂」。

講真，唔係做IT，都幾難明乜野係hard fork。

每一種科技/技術都會不停進步，blockchain都一樣，而每當一種加密貨幣背後嘅blockchain需要更新時就會發生soft fork或hard fork。唔係淨係bitcoin，其實ethereum都發生過，所以有ethereum classic出現。

soft fork即係個更新唔會影響一直以來嘅運作，用家乜都唔洗做，只要miner自行install返新version就可以繼續運行，而且就算有啲miner用緊舊vesion，有啲miner用緊新version，都照樣唔會出問題的。

而hard fork就好唔同，因為只要一upgrade version，就要同舊version講bye bye，即係話，如果有啲miner行緊新version，有啲miner行緊舊version，咁就會變左兩個完全獨立嘅blockchain network。亦即係話，會有兩隻cryptocurrency同時運作。所以外間睇落就好似分叉左新貨幣出嚟咁。

事實上，bitcoin hard fork並非只係多左一隻貨幣咁簡單。

前文提到，hard fork係有blockchain network嘅version upgrade。即係話bitcoin hard fork係有新野的。

如果一直有留意bitcoin的話，其實1/8已經hard fork過一次，當時就產生bitcoin cash出嚟。點解？就係因為好似之前咁講有啲miner行緊新version，有啲miner行緊舊version囉。咁邊個新邊個舊呢？

個問題唔係咁簡單。

bitcoin upgrade其實一直都諗住做，業界－－包括miner、exchange、bitcoin fundation、bitcoin core成員等等－－一直都有討論。原因係當時bitcoin設定係每10分鐘先會miner到一次，而每一次只能夠處理1MB data。大家都知道1MB其實好細，而如果長遠黎睇，其實跟本唔會夠用，講白啲，其實一直都唔夠。所以miner就會傾向處理大額transaction，因為data數量差唔多，但transaction fee就多好多（無錯，send bitcoin係要比transaction fee的）。如果bitcoin transaction太細，例如我send 0.001BTC比你，好多miner會選擇唔處理呢一個transaction，而結果就要等好耐好耐好耐先會有miner去處理（bitcoin有機制要miner優先處理等左好耐嘅transaction的，所以最後都會成功send到）。我試過send 0.001BTC，等左超過一星期先完成。

就係因為呢個原因，如果大家都希望越來越多人用bitcoin買賣，咁scalability就成為現今最大問題。所以upgrade係無可避免。

經過業界漫長嘅討論，最後得出嘅共識係：由1MB加到2MB，另外再喺bitcoin嘅blockchain network protocol上做優化，名叫segregated witness 2X，簡稱SegWit2X（個名咁叫係有原因的）。而呢個共識，業界稱之為New York Agreement。

而上面提到1/8嘅hard fork，bitcoin就係將個blockchain network跟據以上決定upgrade左。

咁bitcoin cash又係乜呢？

其實就係有班miner唔鐘意New York Agreement嘅決定而自行抄左bitcoin個blockchain network出嚟另起爐灶。呢個network嘅設定同bitcoin一樣，都係每10分鐘掘到一次，但每次可以處理嘅data就提升到8MB。而segregated witness就冇加到落bitcoin cash到的。

最重要係,其實呢班miner嘅數量同掘礦能力得好少，係bitcoin的10%以下。所以bitcoin cash第一次運行時，原本只要10分鐘就應該要掘到全新嘅bitcoin cash，但結果用左5個鐘。

咁有乜問題呢？

問題就係加密貨幣本身就係靠成班miner嘅龐大計算能力去防止有人盜用、改寫、破壞成個network嘅運作。而bitcoin cash咁細嘅hash rate就令人擔心其安全性。所以bitcoin cash一直都追唔返bitcoin嘅價錢就係咁解。

Bitcoin (8) - 乜嘢係Bitcoin硬分叉(hard fork)?

最近好多好多人問乜嘢係hard fork，點解啲拎住bitcoin又可以乜都唔做就無端端賺咗幾百蚊美金。

其實bitcoin本身係一隻加密貨幣，背後有一個叫blockchain嘅network去支持成隻貨幣，無論你用bitcoin嚟買嘢定係send bitcoin比人，定係你掘bitcoin，都關個network事，而且所以交易動作都一定會記錄喺呢個network上面。

簡單啲講，blockchain係一種技術，佢係類似一個巨大database，記錄晒一隻加密貨幣嘅所有動作，包括發行同使用。而所有技術都一定有大大小小嘅問題，而bitcoin一直都比人話完成一個transaction太慢，而長遠嚟講會影響普及程度。所以bitcoin背後嘅blockchain network就需要upgrade，去解決呢個問題。

