人生的意義

最近同一位朋友食飯，講起人生目標，有感而發所以就以此為題寫所呢篇文章。

香港人，生活壓力好大，大部份人每日都忙於搵食，一講到夢想或者人生目標，好多人都會話想買樓。大學生，目標大多都係想畢業出黎搵到工，或者搵份好工，至於何謂好工，咁就真係人人唔同。而中學生，我相信佢地嘅目標九成九都係要入到大學，最好係自己想讀嘅科目。

仲記得中六中七苦讀中國語文及文化科，其中一篇必讀文篇係殷海光嘅人生的意義。當中談及好多道德層面嘅野，大部份內容基本上係離題萬丈，如果要apply喺現今社會，根本就係old school到極。唔講錢，講道德？認真的話你就輸了。

以前嘅香港，處處機會，甚至只要你肯捱，唔需要咩特別知識或技能，你捱到幾十年後嘅今日，好多時己經變左有錢人。點解？因為當時每個行業都係啱啱起步，你只要長命過人地，你今日就己經係大老闆，大商家。今時今日，香港已經冇呢支歌仔唱。你點捱都好，大把人比你更加捱得，你收好低人工咩，大把人比你收得更低。競爭大左，機會少左，想做有錢人就越來越難。

冇錢都可以有夢想。呢句說話係冇錯嘅，你的確可以有夢想，但呢個夢想永遠都只係夢想，唔會有實現嘅一日。你嘅夢想係環遊世界？計計條數先啦，機票，食宿，唔洗錢咩？踩單車環遊世界？咁你屋企人洗唔洗你養先，同埋你喺外地，有意外，有病，你冇錢的話你估真係會好好玩？諗完一輪，你仲想環遊世界？

做人，最開心嘅時間係剛剛大學畢業，有份工，但又未結婚生仔嘅時間。因為你唔會再有讀書壓力，有收入之餘支出又唔多，亦唔需要為左供樓每個月留一筆錢，更唔會有個老婆／老公下下叫你唔好做呢D做嗰D，話要為家庭著想。咁free嘅時候，係實現夢想嘅最佳時機。冇錯，係實現夢想，而唔係去諗下有咩夢想。因為你可以冇包伏咁去working holiday，去見識世界，亦都可以創業並失敗無數次而唔怕影響屋企人。

人老左，你就會望返轉頭，發覺最好時機己經錯過。你會發覺每日返工放工，勞勞碌碌，人生的意義何在呢？

IT interview (7) - 你in我時我in你

好多IT人成功過左interview嗰關被錄用之後，就鬆毛鬆翼，以為最美好嘅時光即將會到來。但你又知唔知其實份工啱唔啱你做？你會唔會做得開心？如果你不嬲寫開C++，叫你寫Python，你又點睇？如果唔單止要寫program，仲要做埋IT support，同事上唔到網，收唔到email，甚至個枱頭電話有問題都要搵你，咁你又會點諗？

我相信好多人interview時都好乖，個interviewer問乜答乜，Q&A時又唔會問得太多問題，藉此令到整個interview好順暢，希望留下好印象。可惜咁樣反而浪費左一個好好了解份工嘅機會。講真，所謂interview，一般認知都係interviewer去了解candidate識唔識合呢份工，但諗深一層，個candidate send CV黎，同埋黎interview，其實只係base on一個非常簡單嘅job ad去做決定。好多時，一份工要做好多野，而且唔係三言兩語可以講得晒，而寫job ad嗰個人又唔一定好熟悉份工，寫出黎嘅野同到時真係要做嘅野可以差好遠，尤其係一D新開嘅position，寫job ad時好多時根本未諗好係要做D乜，用D咩technology，工作範圍有幾闊。

所以，interview其實係你in我時我in你，你想知D咩，可以問我，但我同時都會想知道好多野，唔好以為你覺得我好啱呢份工我就會做，我都要睇下你份工係做D乜，expect D乜，又肯比D乜，唔會比D咩，唔准做D咩。好簡單，如果你到返工第一日先知原來有人日日喺office食煙，一日四次，每次半小時，但公司唔需要你過probation，即時坐正，但要你三個月通知先可以離職，咁你真係預左最少吸三個月二手煙。Interview最忌做乖仔/女，乜都唔問，坐定定答問題。就算最後真係請左你去做，你可能都會喊三聲。

Go Pro, Phantom, What's Next?

