IT interview (5) - 死穴

interview o既中文係面試，其實最重要o既元素係面對面講野。最近又有另一位朋友去左interview之後分享經歷。
呢位朋友係一個好資深o既Java expert。佢in呢間公司係一間startup，啱啱攞到funding，諗住o係香港大展拳腳。呢間公司係做FX，即係外匯。據朋友講，雖然佢地仲請緊人，office都仲裝修緊，但己經攞左牌，起左個website比人開account炒FX。而呢間公司最有趣o既地方係，佢地第一款product唔係炒一般o既貨幣，而係炒bitcoin。
Bitcoin係一種網絡上面流通o既虛擬貨幣，可以o係好多網絡商店買野，同埋可以用credit card買bitcoin。而呢種貨幣o既流行程度，竟然可以發展到可以同世界上不同貨幣自由兌換。即係話，其實bitcoin己經由虛變實，最近仲開始有bitcoin ATM，而且仲會越來越多。講返轉頭，朋友去in o既呢間公司，就係睇準bitcoin呢種新興貨幣，去整一個平台比人炒賣。所以而家雖然起左步，但個老細仲想請多D人，去起不同o既平台去炒相關o既產品。
佢o個日上到去間公司，一睇就知係一間startup，因為間office仲裝修緊。成間office唔大，有兩三間房，其餘地方就整D豬肉枱，非常慳位，一眼望落真係似computer lab多D。佢同呢間公司o既CTO傾計，一坐低，就當然講下間公司o既business啦。朋友估得冇錯，真係炒bitcoin同其他貨幣，但黎緊仲有好多project會做，會grow去不同business area。而家呢間office咁細，當然唔會夠坐，所以佢諗住o係大陸都會build個development team。
今次呢個interview，主要係考concept，佢問好多technical o既野，問你識唔識，唔識o既話佢就唔會drill down，如果你話識，佢就會越問越深入，睇你識幾多。舉個例，佢問左我朋友識唔識JQuery, AngularJS, 等，但由於佢主要都係做server side，所以都答佢唔識，同埋話佢知自己長處o係邊。咁樣有幾個好處，第一，interviewer唔洗浪費時間一樣一樣問你識唔識，你話唔識邊個area，就可以快手D。第二，interviewer會覺得你好清楚自己識D乜，唔識D乜，而唔係好似D fresh grad咁，乜都話識。第三，interviewer如果問黎問去都係D你唔識o既野，你自己都會開始冇信心，對成個interview都唔會有好處。所以呢位朋友真係做得好啱。
個CTO之後開始主力問server side野，例如點樣tune performance，點樣避免好多條thread一齊郁個object時會出錯，點樣用hibernate同spring，裡面D transaction係點運作，乜野係sql injection。然後再問UML，例如sequence diagram係用黎做乜。其實佢答呢D問題係冇難度，唔似做test咁，要好準確o既答案，只要prove到你係識就得。其實呢D先係interview主要o既目的。
不過，對呢位朋友黎講，成個interview最令佢冇信心係講英文。因為個CTO係鬼佬，一定要用英文同佢溝通，而佢一向用開廣東話去解釋technical野，所以佢講得好唔流暢。
所以話呢，邊個話讀唔掂英文o既就去學IT，應該倒返轉，讀好左英文先好黎讀IT！

IT interview (4) - 背野

繼續上一次o既話題，interivew時叫candidate做test，的確可以filter到一D連基本知識都冇o既人，簡單D講，呢D人其實係白撞，駁大霧。但如果個test太難，係會連D有potential o既candidate都filter埋，咁就真係唔知整個test黎為乜。

好多大公司大企業都有test，o既好多時個test係要你背API，背protocol，背syntax，甚至背晒咩version有咩唔同。呢D咁o既test，我通常一見到就眼火爆，點解？首先，作為IT人，我相信絕大部份人都係唔會背呢D野，而係需要時先睇返document，搵返個reference，如果唔係點解大學讀咁多野教寫document？仲有，如果要背晒咁多野先叫pass，唔該你叫我做test之前比個syllabus我，我考慮下讀唔讀先黎join個test，不過我相信就算真係比到個syllabus我，我睇完都唔會黎做test，因為個test根本唔make sense。不過，間公司話唔定真係想請個背到晒咁多野o既"神人"，咁我會諗，如果呢間公司咁啱請左我，我入到去，咪要日日對住成班"神人"？

唔好意思，我唔係"神"架。

男女大不同?