如果大家有留意，應該仲記得上次hard fork係2017年8月1日，分裂出新貨幣bitcoin cash。點解會有新貨幣呢？其實係因為有兩班礦工，一班支持upgrade，另一班唔支持。結果唔支持嗰班就另起爐灶，將成個bitcoin blockchain抄左出嚟，然後叫佢做bitcoin cash。從此呢班礦工就只挖bitcoin cash。亦因為係成個bitcoin blockchain抄出嚟，既係好似成個database make咗個copy咁，如果你原本有1個bitcoin，咁佢copy咗出嚟，你就會有1個bitcoin cash。就係咁簡單。

其實呢次hard fork係上半場，而下半場就會喺2017年11月。其實個blockchain就upgrade左架喇，8月嘅時候就已經activate左upgrade 嘅一部份，而今次就會喺11月activate另一部份。而今次亦有一隻新貨幣出現，叫咩名就仲未有共識，不過有啲exchange就要一早預備好，所以就比左個symbol佢做B2X。呢隻新貨幣預計喺11月28日就會開始運作，所以如無意外，喺呢一日拎住bitcoin嘅人都會拎住相同數量嘅B2X。

請注意，市場有一假消息，話今次hard fork係會分裂出bitcoin gold。呢樣係絕對錯誤。已經有唔少人發現某啲bitcoin gold網站係呃人的。請參考新聞:https://news.bitcoin.com/the-bitcoin-gold-project-responds-to-negative-criticism/

Bitcoin (7) - 乜嘢係hardware wallet? + Ledger Blue unboxing

唔理有冇炒bitcoin或者挖bitcoin, 其實如果有留意bitcoin的話，心裡面應該成日有個問題：既然講到bitcoin咁安全，咁如果我啲bitcoin放喺exchange度，會唔會比人hack左，偷晒去？

其實你驚係正常架，因為唔少bitcoin exchange的確係有比人hack過，比人偷左private key，然後攞晒入面嘅bitcoin。講真，啲bitcoin放喺exchange，純粹係方便買賣，唔應該視為一種安全嘅儲存方法。

咁點樣儲存bitcoin先安全呢？

其實好簡單，既然你怕比人hack，咪唔好方上網囉。其實只要喺自己電腦開個bitcoin wallet，transfer晒啲bitcoin落去，然後唔好比呢部電腦connect到網絡，包括有線或無線，咁其實已經可以唔怕有人偷偷地駁入去你部電腦。如果要防埋屋企人，咁你最好將部電腦加返密碼，甚致成部電腦鎖入夾萬，咁就萬無一失。

咁麻煩，有冇其他方法？

其實巿面上已經有唔少hardware wallet出售，包括:

Trezor (https://trezor.io/)

Ledger Wallet (https://www.ledgerwallet.com/)

KeepKey (https://www.keepkey.com/)


小弟喺幾個月前就買左Ledger出嘅hardware wallet - Ledger Blue。最近終於收到：

包裝睇落真係好似一部手機

可以用micro USD或bluetooth

打開個盒，有D似iPad

盒內有Ledger Blue, 一條micro USB線, 三張紙, 一個袋仔

一張紙係叫你上網睇instructions(中)，一張係說明有防止機內零件被人動手腳功能(左)，一張係比你mark低recovery phases(右)

同一般手機/平板電機一樣，機邊有粒制，按住三秒左右就可以開機，然後一路跟住instructions做就得。

set password同confirm password

mark低recovery phases, 可以寫落附送嘅紙仔度

問返你其中幾個phases

大功告成，只後只要用password就可以入返呢個dashboard

LedgerWallet官網上有更多圖片

(https://www.ledgerwallet.com/products/ledger-blue)

唔好以為好大個，其實好細，絕對放到入褲袋。

其實巿面上以Ledger Blue為最新最方便，佢個touch screen真係比實體按鈕好好多，所以我一開始就揀佢。不過，我5月落order，到10月先送到嚟，呢樣先係最大缺點。

IT人搵工攻略(3)：外行人能否入行?

近年IT界好多新嘢出現，例如人工智能、加密貨幣、區塊鏈、無人車、VR（virtual reality）同AR（artificial reality），仲有前一兩年講咗好多嘅Big Data，同埋啲好似關事又唔係好關事嘅嘢，例如電競。

好多外行人唔知呢啲嘢係點運作，亦唔知佢地點出現，但就覺得好有興趣。亦因為咁，呢兩年多咗好多人考慮入行做IT。咁到底點先可以由外行人變內行人呢？入行好易定好難？要讀啲乜、考啲乜先可以入行？

考張cert就可以入行？

好多人會覺得，考張cert就可以入行做IT。唔夠咩？考夠兩張、三張，報個online course，仲唔係IT人？

其實呢個觀念真係大錯特錯。如果你話入行做accounting，讀個course可能已經知乜嘢係income statement，乜嘢係balance sheet。然後，只要你好彩，搵到間公司唔太介意你有冇accounting嘅bachelor degree，咁你就可以入到行。

