如果IT部門流血不止點算?

IT一向比人o既感覺係執頭執尾，平時行行企企，唔有咩做，部電腦有咩事先搵你。而且做親IT project下下幾百萬budget，洗咁多錢又唔識搵錢。所以IT人長年都係處於非常低工資o既狀態。一般大學畢業生，只有一萬頭，我自己當年畢業，連一萬都冇。而家，連洗碗都可以搵萬幾兩萬，仲要冇乜人想做。
IT工資低，己經唔係新聞，人人都知，所以請IT人都一定有得壓價就壓到盡。但係，又有幾多人知道IT工作有幾辛苦呢？就以我自己為例，當年仲係得萬零蚊人工o既時候，平均8-9點收工，好多時要11-12點先收工。而且星期六好多時要做testing，要返公司OT，但唔會有補假補水，過年過節要做system upgrade，又要做到好夜，甚至要通頂。
試過有一次，system launch 當日，system support同事由下午開始準備第二日要system launch，抄晒D file，拎去客人公司server 房，所有野有晒procedure跟，我呢D做developer o既，梗係唔會出手，但凌晨時份收到call，出左事，個system好似有問題。當時係3點鐘，我住屯門，客人公司o係側魚涌。用最快速度飛的去，都差唔多5點先去到，所有野重新verify過晒，搵到幾個小問題，然後重新再行成個procedure，可惜都係唔得。之後，用左兩日兩夜去搞，最終都launch左，不過我己經攰到死咁濟，因為兩日兩夜冇休息過。而個客仲要我stay o係佢公司睇住套野。。。好似唔想比我返屋企咁。。。
呢D情況，我相信每日都不停發生，我有時會諗，如果呢個世界突然冇晒IT人，會變成點呢？
事實上，由於IT人工資低，好多人都轉行唔再做IT。所以近年IT開始鬧人才荒，基本上間間公司都請唔到IT人。有D公司開始重視IT，因為怕D人走晒之後冇人睇住D system，有事唔知搵邊個。但有D後知後覺o既公司就仍然唔重視IT人，最近有個朋友間公司就係咁，成個IT department o既人不停走，D人走得快過請人，system support己經唔夠人，最近仲一次過走左三個developer。最後，連個CTO都話要走，D人真係handover完又handover，都唔知有幾多野失傳左。呢間公司o既IT最終得返兩個system support同兩個developer。事情發展落去會係點呢？我都好有興趣想知。

大市上升,點買樓?

好多人都覺得而家樓價太貴，好難買樓，希望個市跌。但其實諗深一層，個市跌，你係咪會買到樓?

如果你已有一筆現金，為買樓而準備，隨時可以動用的話，咁恭喜你，你好大機會買到樓，只要你筆錢足夠一次過買斷層樓，又或者你有穩定職業，銀行做到按揭比你，而你筆錢又足夠比首期同雜費。

但係，如果大市升，原本以為夠錢買樓，變左唔夠錢買樓，咁又可以點呢？

如果你自己己經有一層樓揸手，咁就好易，只要你加按就可以套現，咁你就有多D資金去投資第二層樓。

但我相信大部份想買樓o既人都只係想上車，點會有第一層樓。咁大市一直市上去點算??其實買樓需要o既，不外乎一筆首期同足夠o既供款能力，有樓的話，加按可以增加現，令你可以比到首期，但冇樓o既話，其實可以增加自己供款能力。最直接方法就係搵份更好o既工，大市上升，轉工加薪有時比起公司主動加薪會加得更多。如果有時間，可以讀多D野，例如讀個master，就算對加薪幫助不大，你學多左野，又識多左人，絕對算係長線投資，對你將來再加薪會有幫助。樓市週期係講緊幾年到十幾年o既時間，足夠你去部署加薪略，將來樓市跌，你只要穩守人工，保住供款能力，咁對你上車一定有幫助。

怪獸老闆

呢個世界除左有怪獸家長外，原來仲有怪獸老闆。

最近有位IT朋友在公司負責一個大Project，此Project雖然係IT Project，但同IT department係分開的，所有team member都係新請返黎，完全係為呢個Project而build一team人。我聽落真係好羨慕，因為咁o既機會真係唔多，可遇不可求。

原本個Project進行得如火如荼，而上司亦一直贊成繼續進行，亦沒有表示過Schedule和Budget有咩問題，但最近準備向Vendor買野之際，突然剎停整個Project，最少遲半年先可以比錢買野，成Team人當然大惑不解。有D人原本因為可以大展拳腳而加入，而家都意興闌珊，只要搵到新工就會閃人。

呢位IT朋友當然盡力想辦法留人，始終今時今日好難請到經驗豐富又做野落力o既IT人。但係仲未諗到方法o既時候，大老闆突然o係例會上話想學IT，仲話黎緊呢一年會去IT department坐下，有咩事就去IT department搵佢。最奇怪o既係，老闆竟然叫埋呢team人一齊去IT department學野。結果，而家成team人乜都唔做，淨係坐喺老闆隔離學野。學D咩？當然唔會係深野，全部都係講D application點用，D制有咩效果，點會掂到programming同networking。

佢地成team人而家個個都叫晒救命，己經準備跳船，結局會係點似乎真係好明顯。真係估唔到呢個世界會有呢D怪獸上司怪獸老闆。

想請IT人定請超人?