一直以來，聽好多好多人講男女有幾唔同。D人成日話男人對女人諸多要求，又要天使面孔，又要魔鬼身材，又要有返咁上下學歷，又要小鳥依人，又要唔失禮人，其實女人對男人要求都唔少，又要有樓，又要有車，又要高學歷，又要型英帥靚正，搵到錢之餘仲要唔會亂洗錢，有上進心之餘又要工作穩定，仲要玩得，睇得，依靠得。其實我想話，男女對異性要求並無大不同，一句講晒，要better than above average。

聽唔少單身朋友講，不論男女都會話，唔知點解自己咁好條件都冇人要。其實你應該先反省一下，你想咩人要你？好多人一開始會話自己要求好簡單，女仔會話："我無咩要求，淨係想搵個男人依靠下咋"。
"咁啱我有個朋友，佢都係單身，可以介紹你識喎！"
"佢做咩職業？"
"做IT。"
"下，IT人好宅架喎！"
我心諗，我都係IT人...
"佢好玩得，唔宅架。"
"有冇相呀，比我睇下先啦。"
"佢唔靚仔架。"
"咁你做乜介紹比我？"
"咁另一個朋友啦，做醫生，搵到錢，又玩得，又好傾，佢仲成日做gym，好健碩，應該啱你。"
"咁好？咁佢點解冇女朋友？"
"佢身材比較矮小。"
"有幾矮？"
"同你差唔多囉。"
"下...唔好玩啦"
其實我想講，你話無要求，係有個"如果"o係前面: "如果佢咩都perfect，咁我咪無要求囉。"
唔好玩啦...佢咩都perfect的話，點解要揀你？
事實上，男人都會有以上情況發生。男同女其實都一樣，都係想搵比自己高level一大截o既異性。而高level o既，又點會揀低level o既呢？
下次再呻冇人要之前，麻煩你反省下自己咩level，想搵咩level。

IT interview (3) - interviewer

最近聽說一個朋友in一間誇國企業o既IT位。個interviewer只係問左兩個technical questions。而其中一題係問validate一個email address o既regular expression。聽落呢題問題好似好professional，唔職IT o既人一定會覺得連佢問乜都唔知。

我其實想講，呢個interviewer真係唔知咩叫interview，無論係識識地IT o既人，定係好資深o既IT人都會話唔職答呢個問題。點解？因為IT人唔係唔背野的。如果可以google到o既，點解要記？google搵答案，隨時一分鐘之內就搵到。而我要自己去solve個問題，我諗我最少要幾個鐘。個interviewer問呢個咁o既問題之前，其實佢有冇諗過呢個世界有google。

呢個世界上實在有太多interviewer問D垃圾問題。如果一條問題係乜人都答到，或者乜人都答唔到，咁你問黎目的係為乜？除非個interviewer別有用心，諗住你好醒咁答佢："比一分鐘我google完再答你。"

Hygiene Factor

香港人轉工已成習慣，但大部份顧主仍然唔知點樣留人。人才係一間公司成功o既重要元素，冇人才，間公司有幾大優勢都發揮唔到。而最明顯同最容易改善o既問題，其中一個應該係Hygiene Factor。

字面上，Hygiene Factor似乎係覺衞生問題。多D清潔辦公室，似乎同留住人才冇乜關係喎？其實Hygiene Factor係一D影響員工對工作或工作環境滿意度o既因素。聽落好覆雜，但其實背後理論好簡單。舉個例，如果你將自己間房打掃得好整齊，其實好少人會特別留意。但如果你間房好亂，好污糟，客人黎到會好自然留意到。原因係，一般人會覺得打掃房間係好正常，你唔打掃就好唔常。同樣道理，你每個月準時出糧係好正常o既事，你平時唔會特別留意幾時出糧。但如果你公司出糧唔準時，你就會鬧爆間公司，甚至o係多次遲出糧之後一你之下唔撈。呢D就係公司好易做到而唔去留意o既問題。唔單止出糧時間，其實好多小問題都會令員工不滿意，例如枱頭電腦仲用緊xp(而且係龜速)，每次要求買文具都要半年時間先買到，想print野o既時間printer成日都冇墨，公司厠所永遠都係臭o既，公司冷氣點較都係凍(熱)到飛起。

其實不同工作環境都有不同o既例子，顧主如果想保留人才，應該好好反省下點樣改善呢D問題。

IT interview (2) - technical test

香港IT人同外國IT人最唔同o既地方係，香港IT人經常轉工。大部份IT人平均一份工只會做1年半到兩年。原因就係同我之前提過o既待遇同workload不成正比。所以，識得interview o既IT人係會著數好多，同樣有十年經驗o既IT人，人工可以相差超過一倍。所以，interview skills係非常重要。亦都係因為咁，為左保持競爭力，我時不時都會出去interview，一來可以train下自己interview skills，二來可以參考下人地點樣interview，三來如果出面有公司出得起錢請我過當，而我又覺得份工OK o既話，轉下工又有乜所謂呢？I am always open to any opportunities.

