IT interview (8) - CV

農曆新年就黎到，我相信好多公司都會喺呢個時候派Bonus。無論大公司定細公司，工作性質如何，呢個時候都好多人諗住收左Bonus就轉工，而head hunter亦都開始進入旺季，要部署一連串嘅獵頭行動，而市場 (尤其JobsDB)上嘅工亦會明顯比前一兩個月多好多。

講到轉工，我諗最多人煩惱嘅係唔知點寫CV。小弟大大話話都in過好幾十人(可能過百)，而比人in嘅次數我諗都有好幾十次，所以今次就分享下點寫CV先可以有效吸引眼球。不過大家要留意，我講嘅係IT工嘅CV，如果你唔係IT人，你可以參考下，但唔好完全套用，因為每個行業着重嘅野都唔同。

首先要講嘅係CV最基本元素。基本個人資料，聯絡方法當然要有，呢D係基本中嘅基本，我諗唔洗我多講，不過要留意嘅係，基本資料中最好包括婚姻狀況(單身，己婚，離婚)，因為有D interviewer係特別唔鐘意已婚嘅女士，佢地覺得已婚女士懷孕機會大，一大肚就請長假，公司會得不償失。所以，你寫明自己係女性同埋已婚，如果對方係唔鐘意你，就無謂浪費大家時間，因為in一次最少都要用你半日。不過，我亦見過大公司特別鐘意已婚男性，因為佢地有頭家要照顧，所以就算做得幾辛苦，幾唔愉快，都唔會話走就走，同埋已婚男性經歷過婚姻，理應處理過結婚呢個大project，心智同處事通常都比較成熟，所以呢個都不失為一個賣點。

基本個人資料中，近年有公司會要求你提供LinkedIn嘅URL。作為一個IT人，如果你能夠喺CV上提供此訊息，表示你有留意現今網絡發展，而且追得上潮流，而唔係old school派。當然，如果你比埋LinkedIn URL比人，就梗係要記得執靚個LinkedIn profile，最好叫埋同事朋友去確定你寫嘅skillset，咁個profile就更加可信。

除左基本資料，CV當然要有學歷同工作經驗，但我會先寫current salary同expected salary，然後係availability。點解？首先，而家有9成嘅IT工作都要你寫，所以你CV一定要有，你唔寫的話，到你interview時都一定會問你，咁你希望浪費大半日，聽到人地話你貴，定係寧願人地一早覺得你貴，唔洗你去interview？冇錯，你可能因此而少左interview機會，但如果人地叫得你去in，就證明人地係接受到你嘅expected salary同埋你嘅加幅，即係你嘅成功機會己經提升左。即係你原本可能一個月有10個interview，而家可能得返3個，但你原本可能要in 20次先搵到工，而家就in 5次就搵到。道理就係咁簡單。咁點解要比其他野寫先？因為CV其實係要將最重要嘅野寫先，最唔重要嘅野寫最後。所以就算你寫工作經驗，都係先寫最近嘅工作，一直寫到最早嘅工作。學歷都一樣。而current salary同expected salary係比其他野更重要的。而availability我會貼住expected salary之後寫，因為係相關的。仲有一個item係一般人冇留意到，而且100份CV入面可能得一份會寫，就係current location。如果你係send比local公司，你唔寫唔緊要，但如果你係target國際公司或者大陸公司，current location就代表你而家身處邊度，如果你申請嘅職位係要飛去第二度開會，甚至要relocation，咁間公司就可以憑住呢個item去估計要幾成本。Current location其實仲包含左好多意義，包括你嘅語言／語文能力，expected working environment，呢D野並非最重要，但當interviewer要二揀一時，呢D就係要黎決勝負。

跟住落黎就係寫工作經驗，你要記住，工作經驗比學歷重要得多，所以工作經驗一定要行先。就好似上文提到，要先由最近嘅工作開始寫。每一份工都要列明公司名，當時職位，由幾時做到幾時，工作內容。咁你可能會問，如果我曾經升職，咁我應該點寫職位？咁我會問返轉頭，點樣寫先對你有最大好處？當然係寫最後職位啦，因為你份工可能做左10年，由junior升做senior，你做senior可能只係做左5年，但你寫個senior嘅職位，人地就會覺得你做左10年，咁咪著數左囉。仲有一樣野要留意，工作內容一定要用point form，因為冇乜interviewer會用大半個鐘去睇你寫一大篇爛英文。要記住，成份CV一定要簡潔，唔好有多餘嘅野。

