環遊世界(8) - 日本 - 大阪(1)

對香港人黎講，日本關西最出名嘅城巿一定係大阪。第一次去日本，點可以唔去大阪呢，而我今日就黎到呢個香港人必去嘅大城巿。

其實我一向都唔太鐘意去大城巿，因為香港本身都已經係一個大城巿，咩都有，去另外一個大城巿其實真係同留喺香港冇乜分別。所以我去大阪，主要都係純粹到此一遊，又或者當係陪下老婆。

其實大阪最驚喜嘅係黑門巿場，相比京都嘅錦巿場，黑門巿場比較多賣魚同賣水果嘅舖頭，不過就少D手信店。而最令我印象深刻嘅係D好好味嘅拖羅，淨係睇魚生本身嘅顏色同肉片嘅紋理都已經睇到個分別。不過講真，要食D好貴嘅拖羅先會覺得同香港嗰D有分別。如果只係食平價或中價拖羅，其實香港都食到。我地食嘅貴價拖羅，如果冇記錯係要1800日元，得5片。而平價拖羅我地食左600日元，但有十幾二十塊。

除左魚生，其實仲有士多啤梨，柑同埋密瓜都應該要試下。D士多啤梨真係可以大到好似個蘋果咁架。

黑門巿場入面亦都有好多熟食，我地就第一次喺大阪食大阪燒。同香港嘅所謂燒餅比較，呢度真係好味好多，最大分別嘅係，香港嘅燒餅係好粉，食半塊已經好人飽，而呢度係完全唔會有呢種感覺，塊餅入面完全係真材實料，唔需要加粉去填充。所以個感覺係，係越食越想食，而唔係越食越飽。

我地當然亦都有去心齋橋同埋道頓堀呢D出名嘅街度，講真，呢度真係好行過旺角好多，條街闊好多，又乾淨好多，不過同旺角一樣，都係咁多強國人。

另外，我地仲試左好多香港人食完再encore嘅磯丸水產，不過其實都幾雞肋。我地叫左一個set，包左四樣野，其中海螺同白蛤都令人失望，而扇貝同北寄貝就比想像更鮮味。海螺味道偏苦，而白蛤就太韌，好難咬。

我地夜晚食左一間好多人推介嘅燒肉放題，叫做「国産牛焼肉食べ放題 あぶりや」，每位3480日元 + 8%稅。呢間野真係好多人黎食，我地等位等左超過一個鐘，如果想黎呢度食，最好預先book位。不過呢度嘅牛肉多款唔在講，仲要真係好食，完全唔係放題嘅質素。不過，同之前喺京都祗園食嘅天壇相比，我覺得肉質都係天壇好好多，但味道方面其實不相伯仲，如果要挑剔，只能話国產牛肉放題比較咸，食到最後真係會好厭。

總括而言，食物質素比香港真係高出好多班，加上日元跌到咁低，所以都幾平靚正。黎大阪，我又唔shopping, 所以我最大目的都只係食。

環遊世界(7) - 日本 - 城崎溫泉(2)

去到城崎，除左一定要試松葉蟹之外，仲一定要試但馬牛。所謂但馬牛，其實係和牛嘅一種，產於但馬。我地就試左一塊但馬牛，今次真係第一次品嘗入口即溶嘅牛肉，基本上輕輕一咬就已經斷開，好味嘅程度真係難以形容。

由於城崎比較近海，所以亦都有海產，呢度就出名松葉蟹，不過原來喺城崎食到嘅蟹並非全部都係松葉蟹。原來，好多睇落好靚嘅餐廳，佢地供應嘅蟹係入口嘅蟹，唔係松葉蟹，行外人其實未必分得出。我地食嘅松葉蟹，一隻要一萬二千幾日元，而入口嘅冰蟹鮮蟹，大約係三分之一價錢。講真，我地都食得出係有D分別，但個分別我又覺得不至於對差咁遠。所以係咪堅持一定要食松葉蟹，我就覺得見人見志啦。