最近去左一間誇國公司做個interview test，間公司主要提供system support比ibank同大型金融機構，呢個test主要係針對Java Development。去之前己經聽聞呢間公司會考得好詳盡，而且一D都唔係膚淺野。未考之前，淨係睇份test有幾多張紙，己經唔小野，拎起手係有重量，係一疊紙，而唔係幾張紙。以前我都有試過準備interview test o既問題，都只係5-10張紙，而呢份卷係幾十張紙。我未做己經O左咀。一邊做份卷，我一邊繼續O咀。因為份卷由java collections framework, exception handling, multi-threading, java memory structure, garbage collection到CVS,GIT operations, Linux command, SQL statement, JDBC。基本上你識同唔識o既野都考晒。

除左考technical skills之外，interview test多數仲會有business knowledge o既問題。視乎唔同職位，份量會唔同。例如呢間誇國公司o既另一份針對面對客戶o既職位o既test，會問咩係Equity，咩係Options，知唔知間公司有咩core product，知唔知公司有咩對手，對手provide咩product。同樣係非常詳盡o既test。

IT人一向以ibank為目標，只要入到ibank就發達，但有冇諗過就算比個機會你去interview，可能未見人就己經輸左o係份test度？

Java

不知不覺，用Java寫program都用左十幾年。仲記得當初未學Java之前，係學C++先。相比C++，Java API易學易用，而且容易debug，所以自從學左Java之後，基乎所有program我都係用Java黎寫，連A.I.都唔例外。

Java好處多，但亦有缺點。當年比人講得最多o既係Java永遠都run得慢過人，成隻大笨象咁，所以D人唔會用黎寫D mission critical o既application。但近幾年Java己經改善唔少，就連市場上唔少stock trading system都用緊Java。

Java仲有一個好大o既優點，就係佢o既garbage collection mechanism。用完o既object可以唔洗理，等system自動抹走，就可以reuse memory。但o係C++就要特登寫行code去delete object，唔記得delete o既話就會造成memory leak，但如果太早delete的話，一call delete左o既object就會爆error，輕則system crash，重則藍畫面。而且，就算用debug mode行C++做testing，D error msg都係超難睇，淨係debug都好麻煩。而Java就handle晒呢D麻煩野，令developer真正focus on business logic。

下面係Java一直以來o既version，同埋release date。

Source: http://blogs.perceptionsystem.com/infographic/history-java-versions-release-date-distribution/

香港，留或不留?

最近見到好多文章或報道開始對留唔留o係香港講得越來越多。大家將香港同新加坡，台灣，澳門比較，而且有好多朋友都話想移民。講真，97回歸到而家己經16年。香港己經一步一步改變，而家o既香港己經同以前唔同左好多，如果所有野繼續好似而家咁行落去，我深信香港只會downgrade成中國o既一個城市，而唔係一個國際大都會。
香港政府由23條問題，國教問題，到而家發牌問題，一次又一次同民意背道而馳，我相信香港政府而經唔係為香港市民服務，而只係中央o既一個傀儡。所以，香港呢個地方真係不宜久留，因為香港己經唔係香港人o既地方。

環遊世界(1) - 泰國 - 布吉

一星期布吉之旅，真係可以令人放鬆。每日陽光與海灘，晚晚龍蝦海鮮餐，計一計條數，真係乜都比香港平幾倍。
黎布吉玩，雖然話乜都平，但對當地人黎講，其實乜都貴，只不過香港賺錢布吉洗，D錢好洗好多。今日就同大家分享下去布吉玩點樣可以平玩~