寫完工作內容，記得要加多一個point，寫你呢份工用過咩skill，e.g. C++, J2SE, J2EE, GIT, Oracle DB, SQL Server, etc.咁樣寫有個好處，就係interview一睇就知你呢份工大概係做D乜，清楚易明，好過你用一個表去寫你每個skill用左幾多年。另外仲有一樣野要記住，如果你有D工作係未過probation己經冇做落去，咁就唔好寫，因為interviewer會覺得你好jumpy，而且你做得一兩個月，佢會當你冇做過，所以只有壞影響，咁不如唔好寫，話嗰段時間去左旅行好過。

好喇，寫學歷喇，呢個部份其實都好多人寫得唔好。你做左三五七年野，做乜仲要寫中學讀邊間？仲要寫埋A-Level考成點，HKCEE考成點？大佬呀，你當時讀左D乜，你而家都唔記得啦，仲話我知有幾多個A係冇用的。不過，中學學歷都有一個情況係要寫，就係當你搵第一份工。因為你冇工作經驗，你嘅學歷就係你嘅一切，所以你需要寫落去。拜托，只要你做過一份工，就唔好再寫中學學歷落CV，比我見到，你幾叻我都唔請。另外，寫大學學歷，唔需要寫邊科咩成績，你只需要寫你係1st Honor，Second-up等等，最多只可以寫GPA幾多。

最後就係寫Other Qualifications。你讀過D咩cert，有D咩特別技能，就喺呢度寫。我諗唔需要多講。

以上咁多野，就係寫CV最基本要知嘅野，但好多時有D工作係有特別要求，例如要你加張相落去，咁你咪按要求加落去囉，但如果人地冇要求，你又唔係靚仔／靚女，咁就無謂獻醜喇。寫CV，最重要係寫D加分嘅野落去，減分嘅野冇必要就唔好寫。

其實搵工，CV當然重要，但cover letter都好重要，九成IT人都唔會寫，下次就講cover letter啦～如果覺得小弟講得有道理嘅，麻煩share出去啦～

中產

最近越來越多人話自己好窮，就連中產都好難support到家庭開支。咁到底咩人先係中產呢？

月入7萬剩1500元 中產訴苦


上周施政報告發表後，有家庭月入3萬元的市民致電電台向特首訴苦，埋怨政策未惠及中產；一句「月入3萬都算中產？」迅即成為網上熱話。

有家庭月入7萬元的中產就在網上列出各項開支，指扣除後每月僅餘1,500元，引來不少中產共鳴。

「向下流」趨普遍 有苦自己知

學者指，中產「向下流」趨普遍，表面風光的中產有苦自己知。

當日聽眾潘先生致電電台節目，稱夫妻收入近3萬元，家有雙胞胎，既要供樓又要請傭人，懇求特首協助中產。「中產定義」隨即成為網上熱話，有網民就撰寫「中低產生活寫照」，指家庭月入近7萬元，扣除一家三口生活開支（見表），每月僅餘1,500元，幾乎淪為「月光族」。文章觸動不少網民神經及共鳴，短短3日已有逾千回應。

任職銀行管理層的黃小姐，一家四口居於奧海城，家庭月入逾7萬元，但扣除供樓、子女及家庭開支，幾乎「月月清」。

月入10萬以下 生活「掹掹緊」

「供樓要2萬幾、兩個女返學及課外學習要1.5萬，請工人近6,000元，雙方父母家用近萬元……大時大節使費增加，更要動用積蓄！」

她慨歎，「以前兩公婆會去歐洲旅行，大女出世後就轉去東南亞，細女讀幼稚園後，一年去唔到一次旅行。」她說，今時今日家庭月入少於10萬元的家庭，生活可能也要「掹掹緊」。

其實，各地對中產定義有別，除了財司曾俊華提過「飲咖啡及看法國電影」的中產妙論，亦有指擁有國民收入中位數的三分之二至兩倍，便可稱為中產。若按香港去年第三季個人入息中位數12,300元計算，月入8,200元至24,600元也可稱為中產！