我地其實都係喺間賣蟹嘅舖頭睇睇下，又問問下，先知到原來佢地唔單止賣蟹，仲可以上二樓坐低食野。城崎嘅酒店，溫泉，商舖等，絕大部份人都只係識日文，而咁啱我地揀呢間舖頭又有人識普通話，所以佢就介紹左好多牛同蟹嘅野比我地，仲帶我地落地舖揀蟹。原來，日本人對食物真係好堅持，我地揀左D蠔，諗住生食，點知佢地話D蠔己經死左，所以堅持唔可以生食，要煮熟先可以食，而且價錢係死蠔嘅價錢，而唔係新鮮生豪嘅價錢。由於我地由於要趕火車，所以一切從簡，所有食物都淨係直接烤黎食，咁就可以快好多。

我地喺大幸商店食最後一餐，真係回味無窮，希望可以喺強國人攻佔城崎之前再黎一次。

順帶一提，食松葉蟹嘅季節二月尾就完，所以如果要食最好食嘅松葉蟹，記住二月前黎城崎喇。不過我唔記得問蟹季幾時開始^^"。

環遊世界(6) - 日本 - 城崎溫泉(1)

黎到日本，梗係要試下日本嘅溫泉，而我地今次就揀左一個未被強國人攻佔嘅地方——城崎溫泉。講你都唔信，雖然呢度唔大，只有幾條街，但溫泉數量絕對係多到你浸唔晒，而我就喺24小時之內，浸左六間溫泉。

喺日本浸溫泉，我諗大家都知，係要全裸，唔比著任何衫褲泳衣，所以如果介意的話就唔好黎，因為唔浸溫泉就真係好浪費。不過，我又覺得點都要試下嘅，其實D水真係好熱，入到去真係煙霧瀰漫，如果唔係專登望其實係乜都睇唔到的。不過，其實無論住邊間酒店，佢地都有提無一條白色小毛巾，係浸溫泉用嘅，記得帶埋去，因為外湯係乜都冇比你的，所以我連酒店大毛巾都帶埋去抺身。

由於我地揀咗川口屋城崎河畔酒店，佢地包左7間外湯，即係酒店外嘅溫泉，而酒店內亦有一個酒泉，所以我地總共可以唔洗再比錢嘅情況之下浸8個溫泉。呢度D溫泉間間都有唔同休息日，不過如果開門的話，大部份都會開到11pm，所以我地一到埗，就首先去左第二日唔開嘅溫泉去浸左先，然後第二日一早就出去浸溫泉，務必將所有溫泉全部都浸過一次。一路沿著條街行，其實都幾多野睇，幾多野買，有好多手信係得城崎溫泉先有。呢度出名食松葉蟹同埋但馬牛，仲有大大小小唔同嘅cafe，有D係食cake，有D係食蛋糕，所以我地嘅策略係，每次入溫泉只浸半小時，出黎之後就搵間野坐低食下野飲下野，然後再去下一個溫泉再浸。

呢度嘅溫泉水都幾熱，浸三至五分鐘就會頂唔順，要用涼D嘅水沖下身，或者出去室外浸，又或者休息一下先再落水浸。其實浸三round都已經好夠，出黎抹身吹頭，換埋衫其實都差唔多半粒鐘。

雖然我地冇浸晒全部七間外湯，但其實佢地大同小異。我認為最好嘅外湯係鴻之湯，同一之湯。鴻之湯其實係最偏僻，但亦都係因為咁，鴻之湯最少人，最靜，我浸室外嘅時候，真係少人到得返我一個人喺度浸，個天又落住少少雪，睇住D泉水喺山上面成條瀑布咁流落黎，真係幾有詩意。不過，浸完出返黎休息區就真係唔太夠坐，同埋坐得冇咁舒服，而呢方面一之湯就好D，因為佢個休息區係上返一層，所以大返D，多D坐位，又坐得舒服D。鴻之湯同一之湯都有按摩椅，而其他休息區都係比較細，如果要等齊人先走，咁就有時可能要企。而最差嘅，我相信係柳湯，因為真係太細，浸水嘅位置其實只有大概三個浴缸咁大，幾個大男人一坐落去，其實己經冇乜位淨，D人上落水又阻住D位，所以其實真係浸得好唔舒服。而休息區更加只係得一條長櫈，最多坐到三四個人。所以我真係強烈建議大家唔好去柳湯，尤其係下午三點幾開門嘅時候就更加多人。如果你真係咁犯賤，點都要去試下，咁我建議夜晚十點先好去，因為早上同夜晚最少人出黎浸溫泉，而柳湯係夜晚十一點關門，所以十點去應該最少人。