如果你淨係想喺腦場賣電腦，可能連cert都唔使讀添，吹到水就做到。但真正IT唔是咁玩的。

咁IT人其實要識啲乜？

IT界最重視嘅係──你一入職可唔可以落手做嘢。要落手做乜？視乎職位啦。

如果你想做support嘅話，就要manage一大堆server、一大堆VM、一大堆後備乜線物線、滑鼠、Mon、laptop等等；有新同事加入，就要識得setup新電腦，開一大堆乜account物account，仲要install防毒、辦公室軟件。如果間公司高科技少少，仲要搞埋公司閉路電視系統、電話系統、門口出入嘟卡系統等大把系統要manage。如果間公司啲同事唔知IT係乜，有時仲要幫同事整咖啡機、換電燈膽等等，總之有個「電」字或「機」字就關事。咁你話讀張cert會唔會識晒？

做programmer的話，你唔好諗住好好玩。好多人以為自己鐘意打機，咁寫game就一定好啱自己。錯晒囉。如果你好鐘意玩貪食蛇，你估你寫完隻貪食蛇，試玩左幾百、幾千次之後，你仲鐘唔鐘意玩？做得programmer，預咗一開始你就要識寫program。唔係睇完書就會識，而係要親手做過無數次先會識。

所以就算係讀大學課程，都會不停叫你寫program。我仲記得當年讀書嗰陣，日日寫code寫到天昏地暗，人哋長假期可以返屋企抖，我哋就要喺宿舍死砌爛砌，點都要砌好個program為止。到出嚟做嘢，寫high level program的話，你就必須知道咩係object oriented；如果做Web / UI，咁MVC design pattern就冇可能唔識；如果做low level programming的話，你連CPU、RAM、HDD同埋OS點運作都要識，並非識得咩係if then else就得。咁你話讀張cert真係有用咩？

真正要做一個IT人，係需要長年累月喺IT嘅世界入面「浸」出嚟。先唔好講升職，如果冇IT相關學歷，淨係得啲乜cert物cert，要入職都好困難。九成九唔會過到interview，除非間公司淨係要有手有腳嘅人囉。

此文章在jobsDB刊登

IT人搵工攻略(2)：Phone Interview

無論做邊行，大家搵工，都需要做interview。但係上門做interview就要請假，一來麻煩，二來又冇咗半日大假；雖然而家好多人都會詐病，請sick leave去interview，但係如果見咗幾份工都冇結果，你老細又見你成日請病假，好可能下次appraisal就會問候吓你點解身體咁差。

好彩近年好多公司，都已經改為先做一次phone interview，篩選過之後再約人上嚟親身interview。咁做當然可以慳返大家好多時間，但作為一個IT人，你又知唔知點先可以做好一個phone interview？

其實大家都可以想像得到，phone interview能夠出嘅問題真係唔多。試問點樣可以淨係用口就講到一個algorithm點運作？問你left join、inner join同right join有咩分別，點用口講？唔係唔得，只係極度困難。如果你工作唔係lecturer，教開database，點會咁易用口講到呢啲覆雜嘅concept？

想做好phone interview，首先就要知phone interview會問啲乜。我將phone interview大致分為兩種，一種係formal interview，另一種係casual interview。

Formal interview

其實大部份phone interview都會係formal interview。電話一打嚟，首先佢會介紹自己，係乜乜公司打嚟，佢叫咩名，打嚟係想同你做個phone interview。

如果打嚟嘅人係HR，多數都唔會問你好深入嘅topic，而係考語文為主。好多時會叫你用英文介紹自己，然後一直用英文問你一啲好typical嘅問題，例如「點解轉工」、「點解咁jumpy」、「邊方面係你強項、弱項」等。如果係有大陸生意或根本就係中資公司，好多時會叫你用埋普通話講啲嘢，例如你工作以外最大嘅興趣係乜。內容係乜唔重要，最重要係聽到你識唔識講普通話。

不過，如果事前約好個phone interview時已經講明係考technical topic，咁內容通常就會圍繞你嘅經驗，可深可淺。淺的話，大概問你「有冇用過某某technology」；你答有，佢就會打蛇隨棍上，問你點用，同埋「遇到乜乜情況你會點做」等。成個過程佢唔會點比feedback，所以你唔會知自己答得好唔好，但佢就會逐個逐個topic同你go through。

深的話，就係要你用口講一啲好複雜嘅concept，例如上文提及嘅left join、inner join、right join等問題，亦有時會問design pattern、algorithm、multi-threading等問題。通常只有ibank呢類超高要求嘅公司，先會問到啲咁深嘅問題。

Casual interview

至於casual interview，多數係細公司先有，因為佢地會比較隨意，打嚟主要只有一個目的，就係睇你係咪真係對個職位有興趣，定係只係仙女散花，間間公司都走去apply。