中文大學社會工作學系副教授黃洪稱，在百物騰貴的香港，月入3萬元的家庭絕不算中產。

他坦言，隨着愈來愈多就業機會北移，中產人士確有向下流動的迹象，近十多年文職及技術人員的生活質素愈來愈接近基層。

香港大學社會工作及社會行政學系名譽教授周永新則認為，中產人士至少須擁有物業，月入則為香港個人入息中位數的2至4倍，即約2.5萬至4.9萬元。

他指，環球經濟增長放緩，不少國家的中產均向下流動；又引述政府統計處資料指，5年前約103萬人月入介乎1萬至2萬元，去年第三季則上升至138萬人。

來源：二零一四年一月廿三日《經濟日報》

我想講，其實收入越高，支出就自然會相應提高。因為當你賺多左，就會想買多D野，去多一兩次旅行，甚至想住好D。不過其實最有趣嘅反而係產嘅定義，到底「飲咖啡，睇法國電影」算唔算中產？其實好多基層市民都會去starbucks飲咖啡，而睇電影嘅都唔少（雖然香港比較少法國電影上映），所以我相信呢個定義唔太正確。

如果單單以月入計算，其實明顯對一班交好多稅嘅人唔公平，因為交幾萬蚊稅（甚至十幾萬蚊稅）𠴱班人的確可以好高薪但又冇乜錢剩。你叫佢地唔好洗咁多錢？其實好多時佢地係身不由己。例如有個男人月入7萬，女朋友點會唔叫你買層樓先好同佢結婚？就算女朋友肯放過你，佢嘅父母都未必會放過你。買樓都仲可以當係投資，咁擺酒呢？平平地都二三十萬啦，你7萬蚊人工喎，擺唔夠三四十圍，洗唔夠四五十萬，你估你結婚後真係可以快快樂樂地生活下去？

如果以周永新教授嘅計算方法：「中產人士至少須擁有物業，月入則為香港個人入息中位數的2至4倍，即約2.5萬至4.9萬元。」咁我諗做中產其實都唔係好有錢，做基層分分鐘舒服過做中產。

其實，睇完單新聞，又睇完好多所謂中產訴苦，我就會諗到一個conflict。如果我係特首，我將中產唔夠錢洗嘅問題解決左，咁其實係咪即係將基層市民同中產市民嘅距離拉遠返少少？D人成日話香港貧富懸殊問題嚴重，咁而家咪加劇左貧富懸殊問題？不過又倒返轉諗，其實貧富懸殊係講緊最有錢嗰班人同最基層嗰班人之間嘅距離，我假設呢個距離係10，咁而家所謂中產市民，我覺得其實同基層嘅距離只有1。

講左咁耐，其實，我想話香港係冇中產的。。。所謂中產，其實係收入比較高嘅窮人。

大公司 vs 細公司

我相信無論邊一個行業，邊一個國家或地區，所有打工仔都有面對過呢個問題：到底喺大公司做好D，定係細公司做好D？

如果你問父母，唔洗諗，佢地一定會叫你入大公司。原因好簡單，作為父母，佢地唔會希望你打辛苦工。如果喺大公司做，人工唔一定高，但福利好大機會好過細公司（當然會有例外的），而最重要係，大公司比較穩定，因為公司夠大，多你一個唔多，少你一個唔少，就算你係冗員，都有可能比你齋坐，坐足一世。齋坐唔洗做，等出糧，何樂而不為？

如果你問身邊嘅朋友，好多時喺大公司做嘅就會話喺大公司度做有幾好，喺細公司做嘅就會話喺細公司度做有幾好。喺大公司度做嘅會話今年Annual Dinner喺邊度邊度搞，有幾大型，頭奬有幾大份，年終花紅有幾多，總之就好似間公司有無限金錢咁，不停派。而喺細公司度做嘅就會話自己喺公司有幾重要，負責好多project，又要成日on call，老細有幾重視自己，又話有幾大機會升職，大公司唔會有呢D機會比你。

講真，大公司有大公司好處壞處，細公司亦有細公司好處壞處，但對你黎講邊度好D，就好視乎你做人嘅目標係乜。如果你希望有份穩穩定定嘅工，收入穩定，每年唔需要加得多，亦唔會有好大壓力，唔洗乜都關你事，咁做大公司係唔錯嘅。但你同時要有所覺悟，你放棄左好多好多發揮嘅機會，亦放棄左變為公司高層嘅機會。講真，喺大公司做，你第一日要做D乜，好大機會兩三年後都仲係做緊嗰D野。你唔會變成一個老細好重視嘅人，因為公司有幾百幾千人，點解要重視你。