不過城崎呢幾條街嘅食肆開門閂門嘅時間都幾特別，好多都係十一點先開門，中午休息幾個鐘，三點左右又開返門，然後五六點左右就閂門，但又有D係五六點先開門，做到夜晚十點。所以如果揀左某間食蟹或食牛嘅舖頭，真係要睇清楚幾點開門幾點閂門，如果唔係好多時都會摸門釘。

其中有一間餐廳食蟹唔錯，叫海中苑。我地叫左咁多野，都只係5400+1950日元，即係514港幣左右。如果喺香港食，隨時要過千。

環遊世界(5) - 日本 - 京都(2)

聽講好多人去京都係為左著和服，因為其他日本城巿未必有得出租和服。所以，去京都旅行，好多時都會見到好多人著晒和服喺街行。而我，同我老婆，就係其中兩個。我想講，千萬千萬千萬唔好10度以下著和服。。。

去京都之前好幾個月，老婆已經鄭重表明一定要著和服，仲要一齊著。其實我就冇乜所謂嘅，不過當時聽講著和服有好多件，到時會熱到飛起。結果，今日終於要著和服，點知今日就一夜之間跌左16度，得返2-6度。我心諗，著和服咪啱晒囉，一定夠暖。點知，到我著完一出舖頭門口我就知奶野了。。。和服有兩件底衫，一件面衫，天氣凍時可以再加一件外套，四件衫其實應該夠暖，但只限於上半身。下半身其實只得一件長袍包著，好似著左長裙咁，如果冇打底的話，入面就已得返條底褲。呢世仔第一次著和服，鬼知會係咁架咩，我真係冇打底，咁嘅氣溫之下行足全日，真係凍到呢。。。所以，如果你未著過和服，我建議10度以下真係唔好試，除非你有預備打底啦。我地見岡本呢間好多香港人都喺度租和服，而且口碑唔錯，所以我地都喺度租。網址：http://okamoto-kimono.com/about/index.html

其實預約著和服，第一，真係要約早D，因為佢每一個款都係有限的，得一件或兩件，所以如果你係第一個去㨂衫，你就可以有好多款比你揀，如果你下午先去，就得返人地揀剩唔要嘅款式。第二，唔好慳，你一生人會著幾多次和服？我相信十年一次己經好多，咁仲慳黎做乜？最貴嘅package都只係五千幾日元，D款式真係靚D，同埋布料質地都係好好多。我見有D女仔著和服著出黎個效果成個阿婆咁，真係唔著好過著。

仲有就係，著左和服，真係唔好食咁多野，因為你根本食唔到。無論男定女，條腰帶都係札到好緊，基本上你D大腸小腸都已經擠左上去頂住個胃，所以如果仲去食大餐，真係苦上加苦。去飲杯茶，食件餅夠架喇，因為你根本唔會覺得肚餓。

著左和服其實係幾靚嘅，去清水寺同伏見稻荷大社影相真係幾襯個環境。清水寺附近其實幾好行，尤其對於第一次去清水寺嘅朋友，因為成街都好多紀念品，又有小食，同埋仲有D小客棧，可以飲下茶食碗紅豆年糕。而伏見稻荷大社就有好靚嘅千本鳥居，隨時影影下就冇左兩個鐘。淨係去呢兩個地方其實已經玩到一日，不過記得帶腳架同帶多粒電。

source: 網絡圖片

環遊世界(4) - 日本 - 京都(1)

其實我諗好多人都估唔到我今次係第一次踏足日本境內。其實我一直都知日本好玩，而且相對地係先進過好多國家，所以玩起上黎會舒服好多。但亦都係因為咁，日本從來都唔係我最想去嘅地方。「咁先進咁方便嘅地方，洗乜咁早去，老D先去都唔遲啦！」呢個一直都係我嘅諗法，到五十歲先去都唔遲。不過自從福島地震之後就唔係咁講喇。因為我開始後悔唔早D去，而家搞到去日本好似去打劫咁，係做緊D大逆不道嘅事咁，尤其當我結婚之後，就更多人叫我唔好去日本。原因，我諗唔洗我多講。