其實對於細公司嚟講，佢哋收嘅CV唔多，只要能力同經驗合適，一般都會接受；但最重要係事先講明自己係細公司，業務情況如何、前景如何，如果你仍然有興趣，佢先會真正約你上去interview。另外，如果CV上有寫得唔清楚嘅地方，佢哋都會經電話問清楚先。所以，基本上呢個電話只係一個簡單篩選嘅過程，再深入啲嘅問題就會留返等你上去interview先慢慢問。

有時候大公司都會有呢類casual interview，不過多數會交俾agent做呢一部份；到你親身上去大公司interview，先至明刀明槍咁考你。

事前準備

多數phone interview都係預先約好，但並非必然，所以喺你apply份工之後就要做好心理準備，預咗間公司隨時會有人打嚟。當你有定心理準備，答問題就會淡定好多。

無論係咪預先約好，你都要睇吓個job ad上面有冇邊啲topic係你比較少用到，然後至少做下research。短時間之內，其實好難完全掌握一種新技術，不過亦都唔需要咁做；到時當佢問到呢個topic，你可以坦白話自己唔熟，但知道係乜嘢，然後將你知嘅嘢講返出嚟。

仲有就係，如果真係等咗兩星期都未有人打嚟，咁好大機會佢地係唔會打嚟。呢個時候，就要收拾心情，尋找下一個適合自己嘅job ad。

此文章在jobsDB刊登

Bitcoin (6) - Bitcoin是否合法?

其實世界各地都越來越多人參與Bitcoin呢個全新金錢系統。不過，無論係做挖礦，提供匯兌服務，做交易所，定係投資者，或者係小巿民炒賣，最怕嘅就係所做嘅嘢唔合法。咁究竟玩Bitcoin係合法定唔合法？會唔會炒炒下比人捉左去坐洗頭艇或者要捱釘書機酷刑？

首先，大家要明白，Bitcoin係新事物。現有法律有可能對新事物有清楚嘅定義，因為呢樣嘢喺法律定立之前都冇人見過。所以，法律係冇辦法話你知Bitcoin係咪合法。所以喺問Bitcoin係咪合法之前，首先要定義Bitcoin係乜。

咁Bitcoin係乜？

唔同地方，唔同國家，定義都唔一樣。喺美國，2013年時，定義Bitcoin為一種貨幣，但喺2015年，就改為視Bitcoin為商品。事實上，單單喺美國唔同州份，對Bitcoin都有唔同待遇。例如紐約就有BitLicense，政府可以透過發牌去監管相關業務。但BitLicense只係喺紐約先有用，拎住BitLicense去另一州份，佢地唔會因此認為你嘅業務係合法。

而喺德國，Bitcoin被視為會計單位。雖然會計單位同貨幣好相似，因為可以用嚟計算其他商品或服務嘅價值，但貨幣本身有相關法例，而Bitcoin就喺當地唔係貨幣就唔會有相關監管或保障。

喺日本，Bitcoin被視為金錢，亦即代表相關法例同保障都可以適用於Bitcoin。亦都係因為咁，日本人對Bitcoin嘅興趣非常濃厚，有數以十萬計商鋪開始接受Bitcoin，銀行開始接受Bitcoin存款，日本亦好快會成為最多Bitcoin交易所嘅國家。

不過我相信大家最想知道嘅係中國同香港對Bitcoin嘅睇法。

中國自2013年12月開始對Bitcoin進行監管。當時Bitcoin啱啱突破1000美元歷史高位，而9成以上交易係來自中國境內。由於中國唔想有錢人用Bitcoin走資，所以監管非常嚴厲。所有喺中國嘅金融機構都被禁止處理Bitcoin交易。基本上，所有Bitcoin相關業務即時唔能夠進行，因為無論任何業務，都需要銀行戶口。2014年4月，央行下令所有商業銀行同支付公司必須於兩星期內關閉Bitcoin交易戶口，同時聲明個人Bitcoin交易係合法。2017年2月，央行「約見」中國幾間Bitcoin交易所高層，但冇人知發生咩事。當時所有交易所都唔比提款，直至兩星期後先回復正常。所以，其實中國一直加強監管Bitcoin業務，但Bitcoin交易仍然係合法嘅。

至於香港，小弟於2017年5月向相關部門問過Bitcoin交易所係咪合法，回覆如下:


香港海關

Sam Yung 先生:

你於2017年5月29日的電郵收悉，現覆如下:

根據香港法例第615章《打擊洗錢及恐怖分子資金籌集(金融機構)條例》(《條例》)，任何人士欲經營匯款及/或貨幣兌換服務必須向海關關長(關長)申領牌照。關長是發牌當局，負責執行金錢服務經營者(即匯款代理人和貨幣兌換商)的發牌制度。根據《條例》的釋義，「金錢服務」是指貨幣兌換服務或匯款服務。根據法例，任何人在沒有關長發出的牌照情況下經營金錢服務，即屬犯罪，一經定罪，可罰款100,000元及監禁6個月。就打擊洗錢條例而言，比特幣本身或其他類似的虛擬商品並非海關所執行規管制度的範圍，除非比特幣或該等商品的交易業務涉及經營金錢服務。