而喺細公司做的話，冇錯，你會變得好重要，原因係公司細，你乜都要做，一腳踢，要OT到成隻狗咁，但福利又唔會好得去邊。不過，就係因為你乜都要做，所以你辛苦嘅同時會學到好多野，你會有好多機會去發揮自己嘅才能，老細會越來越重視你，雖然每年佢未必可以加好多比你，但如果你遞信的話，佢一定會花好多時間心機去留你，而唔係收完你封信就同你計得清清楚楚。

我係一個好重視發展空間嘅人，因為同樣打工十年，喺細公司做的話，我得到嘅野會比喺大公司做多好多。而且，我好怕悶，如果叫我十年都做咁上下野，我真會悶死。所以如果比我揀，我一定會揀細公司。

轉工 X 10

如果由大學畢業進入一間公司打工都算係一次轉工，咁我己經轉工十次了。

朋友，舊同事，家人，身邊所有人都會覺得我轉工咁多次係唔啱，應該乖乖地做一份工，最少都做返兩三年先轉啦。講真，我從來冇話過我唔想做得長，其實正正相反，我每次做一份工作我都好滿懷大志，希望可以用到我每一分嘅知識同經驗去做一番大事。

好多人會覺得好好奇，點解我做左9份工之後，都仲有人肯請我去做第10份工。咁我就要問返轉頭：如果有兩個人黎見工，A同B，佢地嘅學歷，年紀，性別都一樣。不過，A做左一份工10年，B做左10份工，最長嗰份做左兩年，而你一定要請其中一個人，你會請邊個？如果我要請一個clerk，我會揀A，如果我要請一個IT Manager，我會揀B。點解？

如果我要請一個clerk，呢份工唔需要好高技巧，唔需要見多識廣，不過我唔想請個clerk都要請完又走，走完又請。所以我會請個做得長嘅人黎做。而A嘅往職話我知佢比較大機會可以做得長，所以我會揀A。

如果我要請一個IT Manager，我就會諗，A只係做左一份工，佢識嘅野，思考方法，見過嘅野都只係局限喺同一間公司入面。就算呢間係幾大幾好嘅公司都好，佢見得唔夠多，遇過嘅問題唔夠多，見過嘅人唔夠多，接觸過嘅公司culture唔夠多，我好難叫佢幫我manage我嘅IT Team。而B，冇錯，佢的確係好jumpy，但每一份工其實學得最多野嘅時間係最開頭𠴱半年到一年，而B好明顯學過嘅野，接觸過嘅project，處理過嘅問題種類，甚至工作上合作過嘅人，都比A多好多。由B黎manage我嘅IT Team，我一定會比較安心。

所以，諗深一層，到底你叫我唔好轉得咁密，係想我做clerk，定想我做IT Manager?

電影欣賞：The Secret Life of Walter Mitty

第一眼睇呢個英文電影名，我相信好多人都唔知係咩電影。喺香港，呢套電影嘅中文譯名係「發夢王大歷險」。導演兼主角Ben Stiller。

呢套電影有兩個misunderstanding。第一個misunderstanding係，大部份人一見到Ben Stiller呢位主角，一定會以為呢套電影係笑片。因為佢嘅笑片角色實在太深入民心，佢乜都唔做，淨係企喺度你都己經想笑。不過呢套電影其實係劇情片，當然，差唔多兩個鐘頭嘅時間，唔多唔少都有D笑位，但引人發笑並非呢套電影嘅賣點。

第二個misunderstanding，電影被譯為「發夢王大歷險」係同原意有極大出入。我睇呢套電影時，都比呢個中文名誤導左，以為成套野只係主角嘅幻想。

電影名字叫The Secret Life of Walter Mitty，當係因為整套電影嘅內容係圍繞住男主角Walter Mitty。而Secret Life其實係有頗深含意。

首先，電影中Walter Mitty係一個極呆板嘅普通城市人，佢有一份深悶嘅工作，就同喺一間名為Life Magazine做一個底片管理員，同埋好似好多城市人一樣有好多支出，而佢嘅生活就係每日返工放工去維持生計。

所謂Secret Life，睇黎係指主角經常發白夢，喺電影最開頭半小時睇落真係咁樣。但事實上，Secret Life係講佢有幾想跳出comfort zone去做自己想做嘅野。佢好想得到愛情，好想好似Sean咁周遊列國，好想去enjoy the moment。如果唔係Life Magazine呢間公司有重大變動，同埋佢暗戀嘅女仔鼓勵佢，再加上佢為左保住份工而去付出努力，我相信佢只會一直做一條咸魚。夢想只會仍然係一個夢想，永遠不會實現。