Anyway，今日我終於黎到日本。第一站係京都。

我一直聽唔少人講日本幾好幾好，其實真係搞到我有好多幻想。所以當我發現京都其實都唔係想像中咁先進時，我覺得好似比人呃左咁。不過，我老婆話京都同東京相比，只係一個鄉下地方。咁如果係真的話，咁呢個鄉下又真係幾先進喎，我鄉下就未有八達通，但京都就有得用ICOCA，即係IC卡。

ICOCA & HURAKA呢個組合其實都幾無敵，我唔係係咪最平，但應該都係最方便，因為有左HURAKA就可以由關西國際機場直去京都，而IC卡就可以撘晒所有交通工具，即係買左呢個組合，就可以一下次融入呢個地方，去邊都唔會有難度。不過如果真係一日之內去幾個地方，其實1 day pass都幾抵，因為搭地鐵或巴士通常都要二百幾十日元，但一個1 day pass只需要600日元，所以搭3程已經回本。不過，我成日都話，搭3程都只係平得幾十日元，即係幾蚊雞港幣(以0.07換算)，都唔知慳黎做乜，而且1 day pass又唔係度度都有得買，行去買嘅時間都唔止值幾蚊雞啦。所以話呢，如果真係用1 day pass，真係要一日撘好多程先好用。

黎到日本，其實最唔方便係唔識日文，雖然有D地方係有英文(機場或火車站呢D比較多外國人嘅地方會多D英文)，但去到郊區少少例如嵐山，電車巴士都淨係得日文，咁就會變得非常唔方便。我呢D大鄉里，佢唔講，我鬼知撘電車或巴士係點比錢？原來好似香港撘叮叮咁，係車尾上車，車頭落車，落車時先入錢或嘟IC卡。撘巴士都係，喺車身中間個大門上車的，落車先比錢。得日本，鬼知咩。日本曾幾何時都叫第二大強國啦，呢個國家咁封閉，用咁少英文，真係好難令我鐘意呢個國家。

仲有就係，京都站都叫一個大站啦，指示真係幾唔清楚，D出口指黎指去，指到錯晒。最好笑就係入左JR閘口之後，原來仲有個閘口入新幹線。乜唔係入完要出返先再入另一條線架咩？I was so confused.都唔知個站點解會搞到咁混亂。而且咁大個站，原來得西出口同中央出口。咁如果我要去東面點算？冇辦法囉，得兩邊可以出囉，救命！或者可能有高人可以指點下啦～

另一個我覺得比人呃左嘅係，食物質素。好多人都同我講，日本D野幾好幾好食，幾貴都值，今日一試，不外如是。係，日本嘅食物係好食，好啱香港人口味，我都覺得好正。但比我想像中差太遠。曾經有個好鐘意日本嘅朋友話日本人其實唔太鐘意食三文魚，係香港人先咁鐘意食，咁我都聽講過，日本人鐘意吞拿魚多D。然後我呢位朋友就碌大對眼，嚴正聲明：「唔係吞拿魚，佢地嗰D係叫拖羅！」我心諗，真係咁大分別咩。我當時未試過，唔敢反駁。但我今日真係覺得佢嘅反應係崇日反應。

source: 天壇官網

說到底，日本食物質素唔差，但真係太多香港人將日本誇大得太多，所以我so far都係失望多過驚喜。但有間餐廳我覺得係應該suggest下嘅。呢間係食燒牛肉出名嘅，叫天壇。喺京都祗園。網址：http://www.tendan.co.jp/gion/。點解我suggest呢間野呢？第一，我覺得真係好食，佢嘅牛肉他他真係幾好味，仲有佢個燒肉盛合嘅醬汁好入味，D肉燒完真係好味到出汁。不過呢間野等位要等最少一個鐘，所以最好早D去攞飛，然後行下街先再返黎。呢間野，我覺得真係好過份，我地叫左好多野食，食極都唔洗一萬日元，即係7舊水港幣都唔洗，真係好過份。佢要我地等一粒鐘，但淨係賺我幾舊水？你話係咪好過份！