曾幾何時，仍然係大學年代o個陣，身邊好多人，包括自己，都對知識追求好有熱誠。記得當時冇參加過任何學會，亦冇上莊，但參加左一個比賽 - 全港大專生機械人大賽。當年o係香港係第一屆，所以資源唔多，亦冇人教路。我好enjoy呢個比賽，brain storming，整prototype，由十幾組人變成三隊去參加比賽，全部都瀝瀝在目。

當時o既teammate而家己經各有所長，各散東西之後，各有各精彩。我相信最精彩o既應該係Frank Wang, DJI公司o既創辦人。當年佢己經對直升機好有熱誠，今日，佢己經將熱誠化為產品，由轉為金錢。每個故事背後總有一段辛酸史，而且唔係每一個故事都會有完美o既結局。Frank Wang之所以成功，除左佢自己努力之外，亦好需要天時地利人和，佢o既故事可以o係呢度睇到:

http://www.ust.hk/alumni/upload/publications/HKUST_Alumni_dec13.pdf

DJI公司最為人所知o既產係Phantom系列，可以同黎高空攝影，拍片，同Go Pro有異曲同工之妙，甚至根本可以同Go Pro一齊用。

好多人會話，如果我係佢，我都得啦。拿，咁而家有個機會放o係你面前。唔需要自己去發明D咩，因為己經有人發明左，你只要攞返黎，改少少，再賣出去，咁就可以賺大錢。咩黎？咪就係OpenROV。

OpenROV係一部潛水機械人，佢可以潛入水底，將影像傳送返去水面o既電腦。最特別係，佢成個project都係open source，無論係零件，軟件，安裝過程，如何買到零件，全部都寫得清清楚楚。亦都係因為咁，我相信大陸好快就有人抄足呢部野，然後大量生產，然後改良，然後再生產。想做第二個Frank Wang，機會黎啦~

IT interview (6) - Q&A

唔知大家interview時有冇留意，大部份interviewer到最後都會問返你有咩想問。有D人會直接話"我冇咩問題"。其實呢個Q&A session先係最重要o既時間，何解？

第一，Q&A一定係最後一個環節，所以完左個interview之後，無論係interviewer定interviewee最深刻印像o既都係呢一個部份。兩邊都會不停回想返對答之間o既細節，從而估計對方真正想法。

第二，Q&A session係幫你更了解呢份工，呢間公司，呢一team人。好多時，interviwer都唔會主動去講公司背景，structure，發展方向，人數，公司culture等，而Q&A就係最好o既時間去問呢D細節喇。

第三，Q&A session亦都係最好o既補救時機，如果你自問整個interview都表現得好差，又或者覺得有D美中不足，Q&A就可以比個機會你去令interviwer對你挖目相看。好簡單，如果你完全唔問問題，咁就代表你唔在乎工作環境等細節，亦都反映你唔會認真看待呢份工，即係話，你可能工作幾個月就會諗住走，咁interviwer當然唔會花時間精力去train你啦。如果你問一D以金錢為主o既問題，例如每年有幾多花紅等，咁其實interviwer就會明白你工作目的係為錢而多於興趣，前途，熱誠等。

咁其實一般interviwer會鐘意candidate問咩問題呢？講真，每一個interviewer都唔同，不過重點在於你要扮一個有熱誠，有能力，而且容易相處o既人。所以Q&A時你要問一D同工作崗位相關o既問題，例如呢份工o既細節，team structure，個team有幾多人等。記得interviwer每答你一個問題，你自己都要比返少少comment，例如interviwer話個team structure好flat，唔會有一層一層o既管理，就算你心目中幾唔鐘意都好，你都要話好，仲要扮到想有咁o既team structure好耐，當然，如果你係真心o既就更好。你可能會問點解要扮野，咁我就會問返你轉頭，你想唔想要份工？如果想o既，你就要扮，呢D係interview必需的，過左interview，入左去做，你先再講你o既真正想法都唔遲。

Must-have apps for iPhone 2013 (3)