Life Magazine其實係代表住主角嘅沉悶生活，亦都反映嘅大部份人嘅生活。而呢套電影就係鼓勵人enjoy the moment，去做你想做嘅事，生活並非只有刻板嘅工作同埋白日夢。有時，當你嘅生活(Life)有翻天覆地嘅轉變時，你必須做一D你從來只會幻想嘅事。事實上，你其實有權去控制自己嘅生活要點樣過，到你實現嘅夢想嘅時候，其實你唔需要再去發夢，因為夢想己經成真。

論香港電視

喺城市電訊改名為香港電視(01137)之前，小弟對王維基嘅了解好有限。我甚至根本唔知道原來屋企用緊嘅香港寬頻係佢嘅傑作。當我睇完香港電台制作嘅語出「經」人其中一集講述王維基嘅成功之後，我深受感動。我相信大部份香港人都會有同感。

一間公司，當然唔可以淨係睇一個人嘅能力。當政府宣佈唔會發牌比香港電視時，員工們齊心上街遊行，甚至於政府總部門外一個一個說出心聲。就算香港電視最後決定要辭退數百名員工，佢地亦願意配合，靜待下一個機會。講真，作為一個轉工無數次嘅香港人，我真係未見過一間公司可以咁齊心。而亦係因為咁，我相信香港電視內部運作一定比一般公司暢順，因為公司深得員工們嘅信任同尊重。

香港電視嘅股價，由當初2.0-2.7之間上落，到之前爆上到4.4，再因為各方政治同商業打壓，而最終回落至今日嘅2.9，講真我從中賺左唔少，所以而家亦都唔介意揸貨。如果你問我，香港電視其實值幾錢，我會先建議你睇一睇以下親切的金子嘅專欄文章。



讀者注意，本文分析的公司是由王維基先生管理、前身為城市電訊、今年初正式易名的香港電視（01137），而不是電視廣播（00511）。

親切的金子一向欣賞王維基先生。他領導的城市電訊由加拿大起家，窺準90年代移民潮衍生的長途電話市場急劇增長成功賺取第一桶金。回港後更因為服務價廉物美顛覆了整個長途電話行業，打破了由香港電訊壟斷了幾十年的長途電話市場，令香港市民享受價錢合理的服務。

及後積極發展固網及寬頻業務，亦令行業出現一番新氣象。王維基先生知進亦知退，於去年香港電訊業務接近飽和時以50億元將電訊業務出售予基金，套回大量本錢，進軍免費電視行業，挑戰電視廣播的龍頭地位。

政府發牌成主要障礙

香港電視目前面對最大的問題是政府發牌方面的取態。香港電視於3年前已遞交申請書，可是政府卻遲遲不發牌，加上電視廣播向政府發牌提出司法覆核，令事件增添變數。

當然，如果這個障礙得以移除，其股價亦不會如現價般便宜。截至2月底，集團擁有的現金、銀行存款及債券達26億元，扣除短期債項後亦有23億元，比起集團總市值近19億元還要高。如果公司今天清盤，每股可分發現金為2.86元，比今天股價2.36元高出21%。如果計入廠房及其他資產，每股淨值為4.16元，現價有43%折讓，可謂非常便宜。

投資香港電視要有耐性

有人認為，投資香港電視有如買彩票，若獲發牌股價當然會有可觀升幅，這是其吸引的地方。不過，若情況持續拉鋸，又會如何呢？

集團表示未來3年會投資8億元於新廠房及錄影設施，加上每年約2億元的經營開支，即是說3年內要用14億元。現時集團現金充足，不需籌務經費，假如3年後真的不獲發牌，集團意興闌珊正式除牌，每股資產淨值亦有約3.42元。如果以現價2.36元來衡量，值博率還是非常高的。

金子認為，投資香港電視要非常有耐性，因為股票成交甚為疏落，易被舞高弄低，不夠膽坐貨的讀者易被震走。

王維基擅長破舊立新

當然，論財力、論經驗、論慣性收視，香港電視都不及電視廣播。但王維基先生素來擅長以靈活手法挑戰市場領導者，破舊立新，將龍頭逼入死角狂攻猛打，從而扭轉市場生態為各對手重新定位。這次背水一戰，金子對其有相當期望，王先生加油！