鑑於不同業務的組織或結構，以及它/他們的業務活動的性質與範疇均存在差異，對某一特定的運作模式是否符合上述經營金錢服務的釋義，不能一概而論，當中要視乎情況，包括但並不限於對該運作模式的詳細審查、有關各方所涉及的責任、以及法例在該業務的獨特情況下的應用等。如對有關釋義有任何疑問，有關機構/人士應垂詢有關業界的合規主任的專業意見，及向法律顧問徵詢獨立的專業意見。

你可透過香港海關網站或以下連結，取得有關法例的資料。

打擊洗錢條例 https://eservices.customs.gov.hk/MSOS/common/legislation?request_locale=zh_TW
香港海關 金錢服務監理科

證監會

Dear Sir/Madam
Thank you for your email.
Please refer to the link attached and fill in the form (circled in red).
http://www.sfc.hk/web/EN/sfc-fintech-contact-point/



Regards
Licensing, Intermediaries
Securities and Futures Commission
35/F, Cheung Kong Center
2 Queen’s Road Central
Hong Kong
Tel: (852) 2231 1222 | Fax: (852) 2501 0375

金管局

敬啓者：

謝謝　閣下的電郵。

就虛擬貨幣相關的查詢， 　閣下可向香港特別行政區政府財經事務及庫務局聯絡，其聯絡資料如下：

財經事務及庫務局 電郵： info@fstb.gov.hk 電話：(852) 2810 3824 傳真：(852) 2869 4531

香港金融管理局公眾查詢服務組 主任 潘依廷

財經事務及庫務局

先生：

謝謝你的查詢。香港特別行政區並沒有監管虛擬貨幣或虛擬貨品交易的規定。有關本局及香港金融管理局對虛擬貨品所涉及的風險警告，請參閱以下超連結：

http://www.hkma.gov.hk/chi/key-information/press-releases/2015/20150211-3.shtml http://www.fstb.gov.hk/fsb/chinese/ppr/press/doc/pr140314_c.pdf



財經事務及庫務局謹啟

所以，喺香港，其實政府根本冇監管Bitcoin。Bitcoin交易同相關業務「冇犯法」。不過，就好似香港海關回覆咁講，如果間公司唔單止搞Bitcoin買賣，仲提供埋貨幣兌換服務，咁就要攞牌喇。

Bitcoin (5) - Bitcoin爆升背後嘅原因

Bitcoin雖然喺2009年啱啱啟動嗰陣一啲都唔出名，當年甚至只係幾條廢青喺度玩，但到2013年時，終於因為谷上1000美元高位而出名。浮沉多年，近兩年又再次活躍，甚至連各大投資銀行都開始唔能夠視而不見。

到底點解Bitcoin有咩咁巴閉？何解爆升？

以美元為例，其實喺好耐好耐之前，即1971年之前，美元係可以直接換黃金。我地叫呢個制度做金本位。亦因為美元一直沿用金本位制度，所以各國都同美元掛鈎，因為同美元掛釣等同於同黃金掛鈎。

但1971之後，美元放棄金本位。咁問題就嚟喇，點解美元唔能夠兌換黃金，但仍然可以咁值錢？甚至幾十年後嘅今日都仍然咁值錢？答案好解單，因為整個美國以至整個世界仍然有無數商品,貨物,股票,金融產品等,仍然以美元報價。換句話說，即係全世界人仍然相信美元可以用嚟買嘢。就係呢一樣共同信念，一直支持美元價值。所以美元，或其他國家貨幣，我哋都可以叫做fiat currency。

睇返Bitcoin，點解Bitcoin咁值錢?就係因為大家開始相信Bitcoin值錢。即係點？即係，有國家開始將Bitcoin合法化，有商店開始以Bitcoin標價，亦有人開始儲存Bitcoin，有人開始炒賣Bitcoin。其實整個原理同美元一樣。

既然大家都有得用美元，點解仲需要Bitcoin？原因好簡單，就係因為金融風暴嘅後遺症。大家都以fiat currency出糧，生活上亦用fiat currency為主。但大家有冇發覺，自從美國不停印銀錢之後，身邊發生咩事？冇錯，物價上升，買唔到樓，同埋去日本平咗。

其實唔係物價上升，係你手上嘅fiat currency貶值。即係buying power下降。原本200百萬買到層樓，但今日要400萬，甚至更多。最慘就係buying power下降之餘，人工得加少少。樓價升100%喎，你人工有冇double？

咁點好？當大家都覺得手上嘅銀紙唔能夠keep太耐，咁大家就會開始買嘢保值。買到樓就會買樓，所以樓巿被推高，尤其喺中國人社會。黃金係避險工具，當然亦會被推高。而Bitcoin就係其中一種被推得最高嘅資產。