至於酒店方面，我其實要求唔高，最緊要乾淨整潔。有間類似backpacker嘅酒店真係火唔錯。呢間野叫PIECE HOSTEL KYOTO。網址：http://www.piecehostel.com/kyoto/en/。佢地嘅職員講英文講得好好，我知佢地識講普通話，但講真，係我唔想講普通話。呢度除左check-in check-out之外，真係乜都自己搞掂，包括食完野幫佢洗埋碗。但間野就包左無限熱水，咖啡，茶。你有需要就自己沖野飲，冇人會理你，最緊要係要自己洗返D杯。早餐都包左，不過係間單早餐，主要都係面包同飯，要求唔高的話，其實幾好味。如果想搵間平靚正嘅，我覺得一定要揀呢間。

另外真係要提提大家，唔好一月二月去嵐山，因為嵯峨小火車係唔開的，小火車係要三月到十二月先會開。而且而家D樹全部都係樹支多過樹葉，所以我地今次去嵐山都係好唔合時。

環遊世界(3) - 希臘 - Mykonos

希臘其實最出名係D小島。而小島中最出名係Santorini，其次係Mykonos。所以我地今次就揀左呢兩個小島，不過其實希臘仲有好多其他小島，我相信都唔會太差。

風車日落，小威尼斯
Mykonos最出名係有風車，唔係一個，而係一排五個，仲要係好巨型o個種。其實呢D所謂風車係磨坊，以風力去將小麥磨成粉，然後再用黎造面條面包。今時今日，呢D磨坊已經失去實際用途，變成佈景板。而咁啱，呢D磨坊喺島o既西面，所以日落時太陽正好o係五座磨坊o既後面，影出黎o既相同藍白小屋相真係各有各美，所以我都建議大家點都要去一去Mykonos。

小威尼斯亦係Mykonos出名o既地方。一排小屋伸出海面上，海浪不停拍打屋底，就好似意大利威尼斯出名o既建築一樣。
交通
去Mykonos其實有三個方法。第一係由雅典坐飛機去, 不過其實雅典同Mykonos唔太遠，坐飛機反而會浪費時間。第二係由雅典坐船去，如果玩完雅典先去Mykonos，呢個方法係最好o既。第三個方法係由Santorini坐船去，如果玩完Santorini先去Mykonos，咁你最好揀呢個方法。

希臘船票可以o係SeaJets官方網站買:
https://www.seajets.gr/

早一星期買其實都已經足夠，因為D船好大隻，好多位的，同埋買economy已經足夠，再貴其實個位都差唔多。上船時第一件事係攞行李，唔同目的地有唔同o既行李架，記住唔好擺錯。之後就入船艙，搵位坐低。記住，到時大家會爭先恐後去擺行李，再爭先恐後去搵位，手快有手慢冇，雖然唔會冇位，但要打散坐都唔係咁好啦。仲有就係，如果你係網上買飛，去到碼頭先攞飛，記住提早去碼頭，或早D去攞飛，因為有時佢地會取消班次而assign左你去另一班次，所以早D攞飛就早D知。當然，佢地都會有email提你，但我唔敢擔保個個都收到囉。如果有租車，最好早一兩日去攞飛啦。仲有就係，D船票其實有mark位，但上到船個個都亂坐的，但有時又會有人手持船飛問你地有冇坐錯位，所以自己執生喇。

Mykonos其實唔細，可以租車環島遊，但其實除左碼頭區多野睇多野買，其他區都唔係想像中咁靚，有D沙灘淨係得太陽傘，根本冇人去玩。不過，亦都係因為咁，話唔定你可以發掘到人地見唔到o既靚景。

食物
當你以為Santorini同Mykonos呢D小島一定有海鮮食o既時候，你就真係大錯特錯。呢度o既海鮮又貴又少又唔好食。食海鮮，都係返香港食好D。

Mykonos其實最正係D橫街小巷o既餐廳仔。細得黎又好靚，D野食仲唔錯添。仲有就係總有一間o係左近o既酒吧，喺三十幾度天氣之下入去涼下冷氣，飲杯啤酒，真係好爽。尤其當你行到攰，等睇日落時，小威尼斯入面D酒吧就更加係不二之選。