以iOS game而言，2013我玩o既主要都係Grand Theft Auto系列，包括GTA III, GTA: Chinatown Wars，GTA: Vice City 同埋 GTA: San Andreas。

GTA系列出名於高耐玩性，多任務，亦多隱藏野，而且有故事性，不過我覺得最吸引我o既係可以o係城市入面橫衝直撞，同差佬駁火，對於香港人黎講，打打殺殺係一個好好o既減壓方法。

第一隻o係iOS玩o既GTA係GTA3，一開始覺得D 3D畫面好差，唔夠靚。但玩落之後，就覺得畫面其實係次要，最重要係遊戲內容同埋順暢度。爆機之後，再己經不能自拔，所以買埋其餘三隻GTA。講真，其實每一隻GTA都可以玩好耐，幾十蚊就可以買到其實都幾抵玩。

GTA: Chinatown Wars其實我覺得幾特別，因為佢用返由上向下望o既視角，而唔係其他三隻咁任意調較，有D似玩返第一集GTA o既感覺。不過GTA o既高可玩性，令到畫面兩邊需要放置好幾個button，加上要顯示小地圖，角色狀態同埋武器，如果用iPhone玩就會好辛苦，所以我只會用iPad玩GTA系列遊戲。

玩到GTA: San Andreas，除左畫面改進左好多之外，亦多左好多元素，例如主角會有女朋友，要間中同佢出下街，而主角亦都多左幾個attributes，例如揸車揸得多，會提升driving skills，做下gym，又會揀出多D muscle。

總結而言，GTA係o係我部iPad放得最耐o既game，就算爆左機都唔係好想delete左佢。如果大家諗唔到用iPad玩咩game好，我會推薦GTA系列。

Must-have apps for iPhone 2013 (2)

香港公共機構或政府機構其實真係好out。成日話大力支持IT業，但我真係完全feel唔到政府做過D乜。唔好同我講，喺公屋大堂裝D上唔到網o既wifi AP咁o既官商勾結project係叫做支持IT業。

不過，其中一D公共機構app，其實又真係好有用。就好似香港天文台o既app就值得一讚，尤其最近天氣寒冷，唔少朋友都用天文台app去睇天氣，再決定當日著幾多衫或帶唔帶遮。而熱天o個陣，最多人用呢個app o既時候當然係打風落大雨o個陣，無論個結果洗唔洗返工或者有冇得早放，基本上都有無數打工仔開住個app，每幾分數就refresh一次。雖然個app，無論係個icon定係app入面D制，都好似好求其，但佢勝在資料夠update，分區氣溫，天氣警告，各樣資料都好齊。

其實香港人制作o既app一向唔入流，介面設計，可用性，趣味性，各方式都唔及外國o既app。所以我部iPhone亦都極少keep住香港app，而天文台app實在係一個exception，由佢推出到而家，我都冇uninstall過，而且機乎日日都會開黎睇下天氣。所以佢成為我推薦o既must-have app，實在係實至名歸。

香港，勝在有...無限福利？

從前，香港人為香港嘅三權分立制度，有廉政公署而驕傲。今日，立法會被功能組別同親中派控制，市民聲音永遠唔能夠被接受。廉政專員醜聞，亦令人覺得廉政公署己經被赤化，功能成疑。司法機關亦於最近出賣香港永久居民，5位法官到今時今日竟然仍然認為新移民對香港政府財政影響微不足道，實在令人O咀。但以上一切，對新移民人士皆為喜訊，香港對佢地黎講真係一遍樂土，因為有無限福利等住佢地。

講到呢個topic，我覺得非常同意Anthony嘅睇法。每個人都應該為自己嘅將來同下一代打算，香港係咪值得留低，大家應該好好深思。
福利崩潰、鬥心崩潰...多謝何喜華

當然，亦有人會認為香港比世界其他大城市仍然好好多，要移民亦唔係咁間單，大家可以參考下佢嘅意見。
衝上雲霄移民去

三權分立制度中，立法同司法己經淪陷，再加上廉政公署被赤化，香港仲有咩值得驕傲？下一次會唔會輪到執法機關？唔好唔記得，國教事件話左比我地知中央己經對香港教育制道虎視眈眈。黎緊嘅普選咨詢，必定又會搞到滿城風雨。