點解要買Bitcoin？首先，佢唔會被任何人，國家或政府控制，所以唔會有QE，即係唔會有人為因素令Bitcoin貶值。第二，Bitcoin數量有上限，只有2100萬個。第三，拎住Bitcoin，本身就係一種貨幣，可以用嚟買嘢。

試問有邊隻投資產品咁好，有齊以上三個特性？冇囉。咁真係好難唔爆升架喎。

今日Bitcoin已經企穩3400美元樓上，仲等？







風險披露 及 免責聲明

加密貨幣價格有時可能會非常波動。同時，加密貨幣價格可升可跌，及甚至變成毫無價值。買賣加密貨幣未必一定能夠賺取利潤，反而可能會招致損失。
任何關於以往業績的陳述，未必能夠作為日後業績的指引或參考。
倘若投資涉及外幣，匯率的波動或會導致投資的價值作出上下波動。
在新興市場投資，閣下需要對每項投資以及風險(包括但不限於主權風險、發行人風險、價格風險、流動性風險、法律和稅務風險)作出謹慎和獨立的分析。而且閣下亦需注意，雖然這些投資可以產生很高的回報，他們亦同時存在高風險，因為市場是不可估計，而且市場未必有足夠的規條和措施去保障投資者。
在閣下進行任何投資前，閣下應索取有關所有佣金、開支和其他閣下須繳付的費用的明確說明。這些費用會影響閣下的純利潤(如有的話)或增加閣下的損失。
所有分享純屬個人心得，所提供的投資策略未必適合所有投資者, 也非作為或被視為買入或出售該金融產品或商品的邀請或意向。
上述觀點只代表作者本人意見。本團隊成員及其客戶可能持有上述相關產品權益，並隨時可能買入或沽出。

本人當然持有Bitcoin。

女性入行做IT有冇優勢?

好多唔認識IT嘅人會覺得IT啲嘢好難，又變得快，而且又好辛苦，唔啱女仔做。實際上係唔係咁？女仔入IT界真係輸硬？

其實IT界好大，有好多崗位，而且好多都唔係特別辛苦，但唔知點解外界總係覺得IT人必然係做到身水身汗，日日喺server房插線、整機咁；或者當約咗位寬頻技師上你屋企拉線嗰陣，就以為做IT就必然係做呢類辛苦工作。講真，你估做會計、做audit嗰啲唔辛苦？做售貨員、傳菜員唔辛苦？但都好多女性入行喎。

男女各有長短處，雖然IT都係以男性居多，但大家有冇諗過點解？其實一直以來讀computer science、computer engineering、electrical engineering呢類科目嘅女仔本來就好少，我記得當年讀大學，有大概120位同學，其中只有大約10個係女仔。就算呢10個女仔畢業後全數入行做返IT，仍然只係好少數。所以少女仔做IT，其實係因為少女仔揀IT科目去讀，原因當然係因為佢哋冇興趣啦。相比之下，讀BBA就多好多女仔。

依我所見，其實讀IT嘅女仔，成績並唔會差過男仔，因為好多時女仔都係比較細心同冷靜，所以寫出嚟嘅code亦比較少bug。但係普遍嚟講，女仔對IT嘅好奇心始終唔及男仔，所以雖然讀書可以好叻，但畢業後未必能夠追得上潮流，不停學習新知識。至於男仔，好多時就算工作唔需要佢哋學多一兩隻language，但有時間都會走去睇吓咩嚟，甚至學埋點用。當年啱啱出現App Store，好多人都第一時間睇吓咩嚟，點樣寫App；而女仔嘅motivation就冇咁大，好多時都係工作需要先會去做。就算今時今日，會走去學咩係blockchain、咩係machine learning嘅，都係男仔居多。亦因為咁，電腦雜誌都係以男性讀者為主要目標客戶群。

但當講到做support位，講真，女仔真係唔太啱做。插下線，set下嘢，行下command，女仔當然都可以做得到；但因為呢啲位好多時要搬機，個rack仲要成個人咁高，女仔一般都好難做得到。而且一般server房都係比較多線、多電、多雜物，唔小心跌一跌，撞到頭真係唔係講玩。再加上，好多女仔都怕凍，而server房應該係全公司最凍嘅地方，要喺入面做嘢做半日，女仔當然有得揀都唔會做。

所以好多時女仔畢業後，或做夠幾年之後，都會希望轉返做跟project嘅工作，因為project management比較少新嘢要學，而且一般都係寫doc同對客，女仔喺呢方面好多時都比男仔優勝。當然，凡事都有例外，我都識得好幾個女仔做咗10年以上都仲好鐘意寫code。所以，總括而言，女仔做IT亦唔一定輸比男仔嘅。只要有興趣，做IT亦無不可。


此文章在jobsDB刊登

Bitcoin (4) - Bitcoin簡史

Bitcoin喺世界各地越來越流行，有唔少國家開始將Bitcoin合法化，似乎Bitcoin風潮會持續一段時間。

Bitcoin喺2008年發明，2009年1月啟動第一個miner。當時Bitcoin其實一啲都唔值錢，亦只有好少數人參與其中。佢地當Bitcoin好似大富翁遊戲入面嘅道具銀紙一樣，只係for fun。