酒店
我地喺Mykonos只留兩晚，亦唔會租車，所以book左間比較近碼頭區o既酒店，貪佢步行就可以出去玩，所以我地揀左一間叫Madalena o既酒店。點知就出事喇。

首先，希臘人英文差我都可以理解，但呢間酒店o既肥婆receptionlist講英文講到鬧交咁，語氣非常差。最重要係，我黎Mykonos係坐船黎，一上船已經打去問有冇人接送，冇o既話點坐車去，我講晒我坐邊架船，邊個班次，佢問返我轉頭係邊個碼頭落船。Mykonos係有分old port同new port，我以為兩邊都好多船上落，事後我先知，其實根本所有船都集中喺new port。但佢當時就話叫我到左先再打比佢，佢到時先再安排車接我，但又唔講洗唔洗錢就收我線，再加上語氣差，我同佢傾完電話都已經一肚氣。等我落左船，搵左一大輪到底我喺old port定new port，最終我要用GPS再加offline map先可以定位到自己喺new port，然後再打去問酒店。最好笑係，由頭到尾佢都冇講接送洗唔洗錢，問佢點搭車去佢又唔講。咁你叫架車黎接我，我咪比你屈幾多錢都得?不過，最後發現new port去酒店其實只係5分鐘車程，而且到我check out都冇問我攞返車錢，我先知接送係免費。

酒店期間，都有一段小插曲。我地房冇露台，但洗完衫要晾衫，咁我地房對出係有個露天common area，諗住食完早餐，又有太陽，就拎D衫出去晾一陣，出去玩先拎返入房。點知肥婆大大聲話唔可以拎D衫出黎晾，叫我地拎返入房。OK，我就當你係酒店policy，唔比人晾衫出黎。點知我地出去玩完返黎，就見到一件二件衫晾晒喺同一個地方，仲要晾到第二朝食早餐都唔見有人黎拎返，而肥婆又唔出聲。咁算唔算歧視我地?

到我地check out時，又有另一件事發生。有個鬼佬，聽口音應該係英國人，同個肥婆嘈。佢話一早打黎留定房，當時電話有個女人應承左比某間房佢，仲quote晒價錢，咁大家agree左，以為黎到就有房，點知比唔間房佢，咁都算，咁咪住D差少少o既房囉，但check out時，竟然charge返本來個價錢，咁點會合理?但個肥婆仲要用D好差語氣o既英文同人地拗，又唔認自己係電話入面個女人，又話酒店咁做冇錯，仲話大家唔係argue，係discuss。OMG，唔係肥就大晒的。我地聽到都覺得好火，何況當事人。

所以呢，呢間叫Madalena o既酒店，我係100%唔suggest。如果係都要住呢間，咁有咩問題就自己同酒店"discuss"喇。

環遊世界(2) - 希臘 - Santorini

希臘喺幻想中係一個好浪漫嘅地方，淨係「愛琴海」呢個三個字已經令人有無限嘅遐想。想像中嘅希臘係有無數藍白小屋，有最靚嘅日落，同埋有聖鬥士星矢入面嘅神殿。咁事實上又係點呢？

今次我就去左希臘兩個主要嘅小島(Santorini+Mykonos)同埋首都雅典(Athens)，有驚喜亦有驚訝。

首先，講講我地行程先。

Day 1-4: Santorini
Day 5-6: Mykonos
Day 7-8: Athens

我地係9月尾去，Total有8晚酒店喺希臘住，如果加埋頭尾同訓機場，其實有10日。

訓機場

我地今次由於日期同時間唔係好夾到其他航班，所以決定由香港飛往俄羅斯嘅莫斯科(Moscow)轉機去雅典(Athens)然後再轉機去Santorini。我地去到Athens其實已經晚上11點左右，而去Santorini班機係早上5點幾，所以我地直頭喺機場訓一晚，可以慳返一晚酒店錢。亦都係因為咁，地先決定搭飛機去Santorini而唔係坐船去。聽朋友講，由Athens坐船去Santorini係要6-7小時，而坐飛機只要45分鐘，不過預埋上機落機攞行李(唔洗出入境，因為同一個國家入面)，咁都要兩三個鐘，但點都快過搭船好多。