睇完上面呢篇，再睇下面呢篇：

再評香港電視

http://prochats.she.com/miss-geumja/1335.html


其實香港電視值幾錢己經冇得計，因為而家佢大量增聘人手，支出大增，而政府同TVB又下下針對佢，四面楚歌之下，要殺出重圍一啲都唔容易。而我買香港電視嘅股票，唔單止因為相信香港電視嘅賺錢能力，我亦都相信王維基係一個深思熟慮嘅人，唔會未諗清楚就去做一個決定。

人生的意義

最近同一位朋友食飯，講起人生目標，有感而發所以就以此為題寫所呢篇文章。

香港人，生活壓力好大，大部份人每日都忙於搵食，一講到夢想或者人生目標，好多人都會話想買樓。大學生，目標大多都係想畢業出黎搵到工，或者搵份好工，至於何謂好工，咁就真係人人唔同。而中學生，我相信佢地嘅目標九成九都係要入到大學，最好係自己想讀嘅科目。

仲記得中六中七苦讀中國語文及文化科，其中一篇必讀文篇係殷海光嘅人生的意義。當中談及好多道德層面嘅野，大部份內容基本上係離題萬丈，如果要apply喺現今社會，根本就係old school到極。唔講錢，講道德？認真的話你就輸了。

以前嘅香港，處處機會，甚至只要你肯捱，唔需要咩特別知識或技能，你捱到幾十年後嘅今日，好多時己經變左有錢人。點解？因為當時每個行業都係啱啱起步，你只要長命過人地，你今日就己經係大老闆，大商家。今時今日，香港已經冇呢支歌仔唱。你點捱都好，大把人比你更加捱得，你收好低人工咩，大把人比你收得更低。競爭大左，機會少左，想做有錢人就越來越難。

冇錢都可以有夢想。呢句說話係冇錯嘅，你的確可以有夢想，但呢個夢想永遠都只係夢想，唔會有實現嘅一日。你嘅夢想係環遊世界？計計條數先啦，機票，食宿，唔洗錢咩？踩單車環遊世界？咁你屋企人洗唔洗你養先，同埋你喺外地，有意外，有病，你冇錢的話你估真係會好好玩？諗完一輪，你仲想環遊世界？

做人，最開心嘅時間係剛剛大學畢業，有份工，但又未結婚生仔嘅時間。因為你唔會再有讀書壓力，有收入之餘支出又唔多，亦唔需要為左供樓每個月留一筆錢，更唔會有個老婆／老公下下叫你唔好做呢D做嗰D，話要為家庭著想。咁free嘅時候，係實現夢想嘅最佳時機。冇錯，係實現夢想，而唔係去諗下有咩夢想。因為你可以冇包伏咁去working holiday，去見識世界，亦都可以創業並失敗無數次而唔怕影響屋企人。

人老左，你就會望返轉頭，發覺最好時機己經錯過。你會發覺每日返工放工，勞勞碌碌，人生的意義何在呢？

IT interview (7) - 你in我時我in你

好多IT人成功過左interview嗰關被錄用之後，就鬆毛鬆翼，以為最美好嘅時光即將會到來。但你又知唔知其實份工啱唔啱你做？你會唔會做得開心？如果你不嬲寫開C++，叫你寫Python，你又點睇？如果唔單止要寫program，仲要做埋IT support，同事上唔到網，收唔到email，甚至個枱頭電話有問題都要搵你，咁你又會點諗？

我相信好多人interview時都好乖，個interviewer問乜答乜，Q&A時又唔會問得太多問題，藉此令到整個interview好順暢，希望留下好印象。可惜咁樣反而浪費左一個好好了解份工嘅機會。講真，所謂interview，一般認知都係interviewer去了解candidate識唔識合呢份工，但諗深一層，個candidate send CV黎，同埋黎interview，其實只係base on一個非常簡單嘅job ad去做決定。好多時，一份工要做好多野，而且唔係三言兩語可以講得晒，而寫job ad嗰個人又唔一定好熟悉份工，寫出黎嘅野同到時真係要做嘅野可以差好遠，尤其係一D新開嘅position，寫job ad時好多時根本未諗好係要做D乜，用D咩technology，工作範圍有幾闊。

所以，interview其實係你in我時我in你，你想知D咩，可以問我，但我同時都會想知道好多野，唔好以為你覺得我好啱呢份工我就會做，我都要睇下你份工係做D乜，expect D乜，又肯比D乜，唔會比D咩，唔准做D咩。好簡單，如果你到返工第一日先知原來有人日日喺office食煙，一日四次，每次半小時，但公司唔需要你過probation，即時坐正，但要你三個月通知先可以離職，咁你真係預左最少吸三個月二手煙。Interview最忌做乖仔/女，乜都唔問，坐定定答問題。就算最後真係請左你去做，你可能都會喊三聲。

Go Pro, Phantom, What's Next?