直到2010年5月22日，Programmer Laszlo Hanyecz以一萬個Bitcoin買左兩個大Pizza，自此之後，Bitcoin就有真正價值，而呢一日，後世叫做Pizza Day。

自此之後，開始越來越多人對Bitcoin産生興趣，而Bitcoin嘅價值亦隨之而增加。2013年3月，Bitcoin總巿值已經超過10億美元。明顯地，Bitcoin已經為人所熟悉，而且可以用嚟買嘅商品越來越多，甚至包括軍火，毒品。而Silk Road就係當時非當出名嘅軍火毒品買賣網品，全部交易均以Bitcoin交易。

2013年10月，FBI搗破Silk Road，沒收網站擁有嘅資產，包括Bitcoin。喺Bitcoin歷史上，呢一日非常有意義，因為從此代表Bitcoin不再只係買賣軍火毒品嘅媒介。

2013年12月，Bitcoin勢頭非常好，終於衝破1000美元大關，亦因此引起國際關注。由於當時有9成交易來自中國，有錢人都以Bitcoin為走資新方法，所以中國政府隨即檢視風險，並禁此金融機構處理Bitcoin交易。Bitcoin價格應聲回落。

無獨有偶，2014年2月，最大Bitcoin exchange Mt. Gox"丟失"85萬個Bitcoin而宣佈破產。人們開始對Bitcoin exchange失去信心，而Bitcoin價格更加係一蹶不振。

2014年6月，FBI將之前沒收嘅Bitcoin拍賣，總共有29,000個。

自2013年金融風暴後，全球經濟都唔太穩定，尤其歐洲好幾個國家都徘徊喺破產邊緣。

2016年，英國宣佈脫歐，5-7月期間，Bitcoin價格大升1.5倍。同年12月，全世界都唔希望Donald Trump當選美國總統，偏偏佢就當選咗，而Bitcoin價格亦明顯爬升。

經過一輪升跌之後，2017年3月，終於超越黃金價格。

2017年4月1日，日本正式將Bitcoin支付方法視為合法，日本大企業包括樂桃航空等，加入Bitcoin為支付方式。

2017年6月，Bitcoin突破3000美元歷史新高。但由於各大Bitcoin exchange都未預計Bitcoin會升值得如此之快，結果不勝負荷，Bitcoin價格一度急挫我19%。

2017年7月，澳洲將Bitcoin合法化，並免去重覆GST稅項。

2017年8月1日，Bitcoin更新，業界各有不同意見並分為兩個主流，因而產生hard fork。Bitcoin cash因此誕生。

現時俄羅斯、印度、南韓等國正準備將Bitcoin合法化。相信會有更多國家加入Bitcoin嘅大家庭。

今天Bitcoin價格又再創新高，報3242美元。






風險披露 及 免責聲明

加密貨幣價格有時可能會非常波動。同時，加密貨幣價格可升可跌，及甚至變成毫無價值。買賣加密貨幣未必一定能夠賺取利潤，反而可能會招致損失。
任何關於以往業績的陳述，未必能夠作為日後業績的指引或參考。
倘若投資涉及外幣，匯率的波動或會導致投資的價值作出上下波動。
在新興市場投資，閣下需要對每項投資以及風險(包括但不限於主權風險、發行人風險、價格風險、流動性風險、法律和稅務風險)作出謹慎和獨立的分析。而且閣下亦需注意，雖然這些投資可以產生很高的回報，他們亦同時存在高風險，因為市場是不可估計，而且市場未必有足夠的規條和措施去保障投資者。
在閣下進行任何投資前，閣下應索取有關所有佣金、開支和其他閣下須繳付的費用的明確說明。這些費用會影響閣下的純利潤(如有的話)或增加閣下的損失。
所有分享純屬個人心得，所提供的投資策略未必適合所有投資者, 也非作為或被視為買入或出售該金融產品或商品的邀請或意向。
上述觀點只代表作者本人意見。本團隊成員及其客戶可能持有上述相關產品權益，並隨時可能買入或沽出。

本人當然持有Bitcoin。

IT人搵工攻略(1)：Technical Test

打工仔每一次轉工都要接受interview嘅考驗，而IT界嘅interview更加係千奇百趣，其中最重要嘅一環就係technical test。

口頭問答

IT人見工，好多時都會問technical問題。用口問其實已經係最普通嘅一種，基本上每一次interview都必然會出現口頭technical test。

呢類問題係最易答，因為好多時interviewer用口問嘅問題係即時諗出黎，即時諗嘅嘢，可以有幾深呢？就算唔係即時諗，但只用口，唔用圖表或圖形去表達，難極都有個譜，所以一般嚟講都係比較容易。