Day Trip
大部份去布吉玩o既遊客都會報day trip，你只要o係條街行一轉，就會發現通街都係報day trip o既小鋪。同樣都係o個堆行程，o係酒店入面都有得報名，但個價錢就會貴少少，而且佢地唔會減好多比你。咁點樣先可以玩平D呢？
首先，由機場去酒店時，好多時會坐mini-bus，因為平，大概180B。但D mini-bus會中途停一停，話就話要D人落車講清楚去邊間酒店，但其實係叫你join佢地D day trip。呢D地方最多只會比大概七八折，你聽到以為好平，但其實去到酒店附近，行出街book day trip，係可以講價講到三折！如果你己經一早諗好邊幾日會join day trip，一次過報名，你o既bargaining power會更大，可以減得更多。我地兩個人去day trip，其中一日係三合一，即係一次過去晒三個地方(Maya Bay, Khai Island, Monkey Beach)，而trip o既一位印度人，佢報名要2200B，我地就兩個人加埋先2200B，足足平佢一倍！

Currency Exchange
兌換泰銖，唔好以為o係機場換好方便，其實機場個rate一D都唔平。其實只要有少量泰銖o係手，去到酒店附近D找換店唱錢個rate會靚好多。當日我o係機場見到係3.92,而o係Patong Beach附近最靚係可以3.99。只要行多幾條街，好容易就搵到個rate靚少少。而且其實可以有需要先，唔洗一次過換好多，因為真係條條街都有間找換店，仲密過香港o既7-11。

Book 酒店
我多數會o係Hotels.com度book酒店，因為個價同其他網站差唔多，而Hotels.com個App又幾好用。而且，住滿10晚會送一晚，之前就係因為咁，去澳門睇水舞間可以唔洗比錢就住一晚酒店。Hotels.com有時會有promotion，有九折coupon code，但如果用code，就唔計落住十送一度，所以自己要計下數。另外，布吉酒店唔好咁早book，因為D酒店房係會跌價的，除非你想住D好高級o既酒店房，如果唔係，去之前半個月至一個月先book會最平。今次呢個trip，我就住左Burasari同埋Kalima。兩間都好ok。尤其Kalima個Pool Side BBQ o既beef steak，燒得好正，D汁又好味，仲包埋salad bar任食，我地最後食左兩次~價錢，每份320B，大概80蚊港紙，真係平靚正~

留意
酒店雖然好，但原來好多時係唔包牙膏牙刷，所以去布吉最好帶定。另外，報day trip時，個agency一定會話everything is included，但你會發覺浮潛只包Mask同Snorkel，唔包Fin，要租Fin就另外比100B。仲有，沙灘椅都係唔包，要到時比錢，唔同地方唔同價錢，大概100到150B。洗手間都好多時要比錢，10到20B左右。Day Trip會有一個tour guide帶住，會有briefing，完左day trip佢會問遊客攞小費，有D人會唔比，但我覺得佢講解都幾好，心幾十B冇乜所謂，最緊要開心。

Recommendation
Patong Beach有個shopping mall叫Jungceylon，好似譯做江西冷。裡面有好多野買，但最值得留意o既係佢附近o既Banzaan Market。Banzaan Market有兩層，下面係街市，好似香港o既wet market咁，上層係一個food court，但佢地主要係幫你煮餸。我地o係Banzaan Market食左兩次，每次都係o係街市買左海鮮，然後拎上去叫人整。第一次就食龍蝦刺身同炒大蜆，第二次就一人一隻蒜蓉蒸龍蝦，同埋十幾隻超大隻瀨尿蝦。呢兩餐每餐大概2000B左右，即港幣500蚊左右，真係平。我都未試過食龍蝦食到飽。仲有要留意o既係，Banzaan Market有D水果Shake，每杯40B，我地行晒成個Patong Beach都搵唔到呢個價錢o既shake，而且佢係用真水果整，好好味，又係平靚正~
仲有,Banzaan Market外面o係入夜之後會有夜市，好多小食，所以Banzaan Market入面會不停減價清貨，呢個時候D海鮮係最平~不過要小心，上層食肆如果收晒就冇人幫你煮架喇~

IT interview (1) - test

IT人面試同其他位置最唔同嘅係，你好多時需要做test，有時係數學題，有時係technical題目，有時係IQ題。每個test嘅目的都唔同，好視乎請呢個位嘅人係咩人，識唔識IT。如果成個面試過程都冇乜做test，而又吹水多，咁好明顯你將來嘅上司都唔必識technical野，所以唔識點challenage你。
好耐之前試過去一間日本公司interview，一黎就先做test，一睇，全部都係數學題。最記得有一題係問，有隻蟻由一個正立方體嘅一個角走到對面個角，正立方體所有邊長都係1m，咁隻蟻最少要行幾遠呢？呢個好明顯係考你3D concept，同埋一D數學公式。（你地又識唔識答呢？）
其實更多公司係要你即時用紙同筆寫program，呢D test其實唔expect你背到晒D library點用，而係考你解決問題嘅能力，好多時都係要你寫個sorting出黎，去証明你有基本programming 嘅底子。所以其實應該一早就預備定sorting algorithm，只要做test基本上十次有八九次要寫。
不過仲有D好嚴謹嘅公司係會即時比部電腦你寫program，咁呢D就真係冇辦法，完全靠你實力同經驗去做，冇得出貓。

如果IT部門流血不止點算?