其實Athens機場唔大，但坐位唔少，多數都係三連位，但九成都係有扶手位，但淨返嗰一成係冇扶手的，即係話你可以成個人打平覇晒三個位黎訓覺。放心，如果係深夜，冇人會話你，一個人霸晒D位，亦都唔會有人趕你走。不過呢D位真係唔多，要早D霸。而我地就好唔好彩。。。覇唔到。咁點算？機場入面有個好細嘅museum，我見有好多人(我意思係鬼佬鬼妹)就席地而睡。不過，museum唔大，好快就會比人霸晒D位，咁霸唔到又點算？好彩Athens機場仲有M記。我地就決定訓M記，我見有人唔幫趁就訓左喺度，但我地就幫趁左個巨無霸餐，我覺得好抵食，個巨無霸好鬼大個。M記其實好訓過地下，因為有軟櫈，坐喺度訓又得，打橫訓都得～不過衰就衰在M記D音樂好鬼大聲囉，訓得著都叫好好。

租車
我地今次由於會喺Santorini留4晚，而且諗住環島遊，所以一早租定車。上網搵左一輪，有個網站幾好，佢係一個agent網站，可以search晒各大租車公司嘅車，當你揀好要租咩車之後，佢就會落order，等租車公司認投，有人認投就會send返email比你，咁你print返voucher到時拎去就可以攞車。

喺Santorini租車其實好普遍，周圍都可以見到有車出租，唔預先book定都可以租到車。不過希臘流行棍波車，自動波嘅車比較少，所以租自動波車亦都比較貴。但自問唔多揸車唔多，所以都係租自動波穩陣D。

Santorini大部份地區都係比水平高好多，就係好似一個喺海面凸出嘅高地咁，所以由城鎮落碼頭係比較困難，要Z字型行好耐先落到碼頭。

不過唔好以為外國地方D路就好闊好好揸，Santorini所有路都冇紅綠燈，而且地上面嘅白色線都好淺色，好多時根本冇線可遁，完全係靠大家互相禮讓，所以對遊客黎講都幾危險。而Oia呢D最多遊客嘅地方反而條路超窄，好多位啱啱好過到兩架車，但又會有人喺馬路兩邊行，又要避人，又要避車，真係幾難。

租車時，租車公司會問你加唔加保險，如果架車有咩損傷，就乜都唔洗你賠，保險公司會賠。我真係recommend大家要加呢一項，因為我就係冇加到呢一項，而我又真係整花左少少，結果就原本只係一千幾，變左要4千幾。。。都幾無耐。

仲有一樣野要留意，還車時，如果你唔係喺機場還車，例如我今次係喺碼頭還車，咁就有可能搵唔到間租車公司嘅門巿。點解？因為有D租車公司根本就冇門巿喺碼頭。我就咁啱撞正呢個case。我當時去到碼頭還車，搵左好耐都搵唔到間野，問附近D人又唔知，最後唯有打去問(好彩事前出左張歐洲電話卡)，結果，佢叫我將架車求其泊喺public area，然後將車匙放喺櫈底，然後閂埋門走人，佢地自然有人黎收返架車。我估唔到咁都得，咁我早知當初book車就mark早D還車時間，咁又可以平D。

世界最美日落
Oia嘅日落被譽為世界最美日落，我地就日日都去左睇日落，的確好靚。我地當然都影左好多相，但要留意係，上午同下午太陽方向唔同，好多時下午去到個景好靚嘅地方就會背光，要上午去先會影得靚。事實上，Oia大部份地方都係上午影會靚D，而且Oia其實好細，D路又窄，咁上午就會少人好多，又冇咁熱，所以我地都有兩日係一早就去影相。

Santorini除左喺Oia可以見到好靚嘅日落之後，聽講Fira(Thera)都可以見到，令外仲有島最南端嘅燈塔，同埋山頂最高點，仲有就係下面提到嘅酒莊Santo Winery。我地有去燈塔但其實上面好細，企唔到好多人，我都係影左幾張相就走。而山頂就有間修道院，對出就見到成個島嘅全貌，我地冇喺呢度睇日落，但我諗一定都會好靚。