舉個例子，佢可能問：「Java入面，邊個package唔需要import呢？」呢種問題，寫開Java嘅應該順口就答到，但如果你寫開C++，就未必會識答。又或者問：「一般情況下，SSH係用邊個port呢？」呢類問題簡單得嚟又可以有效地測試candidate係咪真係有特定範圍嘅知識，對interviewer而言係幾方便嘅。

筆試

如果係應徵Developer或Programmer呢類entry level嘅職位，我諗以上嘅問題已經足夠去睇個candidate係咪有相關知識。但如果講緊System Analyst呢啲比較資深少少嘅職位，口頭問答未必分到邊個高、邊個低，咁就需要一個詳細少少嘅technical test。

所以，好多公司都會準備一份paper畀你做。你必須用筆去做晒成份卷，記住係筆，唔係電腦，就算份卷有啲問題係要你寫code，你都要用筆寫。呢類technical test大部份都只係MC，只有大概20-30%係要寫code，就算要寫code，好多時都只係兩、三行填充，而唔係由零開始寫。

不過，其實MC題目都可以好長，可能係用一、兩頁A4紙印咗一大堆code出黎，然後一次過問幾題MC。最典型嘅問題係問你成段code能唔能夠compile，又或者問你行完個program之後會見到啲咩。

呢類型technical test可以考驗candidate點樣即時運用觀察力去睇條問題，有冇足夠智力同知識去解答，同埋喺壓力之下會唔會緊張到諗唔到嘢。不過，間間公司出嘅題目都唔同，有啲technical test會問你Java API嘅細節，而唔係個concept或algorithm，咁呢啲就真係變咗質，因為咁樣同叫你背code冇乜分別。

Online Technical Test

所以我其實主張考得technical test嘅話，不如搵部上到網嘅電腦，畀candidate直接寫code。其實有啲公司已經係咁做，甚至係叫你嚟interview之前，先喺屋企做左online technical test先。而我相信呢種模式都會係將來technical test嘅大方向。

Online technical test通常只有一至兩題，全部係寫code問題。俾得你上網，題目當然唔會容易做。呢類technical test嘅目的係要考驗candidate嘅解難能力，通常題目都會同sorting、searching呢類algorithm有關，又或者會考你識唔識好好利用唔同類型嘅data structure。

以下呢題係我自己親身見過嘅一題online technical test，我覺得可以用嚟當作練習題，所以同大家分享：

1. 已有一個array int A[N] 入面係integer, 可正可負

2. 假設 0 <= P <= Q < N

3. X =A[P] + A[Q] + (Q-P)

寫一個program，搵出最大的X值；而space complexity必須係O(1)，time complexity必須係O(N)。

坊間有好多網站都會列出呢啲類似嘅模擬試題，大家見工前不妨搵嚟練習吓。



此文章在jobsDB刊登

加薪 vs 出Bonus

每個行業都有peak season，求職巿場都一樣。每年一到年尾至4月都係轉工旺季，點解？因為加人工出Bonus嘛。

每次公司加薪出Bonus，都總有一班人開心，亦有一班人唔開心。每間公司出Bonus同加薪都唔同。曾幾何時，我試過加薪低到只得1.5%，咁加薪法，我叫侮辱性加薪。因為當通脹都3-4%嘅時候，其實係變相減薪，想唔走都唔得。當然，加薪少，唔代表Bonus少。有啲公司好重視Bonus，每年搵到錢都總會留一截黎派Bonus，有5-6個月人工派，留人一啲都唔難。

不過，比你揀，你要加薪加得多，定派Bonus派得多？加你10%夠多未？定係唔加薪，但派夠10個月Bonus比你？

人人睇法唔同，有啲人鐘意現金，所以好鐘意Bonus。一派Bonus，買iPhone買手袋，食好野，去旅行，豪得不得了。但花完之後，就打回原型。如果係第一次享受咁大份Bonus，好少會留意，其實派Bonus都要交稅的，而且香港係行累進稅率，即係年薪越高，稅率亦越高。即係派得多Bonus未必係一件好事。

我就鐘意加薪多啲，因為我下次轉工，主要都係睇返我月薪。當然，你可以寫埋上次攞左幾多Bonus，然後同人拗高啲個月薪。大公司好多都會用年薪去睇你而家搵緊幾多，但要留意並非間間公司都咁計，有時會淨係睇你月薪，咁你出幾多Bonus都冇用。而且，好多時要做夠一年先會出Bonus比你，至於點為之「做夠一年」，間公司都唔同。試過有間公司，就算你1月2日入職，你今年年尾都唔會有Bonus，因為你未做夠一年。即係其實要第二年年尾先有Bonus。如果零加薪，咁你仲等唔等？另外，雖然月薪都要交稅，但記住，月薪係可以用黎借貸。做按揭都係用月薪黎做reference，你份Bonus有100個月糧都唔會幫你過到壓力測試架。

下次搵工，記住留意埋呢方面。