有時真係覺得好好笑，喺非IT人眼中，原來個個IT人識o既野都一樣，無論你係寫開Java定C++，做開Support定寫開Programmer，總之你係做IT就應該乜IT野都識。
之前同朋友傾開計，屋企人係唔理你做咩位，總之你係做IT就所有有個電字o既野都識整，識整電腦唔出奇，整電燈，電制都唔算好難，但電熱水爐，電熨斗呢D真係唔係好識整囉，聽講最近仲漫延到有個機字o既都要識，例如洗衣機，電視機，吸塵機，冷氣機。其實我想講，如果大家expect IT人識咁多野，點解唔比高D人工呢？
其實而家D人請IT人，個requirements都係寫到咩都要識，由networking到programming，由C++到ASP.NET，由MySQL到Oracle，由Tomcat到WebLogic，由Windows到AIX，其實，你到底想請個咩人呢？而你又出起幾多錢去請個識晒呢D野o既人呢？

做IT好風光?

作為一個IT人，好明白IT行業情況如何。Programmer一向人工低，工時長，瘋狂OT之餘又唔會有補假補水，辛苦得黎老細又唔會睇得起你，你唔做，大把人爭住做。但外界又點睇IT呢？今朝聽收音機，講到喺IT公司做好有前途，好風光咁，明顯同實際情況有好大差距。到底IT人有幾可憐呢?
首先，由於一間公司入面o既IT部門一般只係會洗錢，唔會有收入，所以高層唔會重視IT，因此，請IT人亦唔會高人工。而outsource IT project，亦唔會揀貴野，但高層又expect比得錢人地就要快靚正。
作為一間IT Vendor公司老細，D客比得錢少，但又要求多多。但可以唔接咩？接！但要D developer做到成隻狗咁，要做到平靚正，唔OT點趕deadline？補水補假？補左比你，公司賺乜？結果就係做IT又辛苦，又低人工，又工時長，又壓力大，又冇補假補水。
如果你身邊有IT朋友，問下佢工作情況，佢實大把苦水要吐。

買樓?炒樓?

身邊的朋友都為買不到樓的問題而苦惱，尤其那些己經和女友拍拖好幾年，準備結婚的朋友。結婚一定需要買樓？不一定，但有好過沒有，因為有面子得多，女家家人不會因為你沒有樓而不把女兒嫁給你，但會在言語之間流露出對你的不尊重，就好像女兒嫁給你之後就沒好日子過一樣。
最近看了別人的Blog，說怎樣炒樓，賺了多少桶金，計算詳盡。我相信的確有人可以從樓市人穫利，但我不相信人人都可以做到。道理很簡單，投資樓市是非常長線的投資，每買一個單位，都需要注入一筆現金，而這筆現金根本不少。儲錢的確可以儲到足夠現金去買第一個單位，但前題是儲錢的速度需要快過樓價的升幅。而且，每次交易都需要付出一筆交易成本，例如經紀佣金，印花稅等。所以如果一個人可以有足夠金錢去炒樓，這個人必需有非常多的資本。而且，政府的辣招把現在的炒樓活動的成本大大增加，要遇到有水位的樓盤是非常考眼光的。一不小心，儲到的錢又要重頭再儲一次。雖然說買到的單位可以出租，但租價多少，真的視乎市場供求，地理位置而定，最近由於政府推出辣招，持貨者難以出貨，大量樓盤改為出租，大量租盤供應，使租價受壓。結果，炒樓者資金被凍結，租金扣除供款後所餘無幾，最終只能等機會翻身。而炒樓這種長線投資，一等就是數以年計，說不定會失去更多機會。

香港人憤怒鳥!

最近，香港電視得不到免費電視牌照一事，鬧得滿城風雨。其實現在己經由一個商業層面的事，演變為政治層面的事。市民已經不是因為單單一個牌照、一間公司或者一個公司主席的不公平對待而憤怒，而是因為政府的處事手法滲透着不可告人的秘密，充滿着紅色恐怖的氣氛而感到震驚。

香港人一向崇尚自由，亦驕傲於有一個廉潔社會。但自從九七回歸之後，香港人己經開始怕這些最寶貴的核心價值會被剝奪。而這次發牌事件的過程和評分標準都被政府以行政會議的保密機制為理由，拒絕向外透露分亳，很容易令人聯想到以後香港所有政策都可以用相同理由達到黑箱作業去控制香港發展。那麼，政府將來以相同手法去剝奪市民的言論自由、集會自由、等，都沒有人可以過問。

正正就是政府這種做事手法所投射出來的未來，跟本就是大陸現在的樣子，再加上越演越烈的中港矛盾，才激起了香港人的憤怒。