IT一向比人o既感覺係執頭執尾，平時行行企企，唔有咩做，部電腦有咩事先搵你。而且做親IT project下下幾百萬budget，洗咁多錢又唔識搵錢。所以IT人長年都係處於非常低工資o既狀態。一般大學畢業生，只有一萬頭，我自己當年畢業，連一萬都冇。而家，連洗碗都可以搵萬幾兩萬，仲要冇乜人想做。
IT工資低，己經唔係新聞，人人都知，所以請IT人都一定有得壓價就壓到盡。但係，又有幾多人知道IT工作有幾辛苦呢？就以我自己為例，當年仲係得萬零蚊人工o既時候，平均8-9點收工，好多時要11-12點先收工。而且星期六好多時要做testing，要返公司OT，但唔會有補假補水，過年過節要做system upgrade，又要做到好夜，甚至要通頂。
試過有一次，system launch 當日，system support同事由下午開始準備第二日要system launch，抄晒D file，拎去客人公司server 房，所有野有晒procedure跟，我呢D做developer o既，梗係唔會出手，但凌晨時份收到call，出左事，個system好似有問題。當時係3點鐘，我住屯門，客人公司o係側魚涌。用最快速度飛的去，都差唔多5點先去到，所有野重新verify過晒，搵到幾個小問題，然後重新再行成個procedure，可惜都係唔得。之後，用左兩日兩夜去搞，最終都launch左，不過我己經攰到死咁濟，因為兩日兩夜冇休息過。而個客仲要我stay o係佢公司睇住套野。。。好似唔想比我返屋企咁。。。
呢D情況，我相信每日都不停發生，我有時會諗，如果呢個世界突然冇晒IT人，會變成點呢？
事實上，由於IT人工資低，好多人都轉行唔再做IT。所以近年IT開始鬧人才荒，基本上間間公司都請唔到IT人。有D公司開始重視IT，因為怕D人走晒之後冇人睇住D system，有事唔知搵邊個。但有D後知後覺o既公司就仍然唔重視IT人，最近有個朋友間公司就係咁，成個IT department o既人不停走，D人走得快過請人，system support己經唔夠人，最近仲一次過走左三個developer。最後，連個CTO都話要走，D人真係handover完又handover，都唔知有幾多野失傳左。呢間公司o既IT最終得返兩個system support同兩個developer。事情發展落去會係點呢？我都好有興趣想知。

大市上升,點買樓?

好多人都覺得而家樓價太貴，好難買樓，希望個市跌。但其實諗深一層，個市跌，你係咪會買到樓?

如果你已有一筆現金，為買樓而準備，隨時可以動用的話，咁恭喜你，你好大機會買到樓，只要你筆錢足夠一次過買斷層樓，又或者你有穩定職業，銀行做到按揭比你，而你筆錢又足夠比首期同雜費。

但係，如果大市升，原本以為夠錢買樓，變左唔夠錢買樓，咁又可以點呢？

如果你自己己經有一層樓揸手，咁就好易，只要你加按就可以套現，咁你就有多D資金去投資第二層樓。

但我相信大部份想買樓o既人都只係想上車，點會有第一層樓。咁大市一直市上去點算??其實買樓需要o既，不外乎一筆首期同足夠o既供款能力，有樓的話，加按可以增加現，令你可以比到首期，但冇樓o既話，其實可以增加自己供款能力。最直接方法就係搵份更好o既工，大市上升，轉工加薪有時比起公司主動加薪會加得更多。如果有時間，可以讀多D野，例如讀個master，就算對加薪幫助不大，你學多左野，又識多左人，絕對算係長線投資，對你將來再加薪會有幫助。樓市週期係講緊幾年到十幾年o既時間，足夠你去部署加薪略，將來樓市跌，你只要穩守人工，保住供款能力，咁對你上車一定有幫助。