沙灘
我地去左島東面嘅黑沙灘，呢度有一條好長嘅街，成條街都係酒吧，餐廳，同商店，我地來回行左一次，已經行左超過一個鐘。要留意係，呢度冇乜地方泊車，有個停車場泊左之後，有個人走黎話要幫趁佢間餐廳先可以喺度泊，咁其實我都冇乜所謂，反正都要食野。

除左黑沙灘，仲有個red beach同white beach，不過原來呢兩個beach揸車係去唔到的，一定要行山過去，我地遠望過去又覺得冇乜特別，所以最後都係放棄左。

食物
希臘嘅地道食物唔洗諗，對亞洲人黎講係好難食的，而且真係唔平的，所以唔好期望咁大。我地亦都帶左大量即食面，可以慳返伙食費。

不過其實希臘啤酒係ok的，比德國啤酒淡，幾解渴，Oia附近有大量酒吧，行到攰時可以坐低飲兩杯。

另外，如果識得搵，其實Oia都有好味嘅餐廳。不過就比較貴，例如呢間叫Katro嘅餐廳，我地walk-in入去叫左個beef fillet，真係好味到震。如果一早計劃黎呢間野度食，最好早幾日預早book位，因為間間餐廳都好少位，尤其係睇到日落嘅餐廳，更加係冇可能walk-in入去。

值得一提嘅係Santorini有個好出名嘅酒莊，叫Santo Winery。我地就order左一set 12杯紅白酒，又唔貴喎，都只係廿幾蚊Euro。呢度以品酒為主，如果諗住黎食steak就一定會失望喇。仲有就係，呢度個景真係超靚，不失為另一個睇日落嘅好選擇。

酒店
我地4晚住左兩間酒店，住左一間近Oia嘅，叫Villa Agnadi，己經唔係最貴嗰D，但都唔平，諗住佢貴D就會好D，但原來唔係喎。一入門口嘅感覺係好raw，乜都冇，連最基本嘅mini bar，即係茶或咖啡都冇，亦都冇水煲，就連牙刷牙膏都冇。我地自備左一個好細嘅水煲，但最估唔到係，呢個島D自來水係咸咸地嘅，我估係因為佢地用海水化淡技術黎制造食水。結果，我地被迫出去買水返黎飲。好彩嘅係，有車的話就好容易出去超巿或士多買水，如果冇車，咁就冇辦法。唔好諗住搭巴士好方便，等車等到你傻。

另外，D床其實都唔太舒服，D被仲要係超薄，好似床單咁薄，真係唔知有乜用，夜晚唔想冷親，最好用外套蓋多層喺面。不過幾唔舒服都好，日日出去玩到攰先返黎，都叫訓得著嘅。

另一間酒店我地就揀左喺Fira，諗住近碼頭，唔洗預早好多起身。間酒店叫De Sol，原來係Volcano View Hotel嘅分支。Volcano係一間好正嘅酒店，仲好貴添，間酒店面向大海，入面仲有三個泳池，設施黎講真係冇得彈。而De Sol就喺Volcano對面，但就乜都冇，同埋都簡陋得多，而且酒店好似仲起緊咁，房間面向地盤，沙廛滾滾，所以我地全程都冇出露台。不過亦因為咁，間酒店就好平，但又可以用晒Volcano入面所有設施，包括早餐。所以住De Sol，不失為一個著數嘅選擇。但因為De Sol太新，又冇路牌或招牌，所以我地都搵左大半個鐘，周圍問人，又打電話去酒店問，最後先搵到。

天氣
原本諗住係16至23度，諗住一定好涼，尤其小島比較大風，一定都會涼好多，但點知又好鬼死晒，好似香港三十幾度咁熱咁。不過呢度間中都會落雨，所以一定要帶遮。

Santorini總結
其實Santorini真係好細，由南去北，揸車一個鐘之內一定行得晒，不過要玩嘅野又的確幾多，所以我建議留3-4晚，視乎你有幾鐘意影相，同埋全程唔好轉酒店，一定要租車，最好自動波，亦因為個島好細，講真，唔需要住喺Oia入面D幾千蚊一晚嘅酒店，你只要租左車，住全島最平同最貴嘅酒店其實冇乜分別。

Oia日落真係好靚，有生之年應該會再黎。