唔識唔好扮識

我諗每一個IT人都見過有人o係自己面前班門弄斧，就好似最近有人話bitcoin發行量可以無限。講真，我睇一睇此專欄作家係邊位，然後記住呢個人吹水唔抺咀，以後佢寫D野9成不可信。

唔識bitcoin o既，就唔好扮識，連bitcoin係點產生都唔知，就唔好扮晒專家，仲要話"虛擬貨幣非「有限」...既然人人皆可無中生有，那虛擬貨幣的發行量實際上是無限。"其實佢知唔知自己講緊乜。bitcoin mining最初的確係好容易，但而家己經要靠強大o既電腦或者用crowd sourcing o既強大力量去挖。如果想做bitcoin miner，自己google下點做啦。如果想無中生有，可能要問下o個位"作"家。

除左寫專欄o既人之外，D上司老細都好鐘意明明唔識又扮晒識。講左好多次，IT人每個都有自己o既skillset，你要請一個人做Role A，就唔好請左佢返黎就叫左佢做D風馬牛不相及o既Role B。有咩問題？問題就係佢未必識做Role B，就算識，佢都唔會鐘意做Role B，因為佢當初accept個offer係想做Role A。你叫佢做Role B，其實同叫佢自動辭職冇分別。老細們經常以為IT人就係IT人，請一個IT人，咁所有IT野都可以搵佢做。我想講，IT人唔係文員，你請個文員執文件，佢梗係乜野文件都識執，但你請個IT人返黎，你點可能expect佢又識寫program，又識起network，又識買機報價，又識vendor management，又識...(下刪一百字)

其實，各位上司老細，o係你做任何同IT有一丁點關係o既動作前，可唔可以先consult下你o既IT最高領導人(即係CTO or CIO or CISO)呢？冇？咁你consult下我，睇下我幫唔幫到你。唔好再乜都唔識又要扮晒識。面係人地比，架係自己丟，路姆西係人地丟你。