曾幾何時，仍然係大學年代o個陣，身邊好多人，包括自己，都對知識追求好有熱誠。記得當時冇參加過任何學會，亦冇上莊，但參加左一個比賽 - 全港大專生機械人大賽。當年o係香港係第一屆，所以資源唔多，亦冇人教路。我好enjoy呢個比賽，brain storming，整prototype，由十幾組人變成三隊去參加比賽，全部都瀝瀝在目。

當時o既teammate而家己經各有所長，各散東西之後，各有各精彩。我相信最精彩o既應該係Frank Wang, DJI公司o既創辦人。當年佢己經對直升機好有熱誠，今日，佢己經將熱誠化為產品，由轉為金錢。每個故事背後總有一段辛酸史，而且唔係每一個故事都會有完美o既結局。Frank Wang之所以成功，除左佢自己努力之外，亦好需要天時地利人和，佢o既故事可以o係呢度睇到:

http://www.ust.hk/alumni/upload/publications/HKUST_Alumni_dec13.pdf

DJI公司最為人所知o既產係Phantom系列，可以同黎高空攝影，拍片，同Go Pro有異曲同工之妙，甚至根本可以同Go Pro一齊用。

好多人會話，如果我係佢，我都得啦。拿，咁而家有個機會放o係你面前。唔需要自己去發明D咩，因為己經有人發明左，你只要攞返黎，改少少，再賣出去，咁就可以賺大錢。咩黎？咪就係OpenROV。

OpenROV係一部潛水機械人，佢可以潛入水底，將影像傳送返去水面o既電腦。最特別係，佢成個project都係open source，無論係零件，軟件，安裝過程，如何買到零件，全部都寫得清清楚楚。亦都係因為咁，我相信大陸好快就有人抄足呢部野，然後大量生產，然後改良，然後再生產。想做第二個Frank Wang，機會黎啦~

IT interview (6) - Q&A

唔知大家interview時有冇留意，大部份interviewer到最後都會問返你有咩想問。有D人會直接話"我冇咩問題"。其實呢個Q&A session先係最重要o既時間，何解？

第一，Q&A一定係最後一個環節，所以完左個interview之後，無論係interviewer定interviewee最深刻印像o既都係呢一個部份。兩邊都會不停回想返對答之間o既細節，從而估計對方真正想法。

第二，Q&A session係幫你更了解呢份工，呢間公司，呢一team人。好多時，interviwer都唔會主動去講公司背景，structure，發展方向，人數，公司culture等，而Q&A就係最好o既時間去問呢D細節喇。

第三，Q&A session亦都係最好o既補救時機，如果你自問整個interview都表現得好差，又或者覺得有D美中不足，Q&A就可以比個機會你去令interviwer對你挖目相看。好簡單，如果你完全唔問問題，咁就代表你唔在乎工作環境等細節，亦都反映你唔會認真看待呢份工，即係話，你可能工作幾個月就會諗住走，咁interviwer當然唔會花時間精力去train你啦。如果你問一D以金錢為主o既問題，例如每年有幾多花紅等，咁其實interviwer就會明白你工作目的係為錢而多於興趣，前途，熱誠等。

咁其實一般interviwer會鐘意candidate問咩問題呢？講真，每一個interviewer都唔同，不過重點在於你要扮一個有熱誠，有能力，而且容易相處o既人。所以Q&A時你要問一D同工作崗位相關o既問題，例如呢份工o既細節，team structure，個team有幾多人等。記得interviwer每答你一個問題，你自己都要比返少少comment，例如interviwer話個team structure好flat，唔會有一層一層o既管理，就算你心目中幾唔鐘意都好，你都要話好，仲要扮到想有咁o既team structure好耐，當然，如果你係真心o既就更好。你可能會問點解要扮野，咁我就會問返你轉頭，你想唔想要份工？如果想o既，你就要扮，呢D係interview必需的，過左interview，入左去做，你先再講你o既真正想法都唔遲。